ປກສ ແຂວງວຽງຈັນ ເປີດກອງປະຊຸມຝຶກອົບຮົມທິດສະດີການເມືອງ ແລ ະການປົກຄອງໄລຍະສັ້ນ 45 ວັນ ຊຸດທີ I

ໃນວັນທີ 29 ຕຸລາ 2018 ຜ່ານມານີ້ ປກສ ແຂວງວຽງຈັນ ໄດ້ເປີດກອງປະຊຸມຝຶກອົບຮົມທິດສະດີການເມືອງ ແລະ ການປົກຄອງໄລຍະສັ້ນ 45 ວັນ ຊຸດທີ I ຂື້ນ ຢູ່ທີ່ສະໂມສອນກອງບັນຊາການ ປກສ ແຂວງ

ໂດຍການເຂົ້າຮ່ວມເປັນປະທານຂອງທ່ານ ບຸນສອນ ເພັດລາວັນ ຮອງເຈົ້າແຂວງໆວຽງຈັນ, ທ່ານ ພັອ ປອ ທອງເຄນ ບຸນໝັ້ນ ຫົວໜ້າກອງບັນຊາການ ປກສ ແຂວງ, ທ່ານ ສົມຄິດ ອິນທະວົງ ຫົວໜ້າໂຮງຮຽນການເມືອງ ແລະ ການປົກຄອງ, ແຂກທີ່ຖືກເຊີນ ຄະນະຮັບຜິດຊອບ, ຄູອາຈານ ພ້ອມດ້ວຍນັກສໍາມະນາກອນພາຍໃນກອງບັນຊາການ ປກສ ແຂວງ ເຂົ້າຮ່ວມ.

ທ່ານ ພັທ ຄຳສິງ ຮົ່ມດວງໄຊ ຫົວໜ້າຫ້ອງການເມືອງ ປກສ ແຂວງ ຂຶ້ນຜ່ານຂໍ້ຕົກລົງຂອງທ່ານເຈົ້າແຂວງສະບັບເລກທີ 960/ຈຂ.ວຈ ລົງວັນທີ 03 ຕຸລາ 2018 ວ່າດ້ວຍການອະນຸມັດໃຫ້ພະນັກງານຫຼັກແຫຼ່ງຂອງກອງບັນຊາການ ປກສ ແຂວງວຽງຈັນເຂົ້າຝຶກອົບຮົມທິດສະດີການເມືອງ ແລະ ການປົກຄອງ,

ຂໍ້ຕົກລົງຂອງທ່ານເຈົ້າແຂວງໆວຽງຈັນ ສະບັບເລກທີ 1044/ ຈຂ.ວຈ ລົງວັນທີ 22 ຕຸລາ 2018 ວ່າດ້ວຍ ການອະນຸມັດໃຫ້ໂຮງຮຽນການເມືອງ ແລະ ການປົກຄອງ ແຂວງວຽງຈັນ ເປີດຮຽນທິດສະດີການເມືອງ ແລະ ການປົກຄອງ ໄລຍະສັ້ນ( 45 ວັນ ) ຊຸດທີ I ປະຈຳປີ 2018, ພ້ອມທັງຮັບຟັງການຂຶ້ນຜ່ານແຜນການທິດສະດີການເມືອງ ແລະ ການປົກຄອງໄລຍະສັ້ນ 45 ວັນ ຊຸດທີ I

ຈຸດປະສົງໃນການເປີດກອງປະຊຸດຝຶກອົບຮົມຄັ້ງນີ ກໍ່ເພື່ອເປັນການຍົກລະດັບຄວາມຮູ້, ຄວາມສາມາດທາງດ້ານທິດສະດີການເມືອງ ແລະ ການປົກຄອງ, ແນວທາງແຜນນະໂຍບາຍຂອງພັກ, ການຄຸ້ມຄອງລັດ, ເຮັດໃຫ້ພະນັກງານ-ນັກຮົບ ມີແນວຄິດທັດສະນະຫຼັກໝັ້ນຂອງຊົນຊັ້ນກຳມະກອນ, ມີແນວຄິດເຊື່ອໝັ້ນຕໍ່ການນຳພາຂອງພັກ, ມີຄວາມຈົງຮັກພັກດີຕໍ່ປະເທດຊາດ, ມີຄວາມຫ້າວຫັນເປັນແບບຢ່າງ ໃນທຸກວຽກງານເຮັດໃຫ້ການປະຕິບັດໜ້າທີ່ວຽກງານ ນັບມື້ນັບມີຄຸນນະພາບສູງຂຶ້ນ,

