ເມືອງວັງວຽງ ສຳເລັດກອງປະຊຸມທາບທາມ ສ້າງແຜນກຳນົດພະນັກງານນຳພາ – ຄຸ້ມຄອງຂັ້ນເມືອງ

ກອງປະຊຸມທາບທາມສ້າງແຜນກຳນົດພະນັກງານນຳພາ – ຄຸ້ມຄອງ ຂັ້ນເມືອງ ຈັດຂື້ນໃນວັນທີ 1 ຕຸລາ 2018 ທີ່ຜ່ານມາ , ຢູ່ທີ່ສະໂມສອນຂອງເມືອງວັງວຽງ ແຂວງວຽງຈັນ.

ໂດຍການເປັນປະທານ ຂອງສະຫາຍ ຄຳຜອງ ດວງວິໄລ ກຳມະການພັກເເຂວງ ເລຂາພັກເມືອງ ເຈົ້າເມືອງ – ເມືອງວັງວຽງ ,ໃຫ້ກຽດເຂົ້າຮ່ວມມີສະຫາຍ ອຸ່ນແສງ ແກ້ວດາວັນ ຄະນະປະຈຳພັກເເຂວງ ຫົວໜ້າຄະນະຈັດຕັ້ງແຂວງ ,ມີຄະນະກຳມະການຂັ້ນແຂວງ, ຄະນະປະຈຳພັກເມືອງ, ກຳມະການພັກເມືອງ, ຫົວໜ້າ, ຄະນະຫ້ອງການຂັ້ນເມືອງ,ຄະນະພັກກຸ່ມບ້ານ,ເລຂາພັກບ້ານ – ນາຍບ້ານທົ່ວເມືອງເຂົ້າຮ່ວມ.

ສະຫາຍ ຄຳຜອງ ດວງວິໄລ ກຳມະການພັກເເຂວງ ເລຂາພັກເມືອງ ເຈົ້າເມືອງ – ເມືອງວັງວຽງ ໄດ້ກ່າວເປີດກອງປະຊຸມຢ່າງເປັນທາງການ.

ກອງປະຊຸມໄດ້ຮັບຟັງການສະເໜີຜ່ານ ຂອງສະຫາຍ ອຸ່ນແສງ ແກ້ວດາວັນ. ມະຕິກົມການເມືອງສູນກາງພັກເລກທີ 032/ກມສພ,ລົງວັນທີ 03 ມັງກອນ 2018 ວ່າດ້ວຍ: ການສ້າງແຜນກຳນົດພະນັກງານນຳພາ – ຄຸ້ມຄອງ, ຄຳແນະນຳຂອງຈັດຕັ້ງສູນກາງພັກເລກທີ 292/ຄຈສພ ລົງວັນທີ 26 ເມສາ 2018 ກ່ຽວກັບວຽກງານສ້າງແຜນກຳນົດພະນັກງານນຳພາ – ຄຸ້ມຄອງ, ມະຕິກົມການເມືອງສູນກາງພັກ 030/ກມສພ ລົງວັນທີ 3 ມັງກອນ 2018 ວ່າດ້ວຍມາດຖານຂອງພະນັກງານນຳພາຄຸ້ມຄອງ.

ກອງປະຊຸມໄດ້ຮັບຟັງ ການແນະນໍາວິທີທາບທາມ ພ້ອມທັງມີການແລກປ່ຽນຂໍ້ຂ້ອງໃຈ ເຊິ່ງກັນ ແລະ ກັນ ຮັບປະກັນໃຫ້ກັບການທາບທາມຕົວຈິງໃຫ້ໄດ້ຮັບຜົນສຳເລັດດີ.

ຈາກນັ້ນກອງປະຊຸມ ກໍ່ໄດ້ທາບທາມຢັງຫາງສຽງກຳນົດເອົາພະນັກງານນຳພາ – ຄຸ້ມຄອງດ້ວຍຄວາມຮັບຜິດຊອບສູງ.

Leave a Reply

Your email address will not be published. Required fields are marked *