ພິທີຮັບຮອງໜ່ວຍສະຫະພັນແມ່ຍິງ 22 ໜ່ວຍບ້ານອ້ອມຂ້າງເມືອງເປັນໜ່ວຍສະຫະພັນແມ່ຍີງ 3 ດີ ຄັ້ງທີ 2 ແລະ ທີ 3 ສະໄໝທີ 7

ວັນທີ 6 ພະຈິກ 2018 ທີ່ຜ່ານມາ ຢູ່ທີ່ສະໂມສອນໃຫຍ່ ເມືອງວັງວຽງແຂວງວຽງຈັນໄດ້ຈັດພິທີຮັບຮອງໜ່ວຍສະຫະພັນແມ່ຍິງ 22 ໜ່ວຍບ້ານອ້ອມຂ້າງເມືອງເປັນໜ່ວຍສະຫະພັນແມ່ຍິງ 3 ດີ ຄັ້ງທີ 2 ແລະ 3 ສະໄໝທີ 7 ຂຶ້ນຢ່າງເປັນທາງການ

ໂດຍເປັນກຽດເຂົ້າຮ່ວມຂອງ ທ່ານ ຄຳຜ່ອງ ດວງວິໄລ ກຳມະການພັກແຂວງ, ເລຂາພັກເມືອງ ເຈົ້າເມືອງໆ ວັງວຽງ, ມີ ທ່ານ ນາງ ຂັນຄຳ ສີທານີ ກຳມະການພັກເມືອງ ປະທານສະຫະພັນແມ່ຍິງເມືອງ, ມີ ພະນັກງານທີ່ກ່ຽວຂ້ອງ, ອຳນາດການປົກຄອງ, ປະທານສະຫະພັນແມ່ຍິງທັງ 22 ໜ່ວຍບ້ານ ແລະ ສະມາຊິກສະຫະພັນແມ່ຍິງເຂົ້າຮ່ວມຢ່າງພ້ອມພຽງ.

ໃນພິທີທ່ານ ນາງ ສອນມະນີ ດາລາແສງ ປະທານສະຫະພັນແມ່ຍິງບ້ານສະຫວ່າງ ຕາງໜ້າໃຫ້ສະຫະພັນແມ່ຍິງທັງ 22 ໜ່ວຍບ້ານ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 3 ດີ ວ່າ: ໜ່ວຍສະຫະພັນແມ່ຍິງ 22 ໜ່ວຍບ້ານຄື: ໜ່ວຍບ້ານ ໂພນໄຊ, ບ້ານໂພນສູງ, ບ້ານວັງຊ່ອງ, ບ້ານພູດິນແດງ, ບ້ານໂພນສະຫວ່າງ, ບ້ານນາທອງ, ບ້ານສົມສະຫວາດ, ບ້ານຫ້ວຍແຍ້, ບ້ານຜາທອງ, ບ້ານນາຂົມ, ບ້ານ ຫ້ວຍສະເຫງົາ, ບ້ານນາໄຊ, ບ້ານນາມອນໃຕ້, ບ້ານສະຫວ່າງ, ບ້ານນາຜາແດງ, ບ້ານຂັນໝາກ,ບ້ານວັງໝ້ຽງ, ບ້ານໂພໄຊ, ບ້ານໂຊກໄຊ, ບ້ານຫ້ວຍປາມ້ອມ, ບ້ານເມືອງຊ່ອງ ແລະ ບ້ານປາກເປາະ, ແມ່ນອົງການຈັດຕັ້ງມະຫາຊົນໜຶ່ງເຊິ່ງເປັນເສນາທິການໃຫ້ແກ່ ຄະນະໜ່ວຍພັກທີ່ຂຶ້ນກັບ,

ໂດຍເຮັດໜ້າທີ່ສຶກສາອົມຮົມການເມືອງແນວຄິດ, ເຕົ້າໂຮມຄວາມສາມັກຄີແມ່ຍິງພາຍໃນໜ່ວຍປະຕິບັດແນວທາງນະໂຍບາຍຂອງພັກ-ລັດວາງອອກ.

ເອື້ອຍນ້ອງແມ່ຍິງທັງ 22 ໜ່ວຍບ້ານມີຈຳນວນໜຶ່ງແມ່ນເຮັດນາ, ເຮັດສວນ, ປູກຝັງ, ລ້ຽງສັດ, ຕ່ຳຫູກ ເພື່ອສ້າງລາຍຮັບເຂົ້າສູ່ຄອບຄົວ.

ທັງ 22 ໜ່ວຍບ້ານ ມີສະມະຊິກແມ່ຍິງທັງໝົດ 2,792 ຄົນ, ມີ 3 ເຜົ່າຄື: ເຜົ່າລາວ 2,132 ຄົນ, ເຜົ່າມົ້ງ 166 ຄົນ, ຂະມຸ 494 ຄົນ, ເຂົ້າເປັນສະມະຊິກພັກ 41 ສະຫາຍ, ສຳຮອງ 10 ສະຫາຍ, ມີຄະນະໜ່ວຍ 90 ຄົນ ແລະ ແບ່ງອອກເປັນ 207 ຈຸ.

