ບໍລິສັດ ພັດທະນາເຂດໃໝ່ວັງວຽງລາວຈໍາກັດ ມອບເງິນຊ່ວຍເຫຼືອໄພພິບັດແກ່ແຂວງວຽງຈັນ 500 ກວ່າລ້ານກີບ.

ໃນປີ 2018 ທົ່ວແຂວງວຽງຈັນ ໄດ້ມີການປ່ຽນແປງດີນຟ້າອາກາດຜິດປົກກະຕິ ໄດ້ເກີດມີໄພພິບັດທາງທຳມະຊາດຢ່າງຮ້າຍແຮງ ແລະ ເຮັດໃຫ້ມີຜົນກະທົບຈາກພາຍຸ, ຝົກຕົກໜັກຫຼາຍມື້ຕິດຕໍ່ກັນຈົນມີດິນເຈື່ອນ ແລະ ນ້ຳຖ້ວມຢູ່ຫຼາຍເມືອງ ຂອງແຂວງວຽງຈັນ ເຊັ່ນ: ເມືອງກາສີ, ເມືອງແມດ, ເມືອງວຽງຄໍາ, ເມືອງໂພນໂຮງ ແລະ ເມືອງທຸລະຄົມ.

ສະນັ້ນ ເພື່ອເປັນການຊ່ວຍເຫຼືອ ແລະ ຟື້ນຟູໄພທຳມະຊາດທີ່ເກີດຂື້ນໃນຮອບຫລາຍປີ ທີ່ແຂວງວຽງຈັນ, ຕອນເຊົ້າມື້ນີ້ ( ວັນທີ 11 ຕຸລາ 2018 ) ຢູ່ທີ່ຫ້ອງວ່າການປົກຄອງແຂວງ ວຽງຈັນ ນໍາໂດຍ ທ່ານ ຖັງຊິນຈວນ ປະທານບໍລິສັດ ພັດທະນາເຂດໃໝ່ວັງວຽງ ລາວ ຈຳກັດ ພ້ອມດ້ວຍຄະນະ ໄດ້ມອບເງິນ ຈຳນວນ 2 ລ້ານ ບາດ ( ສະກຸນເງິນໄທ ) ຫຼື 500 ກວ່າລ້ານກີບ ໃຫ້ກັບແຂວງວຽງຈັນ, ໃຫ້ກຽດຮັບໂດຍ ທ່ານ ວິດົງ ໄຊຍະສອນ ເຈົ້າແຂວງໆວຽງຈັນ ໂດຍມີຄະນະໄພພິບັດຂັ້ນແຂວງຮ່ວມເປັນສັກຂີພິຍານ.

ທ່ານ ວິດົງ ໄຊຍະສອນ ເຈົ້າໆແຂວງວຽງຈັນ ໄດ້ຕາງໜ້າໃຫ້ກັບປະຊາຊົນແຂວງວຽງຈັນ ສະແດງຄວາມຂອບໃຈ ແລະ ຮູ້ບຸນຄຸນຢ່າງສູງ ມາຍັງບໍລິສັດ ພັດທະນາເຂດໃໝ່ວັງວຽງ ລາວ ຈຳກັດ ທີ່ໄດ້ມີນໍ້າໃຈ ແລະ ໃຫ້ການຊ່ວຍເຫຼືອຊາວແຂວງວຽງຈັນທີ່ຖືກຜົນກະທົບຈາກໄພທຳມະຊາດຄັ້ງນີ້ ແລະ ຈະນໍາເງິນຊ່ວຍເຫຼືອຄັ້ງນີ້ ເຂົ້າໃນການແກ້ໄຂຜົນກະທົບທີ່ເກີດຂື້ນໃນຄັ້ງນີ້ ຢ່າງມີປະສິດທິຜົນສູງສຸດ.

ພາບ ແລະ ຂ່າວໂດຍ : ພູເງິນ ບົວທອງ ນັກຂ່າວແຂວງວຽງຈັນ.

Leave a Reply

Your email address will not be published. Required fields are marked *