ເປີດກອງປະຊຸມສົ່ງເສີມການທ່ອງທ່ຽວເຊື່ອມຕໍ່ 4 ເມືອງທົ່ງພຽງຄັ້ງທີ IV

ວຽກງານການທ່ອງທ່ຽວເປັນຂະແໜງເສດຖະກິດໜື່ງ ທີ່ມີການຂະ ຫຍາຍຕົວຢ່າງວ່ອງໄວ ແລະ ກວ້າງຂວາງ ຢູ່ບັນດາເມືອງໃນຂອບເຂດທົ່ວແຂວງ, ໃນຊຸມປີຜ່ານມາການນຳຂອງແຂວງວຽງຈັນ ກໍ່ໄດ້ຖືເອົາການທ່ອງທ່ຽວເປັນຂະແໜງການບູລິມະສິດ ເພື່ອຊຸກຍູ້ – ສົ່ງເສີມເສດຖະກິດຂອງແຂວງໃຫ້ມີການຂະຫຍາຍຕົວ ເປັນຂະແໜງກາານ ທີ່ສາມາດຕອບສະໜອງດ້ານວຽກເຮັດງານທຳ ໃຫ້ແກ່ປະຊາຊົນບັນດາເຜົ່າ ໃນຕົວເມືອງ ແລະ ຊົນນະບົດ.

ພ້ອມດຽວກັນນັ້ນ ກໍ່ເປັນການເປີດກວ້າງການພົວ ພັນຮ່ວມມືກັບພາກພື້ນ ແລະ ສາກົນ ເພື່ອຊຸກຍູ້ເສດຖະກິດ-ສັງຄົມ ໃຫ້ມີການຂະຫຍາຍຕົວຢ່າງຕໍ່ເນື່ອງ ຕາມທິດສົ່ງເສີມການທ່ອງທ່ຽວທາງທຳມະຊາດ, ປະຫວັດສາດ ແລະ ວັດທະນະທຳ.

 

ໃນຕອນເຊົ້າວັນທີ 10 ຕຸລາ 2018 ນີ້ ທີ່ຫ້ອງປະຊຸມຫ້ອງວ່າການປົກຄອງເມືອງວຽງຄຳ ໄດ້ເປີດກອງປະຊຸມ ສົ່ງເສີມການທ່ອງທ່ຽວເຊື່ອມຕໍ່ 4 ເມືອງທົ່ງພຽງ ຄັ້ງທີ IV  ຂື້ນ, ໂດຍພາຍໃຕ້ການເປັນປະທານຂອງ ທ່ານ ຄຳຟອງບົວທອງ ຫົວໜ້າພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງ, ໃຫ້ກຽດເຂົ້າຮ່ວມ ທ່ານ ວິໄລທອງ ສີຊານົນ ຫົວຫນ້າສະຖາບັນສື່ມວນຊົນ, ວັດທະນະທຳ ແລະ ທ່ອງທ່ຽວ, ທ່ານ ພອນແກ້ວ ຂຸນພົນ ເຈົ້າເມືອງໆວຽງຄຳ, ມີບັນດາຮອງເຈົ້າເມືອງ, ຫົວໜ້າຂະແໜງ ແລະ ວິຊາການທ່ອງທ່ຽວເຂົ້າຮ່ວມ.​

ກອງປະຊຸມໄດ້ຄົ້ນຄ້ວາ ປະກອບຄຳຄິດ-ຄຳເຫັນ ໃສ່ບາງເນື້ອໃນຄື : ການຈັດ​ຕັ້ງ​ຜັນ​ຂະຫຍາຍ ​ແຜນ​ຍຸດ​ທະ​ສາດ​ພັດທະນາ ​ແລະ ສົ່ງ​ເສີມ​ການທ່ອງທ່ຽວ​ຂອງ​ແຂວງ​ ວຽງ​ຈັນ​ ແຕ່​ນີ້​ເຖີງປີ 2020, ການໂຄສະນາ ແລະ ສົ່ງເສີມການທ່ອງທ່ຽວຂອງແຂວງວຽງຈັນ ແລະ ຊຸກຍູ້ສົ່ງເສີມ ການທ່ອງທ່ຽວ 4 ​ເມືອງ​ທົ່ງພຽງ ໃຫ້​ກາຍ​ເປັນ​ວົງ​ແຫວນ ​ການທ່ອງທ່ຽວ​ເຊື່ອມ​ຕໍ່ທາງທຳມະຊາດ, ປະຫັວດສາດ ແລະ ວັດທະນະທຳ.

ພ້ອມນັ້ນ ກໍຍັງໄດ້ມອບໃຫ້ເມືອງໂພນໂຮງ ເປັນເຈົ້າພາບໃນກອງປະຊຸມຄັ້ງຕໍ່ໄປ.

 

ພາບ ແລະ ຂ່າວ : ພູເງິນ ບົວທອງ

Leave a Reply

Your email address will not be published. Required fields are marked *