້ສ້າງພະນັກງານໃຫ້ມີຄຸນທາດການເມືອງຢ່າງໜັກແໜ້ນ, ມີຄວາມຮູ້ຄວາມສາມາດໃນການນຳພາ, ຄຸ້ມຄອງ ແລະ ຈັດຕັ້ງປະຕິບັດແນວທາງນະໂຍບາຍຂອງພັກໃຫ້ເກີດດອກອອກຜົນຢ່າງແທ້ຈິງ, ມີຄວາມໜັກແໜ້ນ ແລະໝັ້ນຄົງ, ສືບຕໍ່ພາລະກິດປົກປັກຮັກສາ ແລະສ້າງສາພັດທະນາປະເທດຊາດ ໃຫ້ຈະເລີນກ້າວໜ້າ,

ໃນນີ້ມີນັກສໍາມະນາກອນທັງໜົດ 70 ຄົນ ຍິງ 8 ຄົນ, ຈະໄດ້ຄົ້ນຄວ້າວິຊາຮຽນ 5 ວິຊາ ຄື ພາກວິຊາປັດຊະຍາມາກ-ເລນິນ, ພາກວິຊາເສດຖະສາດການເມືອງ-ເລນິນ, ພາກວິຊາລັດທິສັງຄົມນິຍົມວິທະຍາສາດ, ກຸ່ມວິຊາບໍລິຫານສາດ ແລະ ວິຊາກໍ່ສ້າງພັກ ລວມຊົ່ວໂມງເຂົ້າຝຶກອົບຮົມທັງໝົດ 315 ຊົ່ວໂມງ.

ໃນຕອນທ້າຍກອງປະຊຸມ ທ່ານ ບຸນສອນ ເພັດລາວັນ ຮອງເຈົ້າແຂວງໆ ວຽງຈັນ ມີຄຳເຫັນໂອ້ລົມຕໍ່ຄູອາຈານ ແລະ ນັກສຳມະນາກອນທຸກສະຫາຍຢ່າງມີເນື້ອໃນເລິກເຊິ່ງ ພ້ອມທັງຮຽກຮ້ອງໃຫ້ຄູອາຈານ ຕ້ອງເອົາໃຈໃສ່ໃນການຄົ້ນຄວ້າປຶກສາຫາລື, ແຕ່ງບົດສອນ, ອະທິບາຍຂໍ້ຂ້ອງໃຈ ໃຫ້ມີຄວາມກະຈ່າງແຈ້ງ

ທັງຖ່າຍຖອດຄວາມຮູ້ດ້ານທິດສະດີ ແລະ ຍົກບັນຫາຕົວຈິງຂຶ້ນມາອະທິບາຍຄຽງຄູ່ກັບທິດສະດີການເມືອງ ແລະ ການປົກຄອງ ໄປພ້ອມໆກັນ ສຳລັບນັກສຳມະນາກອນຕ້ອງໄດ້ເອົາໃຈໃສ່ຄົ້ນຄວ້າຮໍ່າຮຽນ ຈົດກ່າຍເອົາຄຳອະທິບາຍຂອງຄູອາຈານ ເພື່ອຄວາມກະຈ່າງແຈ້ງ ແລະ ລະອຽດຊັດເຈນຂື້ນຕື່ມ

ພ້ອມນັ້ນກໍ່ຕ້ອງປະຕິບັດໂມງຂຶ້ນຫ້ອງລົງຫ້ອງໃຫ້ເຂັ້ມງວດ ເພື່ອຍາດແຍ່ງເອົາຄວາມຮູ້, ຄວາມສາມາດດ້ານທິດສະດີການເມືອງ ແລະ ການປົກຄອງ, ມີຄວາມເຂົ້າໃຈຕໍ່ກັບທິດສະດີການເມືອງ ແລະ ການປົກຄອງຢ່າງເລິກເຊິ່ງ ເຮັດໃຫ້ການຝຶກອົບຮົມໃນຄັ້ງນີ້ມີຄຸນະພາບດີ ແລະ ໄດ້ຮັບຜົນສຳເລັດຢ່າງຈົບງາມ ພາຍຫຼັງສຳເລັດການຝຶກອົບຮົມແລ້ວກໍ່ນຳໄປຈັດຕັ້ງປະຕິບັດ ແລະ ຜັນຂະຫຍາຍເຂົ້າໃນໜ້າທີ່ວຽກງານຢູ່ພາຍໃນກົມກອງຂອງຕົນ ໃຫ້ໄດ້ຮັບຜົນດີ ແລະ ມີປະສິດທິພາບສູງຂື້ນກວ່າເກົ່າ.

ຂ່າວ: ປກສ ແຂວງວຽງຈັນ

Leave a Reply

Your email address will not be published. Required fields are marked *