ພິທີເປີດຂະບວນການແຂ່ງຂັນ 5 ເປັນເຈົ້າຂອງ ກຳມະບານຮາກຖານໂຮງຮຽນການເມືອງ ແລະ ການປົກຄອງແຂວງວຽງຈັນ.

ເພື່ອປະຕິບັດຕາມທິດຊີ້ນຳຂອງຂັ້ນເທິງ ໂດຍສະເພາະແມ່ນ ສູນກາງສະຫະພັນກຳມະບານລາວວາງອອກ ກ່ຽວກັບວຽກງານການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ. ໃນວັນທີ 25 / 10 / 2018 ຜ່ານມານີ້, ກຳມະບານຮາກຖານໂຮງຮຽນການເມືອງ ແລະ ການປົກຄອງແຂວງວຽງຈັນ ໄດ້ຈັດພິທີເປີດຂະບວນການແຂ່ງຂັນ 5 ເປັນເຈົ້າຂື້ນ ຢູ່ທີ່ຫ້ອງປະຊຸມຂອງໂຮງຮຽນດັ່ງກ່າວ,

ໂດຍການເປັນປະທານຂອງ ທ່ານ ພອນທິບ ຈອມມະນີວົງ ຮອງປະທານກຳມະບານຮາກຖານໂຮງຮຽນການເມືອງ ແລະ ການປົກຄອງແຂວງວຽງຈັນ ໃຫ້ກຽດເຂົ້າຮ່ວມໂດຍ ທ່ານ ສົມຄິດ ອີນທະວົງ ເລຂາໜ່ວຍພັກ ອຳນວຍການໂຮງຮຽນການເມືອງ ແລະ ການປົກຄອງ ແຂວງວຽງຈັນ ແລະ ທ່ານ ຈັນສະໝອນ ຈັນທາທອນ ຮອງປະທານສະຫະພັນກຳມະບານແຂວງວຽງຈັນ, ມີບັນດາຄູອາຈານ, ສະມາຊິກກຳມະບານ ແລະ ນັກຮຽນ ເຂົ້າຮ່ວມທັງໝົດ 85 ສະຫາຍ, ຍິງ 32 ສະຫາຍ.

ທ່ານ ພອນທິບ ຈອມມະນີວົງ ຮອງປະທານກຳມະບານຮາກຖານໂຮງຮຽນການເມືອງ ແລະ ການປົກຄອງແຂວງວຽງຈັນ ໃຫ້ກຽດຂື້ນຜ່ານບົດສະຫລຸບປະເມີນຜົນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ປະຈຳປີ 2017 – 2018 ແລະ ທິດທາງແຜນການປະຈຳປີ 2019 ຂອງກຳມະບານຮາກຖານໂຮງຮຽນການເມືອງ ແລະ ການປົກຄອງແຂວງວຽງຈັນ,

ມີພະນັກງານຄູທີ່ເປັນສະມາຊິກກຳມະບານທັງໝົດຈຳນວນ 26 ສະຫາຍ, ຍິງ 12 ສະຫາຍ, ມີຄະນະກໍາມະບານຮາກຖານ 02 ສະຫາຍ, ຍິງ 0 ສະຫາຍ. ຜ່ານການສະຫລຸບຕີລາຄາປະເມີນຜົນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ຂອງກໍາມະບານຮາກຖານດັ່ງກ່າວ ສາມາດຕີລາຄາໄດ້ຄື:

( 1 ) ເປັນເຈົ້າໂຄສະນາສຶກສາອົບຮົມການເມືອງ – ແນວຄິດ ສາມາດປະຕິບັດໄດ້ 89%.

( 2 ) ເປັນເຈົ້າໃນການປັບປຸງແບບແຜນການນຳພາ ແລະ ຂະຫຍາຍການຈັດຕັ້ງກຳມະບານ ສາມາດປະຕິບັດໄດ້ 90 %

( 3 ) ເປັນເຈົ້າປົກປ້ອງສິດຜົນປະໂຫຍດອັນຊອບທຳຂອງພະນັກງານສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານ ສາມາດປະຕິບັດໄດ້ 88 %.

( 4 ) ເປັນເຈົ້າຮ່ວມມືຕິດຕາມ, ກວດກາ, ຄຸ້ມຄອງລັດ, ຄຸ້ມຄອງເສດຖະກິດ ແລະ ວັດທະນະທຳ – ສັງຄົມ ສາມາດປະຕິບັດໄດ້ 89 %.

( 5 ) ເປັນເຈົ້າການຈັດຕັ້ງປະຕິບັດແນວທາງການຕ່າງປະເທດຂອງພັກ, ລະບຽບກົດໝາຍຂອງລັດ ສາມາດປະຕິບັດໄດ້ 89 %,

ຈາກນັ້ນໄດ້ມີການວາງແຜນການເຄື່ອນໄຫວວຽກງານ ການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ຕິດພັນກັບແຜນການ, ແຜນງານວຽກງານວິຊາສະເພາະຂອງໂຮງຮຽນ, ຕິດພັນກັບຂໍ້ແຂ່ງຂັນຮັກຊາດ ແລະ ພັດທະນາ ໃຫ້ນັບມື້ນັບປະກົດຜົນເປັນຈິງ.

ຕອນທ້າຍຂອງພິທີດັ່ງກ່າວ, ຍັງໄດ້ຮັບຟັງການໂອ້ລົມ ຂອງທ່ານ ສົມຄິດ ອິນທະວົງ ເລຂາໜ່ວຍພັກ ອຳນວຍການໂຮງຮຽນການເມືອງ ແລະ ການປົກຄອງແຂວງວຽງຈັນ, ທ່ານໄດ້ກ່າວຍ້ອງຍໍຊົມເຊີຍຕໍ່ຜົນງານທີ່ຍາດມາໄດ້ໃນໄລຍະຜ່ານມາ ທິ່ໄດ້ພ້ອມກັນຈັດຕັ້ງປະຕິບັດ, ຍາດໄດ້ໄຊຊະນະກໍ່ຄື ຜົນສຳເລັດໃນດ້ານຕ່າງໆ ຂອງກໍາມະບານຮາກຖານ;

ທ່ານຍັງໄດ້ເນັ້ນໜັກ, ໃຫ້ຄະນະ ແລະ ສະມາຊີກ ກໍາມະບານຮາກຖານ ຈົ່ງເພີ່ມທະວີການສືກສາອົບຮົມວຽກງານການເມືອງ – ແນວຄິດ, ຕິດພັນກັບຄວາມສາມັກຄີພາຍໃນໃຫ້ໜັກແໜ້ນເຂັ້ມແຂງ, ພ້ອມກັນຕັ້ງໜ້າສ້າງຜົນງານໂດຍຕິດພັນກັບຂະບວນການຂໍ້ແຂ່ງຂັນ 5 ເປັນເຈົ້າ ໃຫ້ມີປະສິທິພາບສູງຂື້ນເປັນກ້າວໆ.

ຂ່າວ: ໄຊປັນຍາ

Leave a Reply

Your email address will not be published. Required fields are marked *