ກອງປະຊຸມເຜີຍແຜ່ເນື້ອໃນເອກະສານກ່ຽວກັບ ການສຶກສາ-ສຳຫຼວດຄວາມເປັນໄປໄດ້ຂອງໂຄງການພັດທະນາແຫຼ່ງທ່ອງທ່ຽວຢູ່ເຂດເບື້ອງຕາເວັນຕົກຂອງສາຍນ້ຳຊອງ

ໃນຕອນເຊົ້າຂອງວັນທີ 5 ຕຸລາ 2018 ຜ່ານມານີ້, ຢູ່ທີ່ສະໂມສອນ ເມືອງວັງວຽງ ແຂວງວຽງຈັນ, ໄດ້ຈັດກອງປະຊຸມເຜີຍແຜ່ເນື້ອໃນເອກະສານກ່ຽວກັບ ການສຶກສາ-ສຳຫຼວດຄວາມເປັນໄປໄດ້ ຂອງໂຄງການພັດທະນາແຫຼ່ງທ່ອງທ່ຽວ ຢູ່ເຂດເບື້ອງຕາເວັນຕົກຂອງສາຍນ້ຳຊອງ

ໂດຍການເປັນກຽດເຂົ້າຮ່ວມຂອງທ່ານ ບຸນສອນ ເພັດລາວັນ ຄະນະປະຈຳພັກແຂວງ ຮອງເຈົ້າແຂວງໆວຽງຈັນ, ມີທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ມີທ່ານ ບຸນມາ ເພັດລາວົງ ຫົວຫນ້າກົມຄຸ້ມຄອງການທ່ອງທ່ຽວ ກະຊວງຖະແຫຼງຂ່າວ ວັດທະນະທຳແລະທ່ອງທ່ຽວ, ມີທ່ານ ຖັງ ຊິນສວນ ປະທານບໍລິສັດ ພັດທະນາເຂດໃໝ່ວັງວຽງລາວ ຈຳກັດ, ມີບັນດາທ່ານຕາງໜ້າກະຊວງແຜນການ ແລະ ການລົງທືນ, ຫ້ອງວ່າການສຳນັກງານນາຍຍົກ, ຮອງປະທານສະພາແຂວງ, ປະທານແນວລາວສ້າງຊາດແຂວງ, ຫົວຫນ້າພະແນກ, ຫົວຫນ້າຫ້ອງການ, ຄະນະກຳມະການຂັ້ນແຂວງ-ຂັ້ນເມືອງ, ພະນັກງານອາວຸໂສບຳນານ, ອຳນາດການປົກຄອງທັງ 22 ບ້ານ ແລະ ຫົວຫນ່ວຍທຸລະກິດທົ່ວເມືອງເຂົ້າຮ່ວມ.

ໃນກອງປະຊຸມ, ທ່ານ ນາງ ມະນີວັນ ນັນທະວົງ ຮອງຫົວຫນ້າພະແນກຄົ້ນຄວ້າແລະວິໄຈໂຄງການ ກະຊວງແຜນການ ແລະ ການລົງທຶນ ໄດ້ຂຶ້ນຜ່ານເນື້ອໃນ ບົດບັນທຶກຄວາມເຂົ້າໃຈ ( MOU ) ຂອງໂຄງການພັດທະນາແຫຼ່ງທ່ອງທ່ຽວ ຢູ່ເຂດເບື້ອງຕາເວັນຕົກຂອງສາຍນ້ຳຊອງ.

ທ່ານ ຖັງ ຊິນສວນ ປະທານບໍລິສັດ ພັດທະນາເຂດໃໝ່ວັງວຽງລາວ ຈຳກັດ ໄດ້ຂື້ນລາຍງານ ເຈດຈໍານົງ ຂອງໂຄງການພັດທະນາແຫຼ່ງທ່ອງທ່ຽວຢູ່ເບື້ອງຕາເວັນຕົກຂອງສາຍນ້ຳຊອງ, ຜົນປະໂຫຍດທີ່ພາກລັດ ແລະ ຊາວເມືອງວັງວຽງ ຈະໄດ້ຮັບຈາກໂຄງການໃນອານາຄົດ, ໄດ້ຜ່ານແຈ້ງການຂອງກົມນະໂຍບາຍ ກະຊວງ ຊັບພະຍາກອນທໍາມະຊາດ ແລະ ສີ່ງແວດລ້ອມ;

ແຈ້ງການຂອງທ່ານ ເຈົ້າແຂວງໆວຽງຈັນ ສະບັບເລກທີ 20/ຈຂ ວຈ ,ລົງວັນທີ 4/9/2018; ຜ່ານເນື້ອໃນດຳລັດຂອງນາຍົກລັດຖະມົນຕີ ສະບັບເລກທີ 84/ນຍ, ລົງວັນທີ 5/4/2016 ວ່າດ້ວຍການທົດແທນຄ່າເສຍຫາຍ ແລະ ການຈັດສັນຍົກຍ້າຍປະຊາຊົນ ຈາກໂຄງການພັດທະນາ.

