ຄະນະເລຂາທິການສູນກາງພັກ ກອມມູນິດ ສສ ຫວຽດນາມ ລົງຢ້ຽມຢາມ ແລະ ເຮັດວຽກຢູ່ ແຂວງວຽງຈັນ, ສປປ ລາວ.

ວັນທີ 10 ຕຸລາ 2018 ຜ່ານມາ ຄະນະເລຂາທິການສູນກາງພັກ ກອມມູນິດ ສສ ຫວຽດນາມ ລົງຢ້ຽມຢາມ ແລະ ເຮັດວຽກຢູ່ ແຂວງວຽງຈັນ ສປປ ລາວ ເຊິ່ງນຳໂດຍ ສະຫາຍ  ເຈິນ ກັວກ ເວື້ອງ ກຳມະການກົມການເມືອງ ຜູ້ປະຈຳການ ຄະນະເລຂາທິການສູນກາງພັກ ກອມມູນິດ ສສ ຫວຽດນາມ ເປັນກຽດຕ້ອນຮັບ ໂດຍ ສະຫາຍ ວິດົງ  ໄຊຍະສອນ  ກຳມະການສູນກາງພັກ ເລຂາພັກແຂວງ  ເຈົ້າແຂວງໆວຽງຈັນ ພ້ອມດ້ວຍຄະນະ.

ການລົງຢ້ຽມຢາມພົບປະໃນເທື່ອນີ້ກໍເພື່ອເປັນການຮັດແຫນ້ນສາຍພົວພັນສາມັກຄີແບບພິເສດ ລະຫວ່າງ 2 ຊາດ 2 ລັດ ສປປ ລາວ ແລະ ສສ ຫວຽດນາມເວົ້າລວມ ເວົ້າສະເພາະ ແມ່ນສາຍພົວພັນຮ່ວມມືແຮກສ່ຽວລະຫວ່າງ ແຂວງວຽງຈັນ ສປປ ລາວ ແລະ ແຂວງອຽນບ້າຍ, ແຂວງຮາຍເຢືອງ, ຮາຍຟອງ ແລະ ແຂວງ ເຫງະອ່ານ ສສ ຫວຽດນາມ.

ເພື່ອເສີມຂະຫຍາຍ ແລະ ທັງເປັນການສືບຕໍ່ການຈັດຕັ້ງປະຕິບັນດາໂຄງການທີ່ໄດ້ຮັບການຊ່ວຍເຫລືອຈາກ ສສ ຫວຽດນາມ ເປັນຕົ້ນແມ່ນໂຄງການຊ່ວຍເຫລືອທາງດ້ານສຶກສາ ແລະ ສາທາ ທີ່ກຳລັງຈັດຕັ້ງປະຕິບັດຢູ່ ແຂວງວຽງຈັນ ແລະ ທັງເປັນການພົບປະແລກປ່ຽນບົດຮຽນນຳກັນໃນຫລາຍດ້ານເປັນຕົ້ນວຽກງານພັດທະນາເສດຖະກິດ -ສັງຄົມ, ວຽກງານທ່ອງທ່ຽວ, ວຽກງານກະສິກຳ ແລະ ວຽກງານອື່ນໆອີກ.

 

ສະຫາຍ ດາວເຮືອງ  ນັນທະວົງ  ຄະນະປະຈຳພັກແຂວງ  ຮອງເຈົ້າແຂວງໆວຽງຈັນ ໄດ້ຂື້ນຜ່ານ ບົດສະຫລຸບໂດຍຫຍໍ້ໃນການຈັດຕັ້ງປະຕິບັດວຽກງານເປັນຕົ້ນ ວຽກງານການພັດທະນາ ເສດຖະກິດ-ສັງຄົມຂອງແຂວງ, ການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ 10 ຂອງພັກ, ມະຕິກອງປະຊຸມໃຫຍ່ຄັ້ງທີ 5 ຂອງອົງຄະນະພັກແຂວງວຽງຈັນ, ການຈັດຕັ້ງປະຕິບັດວຽກງານກວດກາ, ການຈັດຕັ້ງປະຕິບັດວຽກງານກໍ່ສ້າງ ແລະ ຂະຫຍາຍພັກ  ແລະ ວຽກງານຮ່ວມມື 2 ຝ່າຍ ລະຫວ່າງ ແຂວງວຽງຈັນ ແລະ ແຂວງແຮກສ່ຽວ 4 ແຂວງ ທ້ອງຖິ່ນ ຂອງ ສສ ຫວຽດນາມ.

ໃນຕອນທ້າຍ ສະຫາຍ ເຈິນ ກັວກ ເວື້ອງ ກຳມະການກົມການເມືອງ ຜູ້ປະຈຳການ ຄະນະເລຂາທິການສູນກາງພັກ ກອມມູນິດ ສສ ຫວຽດນາມ ຍັງໄດ້ໂອ້ລົມຕໍ່ການນຳຂອງ ແຂວງວຽງຈັນ ແລະ ຄະນະຜູ້ແທນຈາກ ສສ ຫວຽດນາມ.

ສະຫາຍໄດ້ກ່າວຍ້ອງຍໍ ຕໍ່ຜົນງານໃນການຈັດຕັັ້ງປະຕິບັດວຽກງານການພັດທະນາເສດຖະກິດ – ສັງຄົມ ຂອງແຂວງວຽງຈັນ ທີ່ມີບາດກ້າວຂະຫຍາຍຕົວຢ່າງຕໍເນື່ອງ ໂດຍສະເພາະກໍແມ່ນ ທາງດ້ານພື້ນຖານໂຄງລ່າງ ແລະ ຍັງມີທ່າແຮງບົ່ມຊ້ອນຫລາຍດ້ານທີ່ເຮັດໃຫ້ຈັງຫວະການຂະຫຍາຍຕົວຂອງ G D P ມີການຂະຫຍາຍຕົວເປັນຕົ້ນທາງດ້ານກະສິກຳ, ການທ່ອງທ່ຽວ ແລະ ອື່ນໆ ພ້ອມນີ້ ສະຫາຍ ໄດ້ເນັ້ນຫນັກໃຫ້ເພີ່ມທະວີ ການຮ່ວມມືແບບພິເສດຂອງ 2 ຊາດ ລາວຫວຽດນາມ ໃຫ້ມີຄວາມຫມັ້ນຄົງທະນົງແກ່ນຂື້ນກ່ວາເກົ່າ.

ຂ່າວ : ຄຳຂຽນ ນັກຂ່າວແຂວງວຽງຈັນ

ພາບ : ພູເງິນ ບົວທອງ ນນັກຂ່າວແຂວງວຽງຈັນ

Leave a Reply

Your email address will not be published. Required fields are marked *