ຄຊປປລ ແຂວງວຽງຈັນ ສຳເລັດແຜນກຳນົດພະນັກນັກງານນຳພາ-ຄຸ້ມຄອງ

ເພື່ອຈັດຕັ້ງຜັນຂະຫຍາຍມະຕິກົມການເມືອງສູນກາງພັກສະບັບເລກທີ 032/ກມສພ, ລົງວັນທີ 3 ມັງກອນ 2018 ແລະ ບົດແນະນຳຂອງຄະນະຈັດຕັ້ງສູນກາງພັກ ສະບັບເລກທີ 292/ຄຈສພ, ລົງວັນທີ 26 ເມສາ 2018 ວ່າດ້ວຍ ວຽກງານ ສ້າງແຜນກຳນົດພະນັກງານນຳພາ-ຄຸ້ມຄອງໃຫ້ເປັນຮູບປະທຳນັ້ນ

ໃນທ້າຍເດືອນກັນຍາ 2018 ທີ່ຜ່ານມານີ້ ຄະນະຊາວໜຸ່ມ ປະຊາຊົນ ປະຕິວັດລາວ ແຂວງວຽງຈັນ ໄດ້ຈັດກອງປະຊຸມການສ້າງແຜນກຳນົດພະນັກງານນຳພາ ຄຸ້ມຄອງ ຂຶ້ນຢູ່ທີ່ຫ້ອງປະຊຸມ ພະແນກການເງິນ ແຂວງວຽງຈັນ

ໂດຍການເປັນປະທານຮ່ວມຂອງ ສະຫາຍ ທອງຈັນ ພູມີພັນ ກຳມະການສູນກາງຊາວໜຸ່ມ, ຫົວໜ້າກົມຈັດຕັ້ງພັກ-ພະນັກງານກົມຈັດຕັ້ງສູນກາງຊາວໜຸ່ມ, ສະຫາຍ ສົມປະສົງ ສຸວົງຄຳຈັນ ກຳມະການພັກແຂວງ ຫົວໜ້າ ພະແນກພາຍໃນແຂວງວຽງຈັນ, ສະຫາຍ ນາງ ຈັນທະຄອນ ສີອຳພອນ ກຳມະການພັກແຂວງ, ກຳມະການສູນກາງຊາວໜຸ່ມ, ເລຂາ ຄຊປປລ ແຂວງວຽງຈັນ ແລະ ສະຫາຍ ສອນໄຊ ຫຼວງອາໄພ ຮອງເລຂາໜ່ວຍພັກ, ຮອງຫົວໜ້າຄະະຈັດຕັ້ງແຂວງວຽງຈັນ, ມີບັນດາຄະນະຮັບຜິດຊອບຂັ້ນແຂວງ, ເລຂາຊາວໜຸ່ມເມືອງ, ສະມາຊິກພັກ-ພະນັກງານພາຍໃນຄະນະຊາວໜຸ່ມແຂວງວຽງຈັນເຂົ້າຮ່ວມ.

ໃນພິທີ ສະຫາຍ ນາງ ຈັນທະຄອນ ສີອຳພອນ ກຳມະການພັກແຂວງ. ກຳມະການສູນກາງຊາວໜຸ່ມ ເລຂາຄະນະບໍລິຫານງານຊາວໜຸ່ມ ປປລ ແຂວງວຽງຈັນ ໄດ້ໃຫ້ຮູ້ວ່າ ການສ້າງແຜນກຳນົດພະນັກງານນຳພາ, ຄຸ້ມຄອງ ແມ່ນການຄາດຄະເນ ເປົ້າໝາຍຂອງພະນັກງານ ເພື່ອຈັດວາງໃສ່ຕຳແໜ່ງພະນັກງານນຳພາ, ຄຸ້ມຄອງ ແນໃສ່ຮັບປະກັນການສ້າງພະນັກງານສືບທອດ ປ່ຽນແທນໃນລະດັບທີ່ແນ່ນອນ,

ພ້ອມທັງເປັນການກະກຽມບຸກຄະລາກອນເປີດກວ້າງ ແລະ ມີຄຸນນະພາບ ເພື່ອໃຫ້ໄດ້ທາງ ດ້ານຈຳນວນ, ຄຸນນະພາບຂອງພະນັກງານນຳພາ-ຄຸ້ມຄອງ, ການສ້າງແຜນກຳນົດພະນັກງານນຳພາ, ຄຸ້ມຄອງຂອງຄະນະຊາວ ໜຸ່ມ ປປລ ແຂວງວຽງຈັນ ແມ່ນການເລັ່ງທາງໜ້າທີ່ການເມືອງ ເພື່ອກະກຽມໃສ່ກອງປະຊຸມໃຫຍ່ 3 ຂັ້ນຂອງແຂວງ.

ທ່ານ ນາງ ຈັນທະຄອນ ສີອຳໄພ

ກອງປະຊຸມຄັ້ງນີ້ ໄດ້ດຳເນີນມາເປັນເວລາ 2 ວັນເຕັມ ເຊິ່ງແບ່ງອອກເປັນ 2 ຂັ້ນຕອນຄື: ຂັ້ນຕອນທີ 1 ແມ່ນຈັດຕັ້ງ ເຊື່ອມຊຶມມະຕິເລກທີ 032/ກມສພ ວ່າດ້ວຍວຽກງານສ້າງແຜນກຳນົດພະນັກງານນຳພາ, ຄຸ້ມຄອງ, ຄຳແນະນຳເລກທີ 292/ ຄຈສພ ແລະ ມະຕິເລກທີ 030/ກມສພ ວ່າດ້ວຍ ມາດຖານຂອງພະນັກງານນຳພາ, ຄຸ້ມຄອງ, ຂັ້ນຕອນທີ 2 ແມ່ນດຳເນີນ ການທາບທາມ ( ຕາມເປົ້າໝາຍບຸກຄະລາກອນ ),

ຜ່ານການທາບທາມ ກໍ່ສາມາດກຳນົດການສ້າງແຜນພະນັກງານ, ຄຸ້ມຄອງ ຂອງຄະນະຊາວໜຸ່ມ ປປລ ແຂວງວຽງຈັນ ໄດ້ສຳເລັດໂດຍພື້ນຖານ ເພື່ອຮັບຮອງ ແລະ ຕອບສະໜອງໜ້າທີ່ການເມືອງອັນ ຍາວນານ ແລະ ສະເພາະໜ້າ.

ທ່ານ ທອງຈັນ ພູມີພັນ

ໃນຕອນທ້າຍຂອງກອງປະຊຸມ ຍັງໄດ້ຮັບຟັງທິດຊີ້ນຳຈາກ ສະຫາຍ ທອງຈັນ ພູມີພັນ ກຳມະການສູນກາງຊາວໜຸ່ມ, ຫົວໜ້າກົມຈັດຕັ້ງພັກ-ພະນັກງານກົມຈັດຕັ້ງສູນກາງຊາວໜຸ່ມ ອີກດ້ວຍ.

ຂ່າວໂດຍ: ນັກຂ່າວຊາວໜຸ່ມແຂວງວຽງຈັນ

Leave a Reply

Your email address will not be published. Required fields are marked *