ທີມງານອາສາສະໝັກມອບຄວາມສຸກ ມອບເຄື່ອງຊ່ວຍເຫຼືອ ໃຫ້ແກ່ 3 ໂຮງຮຽນຂອງເມືອງກາສີ ລວມມູນຄ່າຫຼາຍກວ່າ 50 ລ້ານກີບ

ໃນລະຫວ່າງວັນທີ 2 ຫາ 3 ພະຈິກ 2018 ນີ້, ທີມງານອາສາສະໝັກມອບຄວາມສຸກ ໄດ້ນຳ ເອົາເຄື່ອງກິລາ – ຊຸດຄູ, ອຸປະກອນການຮຽນ ແລະ ອຸປະກອນກິລາ ມາມອບໃຫ້ແກ່ 3 ໂຮງຮຽນຂອງເມືອງກາສີ ແຂວງວຽງຈັນກໍ່ຄື: ໂຮງຮຽນ ມສ ກາສີ ແລະ ໂຮງຮຽນ ມສ ປຸ່ງຫຼັກ ໄດ້ມອບບານເຕະ 10 ໜ່ວຍ, ບານສົ່ງ 10 ໜ່ວຍ, ກະຕໍ້ 20 ໜ່ວຍ, ບານບ້ວງ 2 ໜ່ວຍ, ຕາໜ່າງເຕະບານ 2 ອັນ, ຕາໜ່າງບານສົ່ງ 2 ອັນ, ຕາໜ່າງກະຕໍ້ 4 ອັນ, ຖົງມືນັກຮັບ 2 ຄູ່, ເຄື່ອງກິລາ 21 ຊຸດ, ປື້ມຂຽນ 300 ຫົວ, ບິກ 1,000 ກ້ານ, ສໍດຳ 1,000 ກ້ານ, ບັນທັດ 1,000 ອັນ, ໂຮງແຫຼມສໍ 1,000 ອັນ, ກາລະເຟີ 30 ອັນ, ລູກກາລະເຟີ 10 ກັບ, ແນວເຈາະເຈ້ຍ 6 ອັນ ລວມມູນຄ່າ 10.000.000 ກີບ ( ສິບລ້ານກີບ ),

ສຳລັບໂຮງຮຽນປະຖົມ ບ້ານຫ້ວຍຕັ້ງນາຍ ອຸປະກອນທີ່ນຳມາມອບ ປະກອບມີ: ກະດານ 5 ແຜ່ນ, ເຟີດ 20 ກັບ, ປື້້ມຂຽນ 1,200 ຫົວ, ບິກ 1,200 ກ້ານ, ສໍດຳ 1,200 ກ້ານ, ໂຮງແຫຼມສໍ 1,200 ອັນ, ບານເຕະ 3 ໜ່ວຍ, ກະຕໍ້ 5 ໜ່ວຍ, ຕາໜ່າງດອກປີກໄກ່ 5 ອັນ, ໄມ້ຕີດອກ 10 ຄູ່, ດອກປີກໄກ່ 10 ບັ້ງ, ເຄື່ອງນຸ່ງຊຸດຄູ 12 ຊຸດ, ຢາທາກັນຍຸງ 10 ກັບ ນອກຈາກນີ້ກໍ່ຍັງມີເຂົ້າໜົມ ແລະ ເຂົ້າຈີ່ຈຳນວນໜື່ງ ລວມມູນຄ່າ 10.300.000 ກີບ ( ສິບສາມລ້ານກີບ ).

ສຳລັບແຫຼ່ງທືນທີ່ນຳມາຊື້ອຸປະກອນຊ່ວຍເຫຼືອໃນຄັ້ງນີ້ແມ່ນໄດ້ມາຈາກການບໍລິຈາກຂອງສັງຄົມຜ່ານ BCEL One Heart ( ຫົວໃຈດຽວກັນ ) ຈຳນວນ 13.500.000 ກີບ, ໄດ້ຈາກທີມງານອາສາສະມັກມອບຄວາມສຸກ ຈຳນວນ 6.800.000 ກີບ ລວມມູນຄ່າການຊ່ວຍເຫຼືອທັງໝົດແມ່ນ 20.300.000 ກີບ ( ຊາວລ້ານສາມແສນກີບ ).

