ກອງປະຊຸມໃຫຍ່ໜ່ວຍຮາກຖານຊາວໜຸ່ມຄະນະໂຄສະນາອົບຮົມແຂວງ ຄັ້ງທີ II

ກອງປະຊຸມດັ່ງກ່າວ ໄດ້ໄຂຂຶ້ນຢ່າງເປັນທາງການໃນຕອນເຊົ້າຂອງວັນທີ 4 ຕຸລາ 2018 ທີ່ຜ່ານມານີ້ ໂດຍການເປັນປະທານຂອງ ສະຫາຍ ຈັນທະວົງ ບົວລະພັນ ຮອງເລຂາພັກ, ຮອງຫົວໜ້າຄະນະໂຄສະນາອົບຮົມແຂວງ, ເລຂາໜ່ວຍຮາກຖານຊາວໜຸ່ມຄະນະໂຄສະນາອົບຮົມແຂວງວຽງຈັນ,

ໃຫ້ກຽດເຂົ້າຮ່ວມມີ ສະຫາຍ ຈັນແປງ ດວງພະຈັນ ກຳມະການພັກແຂວງ, ເລຂາໜ່ວຍພັກຄະນະໂຄສະນາອົບຮົມແຂວງວຽງຈັນ, ສະຫາຍ ນາງ ຈັນທະຄອນ ສີອຳພອນ ກຳມະການພັກແຂວງ, ກຳມະການສູນກາງຊາວໜຸ່ມ ເລຂາຄະນະບໍລິຫານງານຊາວໜຸ່ມ ປປລ ແຂວງວຽງຈັນ, ມີບັນດາແຂກເຊີນພະແນກການອ້ອມຂ້າງ, ຄະນະຊາວໜຸ່ມ, ສະມາຊິກຊາວໜຸ່ມເຂົ້າຮ່ວມ.

ໃນກອງປະຊຸມ ໄດ້ຮັບຟັງບົດລາຍງານການເມືອງທັງສອງພາກ ເຊິ່ງສະເໜີໂດຍ ສະຫາຍ ຈັນທະວົງ ບົວລະພັນ ຮອງ ເລຂາພັກ, ຮອງຫົວໜ້າຄະນະໂຄສະນາອົບຮົມແຂວງ, ເລຂາໜ່ວຍຮາກຖານຊາວໜຸ່ມຄະນະໂຄສະນາອົບຮົມແຂວງວຽງຈັນ

ໂດຍໄດ້ຍົກໃຫ້ເຫັນຜົນງານທີ່ຍາດມາໄດ້ໄລຍະ 05 ປີ ຜ່ານມາ, ພ້ອມທັງຕີລາຄາຈຸດດີ, ຈຸດອ່ອນ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ທິດທາງແຜນການໃນຊຸມປີຕໍ່ໜ້າ.

ກອງປະຊຸມໄດ້ມີຄວາມເປັນເອກະພາບສູງຕໍ່ບົດລາຍງານການເມືອງທັງສອງພາກ ສິ່ງສຳຄັນ ກອງປະຊຸມໄດ້ເປັນເອກະສັນຮັບຮອງເອົາທິດທາງໜ້າທີ່ລວມ ແລະ ຄາດໝາຍສູ້ຊົນແຕ່ນີ້ ຮອດປີ 2021 ຄື:

ເພີ່ມທະວີເອົາໃຈໃສ່ສຶກສາອົບຮົມການເມືອງ – ແນວຄິດໃຫ້ບັນດາສະມາຊິກຊາວໜຸ່ມ ໃຫ້ມີນ້ຳໃຈຮັກຊາດ ຮັກລະບອບໃໝ່, ເຊື່ອໝັ້ນຕໍ່ການນຳພາຂອງພັກ, ບໍາລຸງສ້າງໃຫ້ສະມາຊິກຊາວໜຸ່ມມີຄຸນສົມບັດສິນທໍາປະຕິວັດ, ມີຄວາມຮູ້ຄວາມສາມາດທາງດ້ານວິທະຍາສາດ-ເຕັກໂນໂລຊີ ແລະ ນະວັດຕະກຳໃໝ່,

ປັບປຸງແກ້ໄຂສ້າງແບບແຜນວິທີເຮັດວຽກ, ວິທີນຳພາໃຫ້ໜັກແໜ້ນເຂັ້ມແຂງ, ສ້າງເງື່ອນໄຂກາລະໂອກາດໃຫ້ຊາວໜຸ່ມໄດ້ສຶກສາຮ່ຳຮຽນ ແລະ ປະກອບສ່ວນສ້າງຂະບວນການຕ່າງໆ ເພື່ອເຕົ້າ ໂຮມຄວາມສາມັກຄີ, ສາມາດປະຕິບັດໄດ້ 2 ໜ້າທີ່ຍຸດທະສາດຂອງພັກ, ສ້າງໃຫ້ໄດ້ສະມາຊິກດີເດັ່ນ, ເປັນແບບຢ່າງໃຫ້ມະ ຫາຊົນ, ເປັນພະນັກງານ ສືບທອດປ່ຽນແທນທີ່ມີຄຸນນະພາບ ແລະ ສ້າງໃຫ້ໄດ້ໜ່ວຍຊາວໜຸ່ມຕົວແບບ, ສູ້ຊົນຍາດໃຫ້ໄດ້ທຸງ ໄຊນາມມະຍົດ 4 ບຸກ.

ກອງປະຊຸມຍັງໄດ້ປ່ອນບັດເລືອກຕັ້ງເອົາຄະນະຊາວໜຸ່ມຊຸດໃໝ່ ຈຳນວນ 3 ສະຫາຍ ຄື ສະຫາຍ ນາງ ດາວວິໄລ ຄຳປັນຍາ ເປັນເລຂາ, ສະຫາຍ ພູຄຳ ກອງແພງຕາ ເປັນຮອງເລຂາ, ສະຫາຍ ນາງ ມະໄລພອນ ພວງຈັນລາ ເປັນຄະນະ, ໃນນັ້ນ ກອງປະຊຸມຍັງໄດ້ເລືອກເອົາສະຫາຍ ພູຄຳ ກອງແພງຕາ ເປັນປະທານກວດກາ ແລະ ສະຫາຍ ນາງ ຈັນທາວະດີ ຊະນະວົງໄຊ ເປັນຜູ້ຊ່ວຍກວດກາ.

ໃນຕອນທ້າຍກອງປະຊຸມ ຍັງໄດ້ຮັບຟັງການໂອ້ລົມຈາກ ສະຫາຍ ນາງ ຈັນທະຄອນ ສີອຳພອນ ກຳມະການພັກແຂວງ, ກຳມະການສູນກາງຊາວໜຸ່ມ ເລຂາຄະນະບໍລິຫານງານຊາວໜຸ່ມ ປປລ ແຂວງວຽງຈັນ ເພື່ອເປັນບ່ອນອີງໃນການເຄື່ອນໄຫວວຽກງານຊາວໜຸ່ມໃນຊຸມປີຕໍ່ໜ້າ.

ຂ່າວໂດຍ: ນັກຂ່າວຊາວໜຸ່ມແຂວງວຽງຈັນ

Leave a Reply

Your email address will not be published. Required fields are marked *