ໜ່ວຍຮາກຖານຊາວໜຸ່ມກອງບັນຊາການທະຫານເມືອງວຽງຄຳ ສຳເລັດກອງປະຊຸມໃຫຍ່ ຄັ້ງທີ V

ໃນຕອນເຊົ້າຂອງວັນທີ 3 ຕຸລາ 2018 ທີ່ຜ່ານມານີ້ ໜ່ວຍຮາກຖານຊາວໜຸ່ມກອງບັນຊາການ ປກຊ ເມືອງວຽງ ຄໍາ ໄດ້ເປີດກອງປະຊຸມໃຫຍ່ ໂດຍການເປັນປະທານຂອງ ສະຫາຍ ຮອ ບຸນສວນ ແກ້ວໂກມິນ ເລຂາຊາວໜຸ່ມ ກອງບັນຊາການທະຫານເມືອງ ວຽງຄຳ,

ເປັນກຽດເຂົ້າຮ່ວມມີ ສະຫາຍ ພັທ ຄຳຈັນ ລໍ່ຈົ່ງເຮີ ຮອງເລຂາຄະນະພັກຮາກຖານກອງບັນຊາການ ປກຊ ເມືອງ ວຽງຄຳ, ສະຫາຍ ນາງ ແສງໄຊ ພິລາວົງ ຄະນະບໍລິຫານງານຊາວໜຸ່ມເມືອງວຽງຄຳ, ມີບັນດາຕາງໜ້າອົງການຈັດຕັ້ງມະຫາຊົນ, ເລຂາຊາວໜຸ່ມໂຮງຮຽນ ແລະ ບ້ານອ້ອມຂ້າງພ້ອມດ້ວຍສະມາຊິກເຂົ້າຮ່ວມ.

ໃນກອງປະຊຸມ ສະຫາຍ ຮອ ບຸນສວນ ແກ້ວໂກມິນ ເລຂາຊາວໜຸ່ມ ກອງບັນຊາການທະຫານເມືອງວຽງຄຳໄດ້ຂຶ້ນຜ່ານຮ່າງບົດລາຍງານການເມືອງຕໍ່ກອງປະຊຸມໃຫຍ່ຄັ້ງທີ V ເຊິ່ງສະຫາຍກໍ່ໄດ້ຍົກໃຫ້ເຫັນເຖິງຜົນງານພົ້ນເດັ່ນຫຼາຍດ້ານ

ເປັນຕົ້ນ: ໄດ້ເອົາໃຈໃສ່ຕໍ່ວຽກງານສຶກສາອົບຮົມການເມືອງ, ນຳພາແນວຄິດໃນຖັນແຖວພະນັກງານສະມາຊິກຊາວໜຸ່ມເປັນປະຈຳ ດ້ວຍການຈັດຕັ້ງເຊື່ອມຊຶມແນວທາງນະໂຍບາຍ, ລະບຽບກົດໝາຍ, ນິຕິກຳຕ່າງໆຂອງຂັ້ນເທິງໃຫ້ແກ່ສະມາຊິກໄດ້ຮັບຮູ້ ແລະ ເຊື່ອມຊຶມ ອັນໄດ້ເຮັດໃຫ້ສະມາຊິກມີຄວາມໜັກແໜ້ນດ້ານຄຸນທາດການເມືອງ, ມີເຊື່ອໝັ້ນຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ຮູ້ຈຳແນກໄດ້ມິດ-ສັດຕູຈະແຈ້ງ, ຕັ້ງໜ້າປົກປັກຮັກສາ ແລະ ສ້າງສາພັດທະນາປະເທດຊາດ

ໄປຄູ່ກັນນີ້ ກໍ່ໄດ້ປຸກລະດົມກຳລັງແຮງຂອງຊາວໜຸ່ມ ເຂົ້າຮ່ວມຂະບວນການລວມຂອງຊາດ ກໍ່ຄືຂະບວນການຂອງຊາວໜຸ່ມ ໂດຍສະເພາະຂະບວນການຈັດຕັ້ງປະຕິບັດຂໍ້ແຂ່ງຂັນ 4 ບຸກຂອງຊາວໜຸ່ມ ເຊິ່ງສາມາດຮັບຮອງ ເປັນໜ່ວຍຮາກຖານຊາວໜຸ່ມ 4 ບຸກ ສາມສະໄໝຕິດຕໍ່ກັນ.

ໃນກອງປະຊຸມໄດ້ມີຄວາມເປັນເອກະສັນກັບຮັບຮອງເອົາບົດລາຍງານການເມືອງ ແລະ ທິດທາງແຜນການເຄື່ອນໄຫວໃນ 5 ປີຕໍ່ໜ້າ, ກອງປະຊຸມຄັ້ງນີ້ ໄດ້ມີການປ່ອນບັດເລືອກຕັ້ງເອົາຄະນະບໍລິຫານງານຊາວໜຸ່ມຊຸດໃໝ່ ຈໍານວນ 3 ສະຫາຍ ຄື ສະຫາຍ ພັຕ ໄຊຍະ ສອນ ຈັນທະລາ ເປັນເລຂາ, ສະຫາຍ ຮທ ສົມໃຈ ສີບົວລິພາ ເປັນຮອງເລຂາ ທັງເປັນປະທານກວດກາ ແລະ ສະຫາຍ ຮຕ ຄຳພູ ພົນລະວົງ ເປັນຄະນະ.

ຂ່າວໂດຍ: ນັກຂ່າວຊາວໜຸ່ມແຂວງວຽງຈັນ

Leave a Reply

Your email address will not be published. Required fields are marked *