ເພື່ອຈັດຕັ້ງປະຕິບັດຂໍ້ແຂ່ງຂັນ 3 ດີໃນຕໍ່ໜ້ານັ້ນສະຫະພັນແມ່ຍິງທັງ 22 ໜວ່ຍບ້ານ ຕ້ອງໄດ້ຈັດແບ່ງເວລາໃຫ້ເໝາະສົມເພື່ອຊຸກຍູ້ການເຄື່ອນໄຫວຂະບວນການຈັດຕັ້ງປະຕິບັດຂໍ້ແຂ່ງຂັນ 3 ດີຂອງສະຫະພັນແມ່ຍິງໃຫ້ເປັນຂະບວນຟົດຟື້ນກວ່າເກົ່າ,

ຄະນະສະຫະພັນແມ່ຍິງຕ້ອງເພີ່ມທະວີຄວາມເອົາໃຈໃສ່ໃນການຕິດຕາມກວດກາ ແລະ ຊຸກຍູ້ຂະບວນດັ່ງກ່າວ, ສະມາຊິກສະຫະ ພັນແມ່ຍິງທຸກຄົນຕ້ອງເປັນເຈົ້າການປະກອບສ່ວນເຂົ້າໃນການຈັດຕັ້ງປະຕິບັດຂໍ້ແຂ່ງຂັນ 3 ດີຢ່າງຕັ້ງໜ້າ. ການຈັດຕັ້ງປະຕິບັດຂໍ້ແຂ່ງຂັນ 3 ດີ ຄື:ເປັນພົນລະເມືອງດີ, ພັດທະນາດີ ແລະ ສ້າງຄອບຄົວດີມີຄວາມຜາສຸກ , ສະຫະພັນແມ່ຍິງທັງໝົດ ໃນ 22 ໜວ່ຍບ້ານ,

ຜ່ານການສະຫລຸບ, ປະເມີນຜົນງານ ແລະ ຄັດເລືອກປະເພດດີເດັ່ນໃນການຈັດຕັ້ງປະຕິບັດຂໍ້ແຂ່ງຂັນ 3 ດີຄັ້ງທີ 2,3 ສະໄໝທີ 7 ສາມາດປະເມີນພົນລະເມືອງດີໄດ້ 2,792 ຄົນ, ພັດທະນາດີ 2,646 ຄົນ, ສ້າງຄອບຄົວມີຄວາມຜາສຸກ 2,792 ຄົນ, ແລະ ໄດ້ຢັ້ງຢືນສະມະຊິກສະຫະພັນແມ່ຍິງ 3 ດີທັງໝົດໄດ້ 2,631 ຄົນ, ໃນນັ້ນປະເພດ 1 ມີ 1,923 ຄົນ, ປະເພດ 2 ໄດ້ 708 ຄົນ.

ໃຫ້ກຽດຂຶ້ນມອບໃບຢັ້ງຢືນ ໜ່ວຍສະຫະພັນແມ່ຍິງທັງ 22 ໜ່ວຍບ້ານເປັນໜ່ວຍສະຫະພັນແມ່ຍິງ 3 ດີໂດຍ ທ່ານ ຄຳຜ່ອງ ດວງວິໄລ ກຳມະການພັກແຂວງ,ເລຂາພັກເມືອງເຈົ້າເມືອງໆວັງວຽງ ແລະ ກ່າວຮັບໂດຍປະທານສະຫະພັນແມ່ຍິງທັງ 22 ໜ່ວຍບ້ານ, ຫລັງຈາກນັ້ນກໍ່ໄດ້ ພ້ອມກັບຈັບມືກັນແຂ່ງຂັນຮັບເອົາຂໍ້ແຂ່ງຂັນ 3 ດີ .

ໃນຕອນທ້າຍພີທີ ທ່ານ ຄຳຜ່ອງ ດວງວິໄລ ເຈົ້າເມືອງໆວັງວຽງໄດ້ໃຫ້ກຽດຂຶ້ນໂອ້ລົມ ແລະ ໃຫ້ທິດຊີ້ນຳ ໂດຍທ່ານໄດ້ເນັ້ນໜັກໃຫ້ເອື້ອຍນ້ອງແມ່ຍິງຈົ່ງພ້ອມກັນຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີຂອງສະຫະພັນແມ່ຍິງລາວໃຫ້ປະກົດຜົນເປັນຈິງ ແລະ ພ້ອມກັນເຕົ້າໂຮມຄວາມສາມັກຄີແມ່ຍິ່ງພາຍໃນບ້ານພ້ອມກັນຮັກສາມູນເຊື້ອດຸໝັ່ນຂະຫຍັນພຽນໃຫ້ມີຄວາມສາມັກຄີຊ່ວຍເຫຼືອເຊີ່ງກັນ ແລະ ກັນ,ຈົ່ງພ້ອມກັນຮັກສາຂະນົບທຳນຽມຮີດຄອງປະເພນີວັດທະນະທຳອັນດີງາມທີ່ເປັນເອກະລັກຂອງແມ່ຍິງລາວໄວ້ໃຫ້ຢືນຢົງຕະຫຼອດໄປ.

ຂ່າວ: ໝອນແກ້ວ 55578747

Leave a Reply

Your email address will not be published. Required fields are marked *