ເມືອງວັງວຽງສຳເລັດງານບຸນຊ່ວງເຮືອປະເພນີປະຈຳປີ 2018 , ໂດຍມີເຮືອເຂົ້າຮ່ວມຫລາຍກວ່າ 20 ລຳ

ໃນຕອນເຊົ້າຂອງວັນທີ 24 ກັນຍາ 2018 ນີ້, ຢູ່ທີ່ ສາຍນ້ຳຊອງ ເມືອງວັງວຽງແຂວງວຽງຈັນ. ໄດ້ຈັດງານ ບຸນຊ່ວງເຮືອປະຈຳປີ 2018 ເມືອງວັງວຽງ. ໂດຍການເຂົ້າຮ່ວມຂອງການນຳເມືອງວັງວຽງ, ມີບັນດາທ່ານພະນັກງານ, ທະຫານ, ຕຳຫລວດ, ນັກທຸລະກິດ, ພໍ່ຄ້າຊາວຂາຍ ຕະຫຼອດຮອດພໍ່ແມ່ປະຊາຊົນເຂົ້າຮ່ວມ.

ທ່ານ ຄຳໄສ ອິນທຳມະລັດ ເລຂາຄະນະພັກຮາກຖານ ນາຍບ້ານໆຫ້ວຍສະເຫງົ້າ ໄດ້ໃຫ້ກຽດຂື້ນກ່າວເປີດງານບຸນ: ປະເພນີອອກພັນສາປະວໍລະນາ ກໍ່ຄືບຸນຊ່ວງເຮືອປະຈຳປີ ເຊິ່ງເປັນປາງບຸນໃຫຍ່ອັນໜຶ່ງທີ່ນອນຢູ່ໃນຮີດສິບສອງ ຄອງສິບສີ່ ແລະ ເປັນປະເພນີອັນດີງາມຂອງຊາດທີ່ບັນພະບູລຸດເຮົາເຄີຍສືບທອດກັນ ມາຈົນຮອດທຸກມື້ນີ້, ສະນັ້ນເພື່ອເປັນການປົກປັກຮັກສາ ແລະ ເສີມຂະຫຍາຍຮີດຄອງປະເພນີອັນດີງາມນີ້ໄວ້ໃນທຸກໆປີ ຊາວເມືອງວັງວຽງ ຂອງພວກເຮົາກໍ່ບໍ່ໄດ້ປະຮີດໃຫ້ໝອງ, ບໍ່ປະຄອງໃຫ້ເສົ້າ ຈິ່ງໄດ້ຈັດໃຫ້ມີງານບຸນຊ່ວງເຮືອນີ້ຂື້ນ ເພື່ອເປັນການອະນຸລັກຮັກສາມູນເຊື້ອວັດທະນະທຳທີ່ໄດ້ສືບທອດກັນມາແຕ່ບູຮານນະການໄວ້ໃຫ້ຄຽງຄູ່ກັບພວກເຮົາຕະຫຼອດໄປ.

ເຮືອທີ່ນຳມາແຂ່ງຂັນຊ່ວງໃນປີນີ້ ມີທັງໝົດ 28 ລໍາ ແບ່ງອອກເປັນ 2 ປະເພດຄື: ເພດຍິງມີ 9 ລຳ ແລະ ເພດຊາຍ 19 ລຳ

ຜ່ານການແຂ່ງຂັນເຫັນວ່າ:

+ ປະເພດຊາຍທີ 1 ໄດ້ແກ່ ເຮືອຊົມພູນາວາ ໄດ້ຮັບຂັນ 1 ໜ່ວຍ ພ້ອມເງີນສົດຈໍານວນ 2.000.000 ກີບ

+ ທີ 2 ໄດ້ແກ່ ບ້ານທ່າເຮືອໃຕ້ ໄດ້ຮັບຂັນ 1 ໜ່ວຍ ພ້ອມເງີນສົດຈໍານວນ 1.500.000 ກີບ

+ ທີ 3 ໄດ້ແກ່ ກອງພົນທີ 1 ໄດ້ຮັບຂັນ 1 ໜ່ວຍ ພ້ອມເງີນສົດຈໍານວນ 1.000.000 ກີບ.

+ ປະເພດຍິງ ທີ 1 ໄດ້ແກ່ ບ້ານທ່າເຮືອໃຕ້ ໄດ້ຮັບຂັນ 1 ໜ່ວຍ ພ້ອມເງີນສົດຈໍານວນ 2.000.000 ກີບ

+ທີ 2 ໄດ້ແກ່ ບ້ານຫ້ວຍໝໍ້ ໄດ້ຮັບຂັນ 1 ໜ່ວຍ ພ້ອມເງີນສົດຈໍານວນ 1.500.000 ກີບ

+ ທີ 3 ໄດ້ແກ່ ບ້ານຫ້ວຍປາມ້ອມ ໄດ້ຮັບຂັນ 1 ໜ່ວຍ ພ້ອມເງີນສົດຈໍານວນ 1.000.000 ກີບ.

ໃຫ້ກຽດຂຶ້ນມອບລາງວັນໂດຍ ທ່ານ ບຸນຈັນ ມາລາວົງ ຮອງເລຂາພັກເມືອງ ຮອງເຈົ້າເມືອງໆວັງວຽງ, ມີທ່ານ ສຸວຽງທອງ ວົງຈໍາປາ ຄະນະປະຈຳພັກເມືອງ ຮອງເຈົ້າເມືອງໆວັງວຽງ ແລະ ທ່ານ ນາງ ຄໍາຮຸ່ງ ທິບພະວັນ ຄະນະປະຈຳພັກເມືອງ ປະທານກວດກາພັກ-ລັດເມືອງ.

Leave a Reply

Your email address will not be published. Required fields are marked *