ກອງປະຊຸມທາບທາມ ແລະ ສ້າງແຜນກຳນົດພະນັກງານນຳພາ-ຄຸ້ມຄອງ ຂອງສະຫະພັນກຳມະບານແຂວງວຽງຈັນ

ອີງຕາມມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ກ່ຽວກັບການປ່ຽນແປງໃຫມ່ວຽກງານພະນັກງານ ແລະ ມະຕິກອງປະຊຸມວຽກງານຈັດຕັ້ງທົ່ວປະເທດ ຄັ້ງທີ X ວ່າດ້ວຍ ວຽກງານສ້າງແຜນກຳນົດພະນັກງານນຳພາ – ຄຸ້ມຄອງ.

ໃນວັນທີ 10 ຕຸລາ 2018 ຜ່ານມາ, ສະຫະພັນກຳມະບານ ແຂວງວຽງຈັນ ໄດ້ເປີດກອງປະຊຸມທາບທາມ ແລະ ສ້າງແຜນກຳນົດຕຳແໜ່ງ ພະນັກງານນຳພາ-ຄຸ້ມຄອງຂຶ້ນ. ຢູ່ທີ່ຫ້ອງປະຊຸມຂອງພະແນກການເງິນ ແຂວງວຽງຈັນ,

ໂດຍການເຂົ້າຮ່ວມຂອງ ທ່ານ ເທບພະໄທ ແກ້ວເຂັມເພັດ ກຳມະການພັກແຂວງ ປະທານສະຫະພັນກຳມະບານແຂວງວຽງຈັນ, ມີ ທ່ານ ຄຳປອງ ຄຳສີດາ ຮອງຄະນະຈັດຕັ້ງແຂວງ ພ້ອມດ້ວຍຄະນະຮັບຜິດຊອບ ບັນດຳເນີນກອງປະຊຸມຂັ້ນແຂວງ, ມີຄະນະປະທານສະຫະພັນກຳມະບານແຂວງ, ບັນດາປະທານສະຫະພັນກຳເມືອງ 11 ຕົວເມືອງ, ແລະ ຫົວໜ້າ, ຮອງຫົວໜ້າຂະແໜງ, ພະນັກງານວິຊາການຂອງສະຫະພັນກຳມະບານ ແຂວງວຽງຈັນ ເຂົ້າຮ່ວມຢ່າງພ້ອມພຽງ.

ໃນກອງປະຊຸມ ທ່ານ ຄຳປອງ ຄຳສີດາ ຮອງຄະນະຈັດຕັ້ງແຂວງວຽງຈັນ ໄດ້ຂຶ້ນຜ່ານມະຕິກົມການເມືອງສູນ ກາງພັກສະບັບເລກທີ 032/ກມສພ,ລົງວັນທີ 3/1/2018 ວ່າດ້ວຍ ວຽກງານສ້າງແຜນກຳນົດພະນັກງານນຳພາ-ຄຸ້ມ ຄອງ ແລະ ບົດແນະນໍາ 292, ພ້ອມທັງມີຄໍາເຫັນແນະນໍາ ໃສ່ກອງປະຊຸມດັ່ງກ່າວ