ເຊີ່ງໃຫ້ກຽດກ່າວມອບໂດຍ ແມ່ນ ທ່ານ ອິນປັນ ອົ້ນແສງມະນີ ຕາງໜ້າໃຫ້ແກ່ທີມງານອາສາສະໝັກມອບຄວາມສຸກ ແລະ ກ່າວຮັບໂດຍແມ່ນທ່ານຜູ້ອຳນວຍການ ໂຮງຮຽນ ທັງ 3 ໂຮງຮຽນໂດຍຊ່ອງໜ້າກັບ ຕາງໜ້າອຳນາດການປົກຄອງເມືອງ, ຕາງໜ້າຫ້ອງການສຶກສາ ແລະ ກິລາເມືອງ, ຕາງໜ້າທະນາຄານການຄ້າຕ່າງປະເທດລາວໜ່ວຍບໍລິການເມືອງວັງວຽງ ແລະ ເມືອງກາສີ, ຕາງໜ້າສະມາຄົມອາສາກູ້ໄພນະຄອນຫຼວງວຽງຈັນ 1624, ນາຍບ້ານ, ຄູ-ອາຈານ ພ້ອມດ້ວຍນ້ອງນ້ອຍນັກຮຽນເຂົ້າຮ່ວມເປັນສັກຂີພິຍານ

ແລະ ເພື່ອເປັນການສະແດງຄວາມຮູ້ບຸນຄຸນທາງໂຮງຮຽນ ມ.ສ ກາສີ ກໍ່ໄດ້ມອບໃບຊົມເຊີຍ ໃຫ້ແກ່ທາງທີມງານ ອາສາສະໝັກມອບຄວາມສຸກ ໄວ້ເປັນທີລະນຶກອີກດ້ວຍ.

ຫຼັງຈາກນັ້ນ ທ່ານຜູ້ອຳນວຍການ ທັງ 3 ໂຮງຮຽນກໍ່ໄດ້ກ່າວສະແດງ ຄວາມຮູ້ບຸນຄຸນ ແລະ ຂອບອົກຂອບໃຈມາຍັງທີມງານອາສາສະໝັກມອບຄວາມສຸກ ທີ່ມີນ້ຳຈິດນ້ຳໃຈເອື້ອເຟື້ອເພື່ອແຜ່ ໃຫ້ການຊຸກຍູ້ຊ່ວຍເຫຼືອການຮຽນ – ການສອນໃຫ້ແກ່ທາງ ໂຮງຮຽນ ແລະ ຂໍໃຫ້ຄຳໝັ້ນສັນຍາ ວ່າຈະນຳເອົາເຄື່ອງຊ່ວຍເຫຼືອໃນຄັ້ງນີ້ໄປແຈກຢາຍໃຫ້ແກ່ນ້ອງນ້ອຍ ນັກຮຽນໃຫ້ໄດ້ ຮັບກັນຢ່າງທົ່ວເຖິງກັນ, ຈະພ້ອມກັນປົກປັກຮັກສາ ແລະ ນຳໃຊ້ໃຫ້ເກີດຜົນປະໂຫຍດອັນສູງສຸດ.

ການຊ່ວຍເຫຼືອໃນຄັ້ງນີ້ກໍ່ຖືວ່າເປັນຄັ້ງທີ 2 ແລ້ວຫວັງຢ່າງຍິ່ງວ່າການຊ່ວຍເຫຼືອໃນຄັ້ງນີ້ຈະບໍ່ເປັນຄັ້ງສຸດທ້າຍ ແລະ ກໍ່ຂໍໃຫ້ທາງທີມງານອາສາສະ ໝັກມອບຄວາມສຸກນີ້ໃຫ້ການຊ່ວຍເຫຼືອໂຮງຮຽນຂອງພວກເຮົາໃນຕໍ່ໜ້າຕື່ມອີກ.

ຂ່າວ: ເມືອງກາສີ

Leave a Reply

Your email address will not be published. Required fields are marked *