ແລະຍັງໄດ້ຮັບຟັງການລາຍງານຫຍໍ້ ກ່ຽວກັບ ຂໍ້ສະດວກ, ຂໍ້ຍຸ້ງຍາກ ຂອງການລົງສຶກສາ-ສຳຫຼວດຄວາມເປັນໄປໄດ້ ຂອງໂຄງການພັດທະນາແຫຼ່ງທ່ອງທ່ຽວຄົບວົງຈອນ ໃນໄລຍະຜ່ານມາ.

ຜ່ານແຜນການລົງເກັບກຳຂໍ້ມູນ ເພື່ອສ້າງບົດປະເມີນຜົນກະທົບດ້ານສິ່ງແວດລ້ອມສັງຄົມ ຂອງໂຄງການພັດທະນາແຫຼ່ງທ່ອງທ່ຽວ ( ບັນດາໜ້າວຽກ ແລະ ຂໍ້ມູນທີ່ຕ້ອງການ ຈາກປະຊາຊົນຈຳນວນ 22 ບ້ານ ); ຜ່ານຂໍ້ຕົກລົງຂອງທ່ານເຈົ້າແຂວງໆວຽງຈັນ ວ່າດ້ວຍການແຕ່ງຕັ້ງຄະນະທີ່ປຶກສາໂຄງການ.

ການປະກອບຄໍາເຫັນ ກ່ຽວກັບ ການມີສ່ວນຮ່ວມກັບ ໂຄງການພັດທະນາແຫຼ່ງທ່ອງທ່ຽວແບບອານຸລັກປະຊາຊົນມີສ່ວນຮ່ວມ.

ຕອນທ້າຍຂອງກອງປະຊຸມ, ທ່ານ ບຸນສອນ ເພັດລາວັນ ຮອງເຈົ້າແຂວງໆວຽງຈັນ ຍັງໄດ້ໃຫ້ກຽດຂື້ນໂອ້ລົມຕື່ມອີກ.

ໂຄງການນີ້ເປັນໂຄງການພັດທະນາຕາມທິດທາງ ແລະ ແຜນພັດທະນາຂອງລັດ ໃນການພັດທະນາໄປຕາມທິດທາງແບບຍືນຍົງ ແລະສີຂຽວ, ຈະບໍ່ມີການຍົກຍ້າຍປະຊາຊົນອອກຈາກເຂດພື້ນທີ່, ຈະເປັນການນຳຜົນປະໂຫຍດໂດຍກົງມາໃຫ້ປະຊາຊົນໃນທ້ອງຖິ່ນ ເຮັດໃຫ້ຊີວິດການເປັນຢູ່ຂອງປະຊາຊົນນັບມື້ດີຂຶ້ນ;

ຈັດຕັ້ງປະຕິບັດຕາມແນວຄວາມຄິດກໍ່ສ້າງທີ່ວ່າ ສ້າງສາບ້ານເມືອງຮ່ວມກັນ, ໄດ້ຮັບການພັດທະນາຮ່ວມກັນ, ລວມໄລຍະການກໍ່ສ້າງປະມານ 15 ປີ, ລວມມູນຄ່າການລົງທຶນທັງໝົດ ປະມານ 5,5 ຕື້ໂດລາສະຫະລັດ, ແບ່ງເປັນ 3 ໄລຍະການກໍ່ສ້າງ, ຫລັງຈາກກໍ່ສ້າງສຳເລັດແລ້ວ, ຈຳນວນນັກທ່ອງທ່ຽວປະຈຳປີຈະມີເຖິງ 5 ລ້ານເທື່ອຄົນຕໍ່ປີ, ລາຍຮັບການທ່ອງທ່ຽວປະຈໍາປີ ສາມາດບັນລຸໄດ້ປະມານ 500 ລ້ານໂດລາສະຫະລັດຕໍ່ປີ.

ສາມາດສ້າງວຽກເຮັດງານທຳໂດຍທາງກົງ ໃຫ້ແກ່ປະຊາຊົນທ້ອງຖິ່ນປະມານ 5.000 ກວ່າຕຳແໜ່ງ, ສ້າງວຽກເຮັດງານທຳໂດຍທາງອ້ອມປະມານ 50.000 ກວ່າຕຳແໜ່ງ. ການສຳເລັດຂອງໂຄງການຈະສົ່ງເສີມໃຫ້ເສດຖະກິດຂອງປະເທດລາວ ໄດ້ຮັບການຂະຫຍາຍຕົວ ແລະ ລາຍຮັບສ່ວຍສາອາກອນເພີ່ມຂຶ້ນ, ຍົກສູງລະດັບການບໍລິການສັງລວມຂອງການທ່ອງທ່ຽວລາວ, ເພີ່ມອິດທິພົນຂອງລາວໃນເວທີສາກົນ, ສ້າງວັງວຽງໃຫ້ກາຍເປັນນາມບັດແຫ່ງການທ່ອງທ່ຽວຂອງລາວ.

Leave a Reply

Your email address will not be published. Required fields are marked *