ບາງຕອນທ່ານໄດ້ຍົກໃຫ້ເຫັນວ່າ: ຈຸດປະສົງການສ້າງແຜນກຳນົດພະນັກງານນໍາພາ – ຄຸ້ມຄອງ ແມ່ນການຄາດຄະເນເປົ້າໝາຍພະນັກງານ ທີ່ຈະຈັດວາງ ເຂົ້າໃນຕຳແໜ່ງນຳພາ-ຄຸ້ມຄອງ ແຕ່ລະຂັ້ນ, ແຕ່ລະຂະແໜງການ, ແນໃສ່ຮັບປະກັນລັກສະນະສືບທອດປ່ຽນແທນຕໍ່ເນື່ອງ ໃນສະເພາະໜ້າ ແລະ ຍາວນານ, ເປັນການກະກຽມບຸກ ຄະລະກອນລັກສະນະເປີດກ້ວາງ ເພື່ອໃຫ້ມີແຫຼ່ງເລືອກເຟັ້ນພະນັກງານນຳພາ-ຄຸ້ມຄອງ ຕອບສະໜອງຄວາມຮຽກຮ້ອງ ຕ້ອງການຂອງບັນດາຕຳແໜ່ງນຳພາ-ຄຸ້ມຄອງແຕ່ລະຂັ້ນ, ແຕ່ລະຂະແໜງການໃນລະບົບການເມືອງ, ເພື່ອຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ການຫັນເປັນປະເທດອຸດສາຫະກຳ ທັນສະໄໝເທື່ອລະກ້າວ, ແນໃສ່ປົກປັກຮັກສາ ແລະ ສ້າງສາ ພັດທະນາປະເທດຊາດຕາມຈຸດໝາຍສັງຄົມນິຍົມ.

ພ້ອມກັນນັ້ນກໍ່ໄດ້ຮັບຟັງການຜ່ານມະຕິກົມການເມືອງສູນກາງພັກສະບັບເລກທີ 030/ກມສພ,ລົງວັນທີ 3/1/2018 ວ່າດ້ວຍມາດຖານຂອງພະນັກງານນຳພາ-ຄຸ້ມຄອງ

ຫຼັງຈາກນັ້ນແຕ່ລະສະຫາຍກໍ່ໄດ້ດຳເນີນທາບທາມໃຫ້ ຄະແນນ ເພື່ອຄົ້ນຄ້ວາຄັດເລືອກເປົ້າໝາຍບຸກຄະລະກອນ ເພື່ອເຂົ້າແຜນກຳນົດພະນັກງານນຳພາ-ຄຸ້ມຄອງ ຂອງສະຫະພັນກຳມະບານແຂວງວຽງຈັນ ກອງປະຊຸມດັ່ງກ່າວໄດ້ດຳເນີນເປັນເວລາ 1 ວັນເຕັມ.

ຂ່າວຍັງໃຫ້ຮູ້ຕື່ມອີກວ່າ: ເພື່ອເປັນການຊຸກຍູ້, ປະກອບສ່ວນເຂົ້າໃນວຽກງານໃຫ້ມີຄວາມສະດວກ ທ່ວງທັນກັບເວລາ ເວົ້າລວມ ເວົ້າສະເພາະ ກໍ່ຄື ວຽກງານກຳມະບານໃຫ້ນັບມື້ນັບກ້າວໜ້າຂຶ້ນເລື້ອຍໆ,

ໃນວັນທີ 11 ຕຸລາ 2018 ຜ່ານມາ, ທ່ານ ເທບພະໄທ ແກ້ວເຂັມເພັດ ປະທານສະຫະພັນກຳມະບານແຂວງວຽງຈັນ ພ້ອມດ້ວຍຄະນະ ແລະ ພະນັກງານຈຳນວນໜຶ່ງ ໄດ້ນຳຄອມພິວເຕີໄປມອບໃຫ້ສະຫະພັນກຳມະບານເມືອງທຸລະຄົມ ຈຳນວນໜຶ່ງຊຸດ ແລະ ເງິນສົດ 1 ລ້ານກີບ,

ລວມມູນຄ່າທັງໝົດແມ່ນ 4.600.000 ກີບ, ນັ້ນກໍ່ເພື່ອເປັນການຊຸກຍູ້ການກະກຽມກອງປະຊຸມ 3 ຂັ້ນຢູ່ບັນດາສະຫະພັນກຳມະບານເມືອງທີ່ຈະໄດ້ໄຂຂຶ້ນໃນຕໍ່ໜ້ານີ້.ວຽງຄຳ ເພັດດາວົງ

Leave a Reply

Your email address will not be published. Required fields are marked *