ເມືອງກາສີຈັດກອງປະຊຸມສ້າງແຜນກຳນົດພະນັກງານນຳພາ – ຄຸ້ມຄອງ

ກອງປະຊຸມດັ່ງກ່າວ ໄດ້ເປີດຂື້ນຢ່າງເປັນທາງການໃນວັນທີ 3 ຕຸລາ 2018 ທີ່ຜ່ານມາ ຢູ່ທີ່ສະໂມສອນ ຂອງເມືອງກາສີ ແຂວຽງຈັນ. ໂດຍການເປັນປະທານຂອງ ສະຫາຍ ຄຳສົດ ເພັດລາວັນ ກຳມະການພັກແຂວງ ເລຂາພັກເມືອງເຈົ້າເມືອງໆກາສີ,

ກອງປະຊຸມໄດ້ເປັນກຽດຕ້ອນຮັບການເຂົ້າຮ່ວມຂອງ ສະຫາຍ ອຸ່ນແສງ ແກ້ວດາວັນ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງວຽງຈັນ, ມີບັນດາສະຫາຍໃນຄະນະປະຈຳພັກເມືອງ, ກຳມະການພັກເມືອງ, ມີພະນັກງານອາວຸໂສບຳນານ, ຫົວໜ້າຫ້ອງການ ພ້ອມດ້ວຍຄະນະຮັບຜິດຊອບທີ່ກ່ຽວຂ້ອງຂັ້ນແຂວງ – ຂັ້ນເມືອງ, ມີເລຂາຄະນະພັກກຸ່ມບ້ານ, ນາຍບ້ານ, ເລຂາໜ່ວຍພັກບ້ານເຂົ້າຮ່ວມຢ່າງພ້ອມພຽງ.

ໃນໂອກາດດັ່ງກ່າວ ສະຫາຍ ຄຳສົດ ເພັດລາວັນ ເຈົ້າເມືອງກາສີ ໄດ້ໃຫ້ກຽດຂື້ນກ່າວເປີດກອງປະຊຸມເຊີ່ງທ່ານໄດ້ກ່າວໃນບາງຕອນທີ່ສຳຄັນວ່າ: ການສ້າງແຜນກຳນົດພະນັກງານນຳພາ – ຄຸ້ມຄອງເປັນວຽກງານໜື່ງທີ່ສຳຄັນ ເຊີ່ງເປັນພື້ນຖານຂອງວຽກງານພະນັກງານການນຳທັງຮັບປະກັນການຫັນວຽກງານພະນັກງານໃຫ້ມີຄຸນນະພາບ ດຳເນີນຕາມລະບຽບແບບແຜນເພື່ອຕອບສະໜອງໜ້າທີ່ການເມືອງຂອງພັກ – ລັດໃນສະເພາະໜ້າ ແລະ ຍາວນານ,

ທັງເປັນການຄາດຄະເນເປົ້າໝາຍພະນັກງານທີ່ຈັດວາງເຂົ້າໃນຕຳແໜ່ງນຳພາ – ຄຸ້ມຄອງແຕ່ລະຂັ້ນ ແຕ່ລະຂະແໜງການແນໃສ ຮັບປະກັນລັກສະນະທົດສອບປ່ຽນແທນຢ່າງຕໍ່ເນື່ອງ, ການສ້າງແຜນກຳນົດພະນັກງານນຳພາ – ຄຸ້ມຄອງແມ່ນຄວາມຮັບຜິດຊອບໂດຍກົງຂອງຄະນະພັກ ຂອງພວກເຮົາຕ້ອງປະຕິບັດຕາມຫຼັກການລວມສູນປະຊາທິປະໄຕຢ່າງເຂັ້ມງວດ

ມອບໃຫ້ບຸກຄົນຮັບຜິດຊອບ ຄົ້ນຄວ້າເປົ້າໝາຍເຂົ້າໃນແຜນກຳນົດພະນັກງານ ເປັນໝູ່ຄະນະ ແລະ ຕົກລົງຕາມສຽງສ່ວນຫຼາຍ, ຮັບປະກັນຄວາມຖືກຕ້ອງໂປ່ງໃສ ພາວະວິໄສ ຮອບດ້ານ ຍຸຕິທຳ ຄຳນຶງເຖິງໂຄງປະກອບ ເພດ ເຜົ່າ ແລະ ເລັ່ງໃສ່ພະນັກງານໜຸ່ມໃຫ້ກວມອັດຕາສ່ວນຫຼາຍ.

ນອກຈາກນີ້ກໍ່ຍັງເປັນ ການຈັດຕັ້ງຜັນຂະຫຍາຍມະຕິກອງປະຊຸມວຽກງານຈັດຕັ້ງທົ່ວປະເທດຄັ້ງທີ່ X , ມະຕິຕົກລົງຂອງກົມການ ເມືອງສູນກາງພັກ ສະບັບເລກທີ 032/ຄຈສພ ລົງວັນທີ 3 ມັງກອນ 2018 ວ່າດ້ວຍ:ວຽກງານສ້າງແຜນກຳນົດ ພະນັກງານນຳພາ – ຄຸ້ມຄອງ.

ກອງປະຊຸມໄດ້ຮັບຟັງການຜ່ານມະຕິຂອງກົມການ ເມືອງສູນການງພັກ ສະບັບເລກທີ 032/ກມສພ ລົງວັນທີ 3 ມັງກອນ 2018 ວ່າດ້ວຍ: ວຽກງານການສ້າງແຜນກຳນົດພະນັກງານນຳພາ – ຄຸ້ມຄອງ ແລະ ຄຳແນະນຳຂອງຄະນະຈັດຕັ້ງສູນກາງພັກ ສະບັບເລກທີ 292/ຄຈສພ ລົງວັນທີ 26 ເມສາ 2018 ກ່ຽວກັບວຽກງານສ້າງແຜນກຳນົດພະນັກງານນຳພາ – ຄຸ້ມຄອງ

ເຊີ່ງໃຫ້ກຽດຂຶ້ນຜ່ານໂດຍ ສະຫາຍ ອຸ່ນແສງ ແກ້ວດາວັນ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງວຽງຈັນ ແລະ ຮັບຟັງການຜ່ານມະຕິຂອງກົມການ ເມືອງສູນກາງພັກ ສະບັບເລກທີ 030/ກມສພ ລົງວັນທີ 3 ມັງກອນ 2018 ວ່າດ້ວຍ: ມາດຕະຖານຂອງພະນັກງານນຳພາຄຸ້ມຄອງ ທີ່ສະເໜີໂດຍ ສະຫາຍ ສີສະຫວາດ ແສງພະຈັນ ຮອງປະທານກວດກາພັກ – ລັດ ແຂວງວຽງຈັນ.

ຂ່າວ: ເມືອງກາສີ.

Leave a Reply

Your email address will not be published. Required fields are marked *