ເມືອງກາສີ ຈັດພິທີ ມອບ-ຮັບ ສຸກສາລາບ້ານຈຽງ ໂດຍໄດ້ຮັບ ທຶນຊ່ວຍເຫຼືອການກໍ່ສ້າງຈາກ ສ.ເກົາຫຼີ ຫລາຍກວ່າ 400 ລ້ານກີບ

ພິທີມອບ-ຮັບໄດ້ຈັດຂຶ້ນໃນວັນທີ 2 ຕຸລາ 2018 ນີ້ຢູ່ທີ່ສຸກສາລາ ບ້ານຈຽງ ເມືອງກາສີ ແຂວງວຽງຈັນ, ໂດຍການເປັນກຽດເຂົ້າຮ່ວມຂອງທ່ານ ຄຳສົດ ເພັດລາວັນ ກຳມະການພັກແຂວງ ເລຂາພັກເມືອງເຈົ້າເມືອງໆກາສີ,

ມີທ່ານ ດຣ ສຸກພະໄທ ສໍປະເສີດ ອາດີດຫົວໜ້າພະແນກສາທາລະນະສຸກ ແຂວງວຽງຈັນ, ມີທ່ານ ດຣ ອິນປອນ ມະນີແສງ ຫົວໜ້າພະແນກສາທາລະນະສຸກ ແຂວງວຽງຈັນ, ມີທ່ານ ດຣ ຄຳສິງ ດວງປັນຍາ ກຳມະການພັກເມືອງຫົວໜ້າຫ້ອງການສາທາລະນະສຸກເມືອງກາສີ, ມີທ່ານ ດຣ ບົວພາ ຊາພິດຈິດ ຫົວໜ້າສຸກສາລາບ້ານຈຽງ, ມີທ່ານ ດຣ ແບ ດົງຮວນ ພ້ອມດ້ວຍທີມງານ, ມີບັນດາທ່ານຫົວໜ້າຫ້ອງການອ້ອມ ຂ້າງເມືອງ, ພະນັກງານແພດ – ໝໍ, ມີທ່ານນາຍບ້ານພ້ອມດ້ວຍ ສະຫະພັນແມ່ຍິງພາຍໃນບ້ານຈຽງເຂົ້າຮ່ວມ ທັງໝົດ 60 ຄົນ, ຍິງ 22 ຄົນ.

ໃນພິທີ ທ່ານ ດຣ ບົວພາ ຊາພິດຈິດ ຫົວໜ້າສຸກສາລາບ້ານຈຽງ ກໍ່ໄດ້ໃຫ້ກຽດຂຶ້ນຜ່ານ ບົດສະຫຼຸບການສ້ອມແປງ ແລະ ຕໍ່ເຕີມສຸກສາລາບ້ານຈຽງ ເຊີ່ງທ່ານໄດ້ໃຫ້ຮູ້ວ່າ: ການກໍ່ສ້າງແມ່ນໄດ້ເລີ່ມລົງມືມາແຕ່ວັນທີ 5 ມີນາ 2018 ໂດຍນາຍຊ່າງທີ່ມີຄວາມຮູ້ຄວາມສາມາດກໍ່ສ້າງ,

ສຸກສາລາດັ່ງກ່າວເປັນອາຄານ ຊັ້ນດຽວກໍ່ດ້ວຍດິນບ໋ອກ, ໂບກເບຕົງ, ເສົາເບຕົງເສີມເຫຼັກທີ່ໄດ້ມາດຕະຖານສາກົນ, ພື້ນປູດ້ວຍກະໂລ່, ໂຄງຫຼັງຄາເຮັດດ້ວຍເຫຼັກ, ມຸງດ້ວຍອາໂລຊີງ, ເພດານເຮັດດ້ວຍພັດສະບອດກາຊ້າງເຊີ່ງມີຄວາມກ້ວາງ 12 ແມັດ, ຍາວ 16 ແມັດ, ປະກອບມີ 7 ຫ້ອງ, ການກໍ່ສ້າງສຸກສາລາແຫ່ງນີ້ໃຊ້ເວລາປະມານ 6 ເດືອນກວ່າຈື່ງສຳເລັດ,

ສຳລັບທຶນໃນການກໍ່ສ້າງສ້ອມແປງແມ່ນໄດ້ຮັບທຶນຊ່ວຍເຫຼືອມາຈາກທ່ານ ດຣ ແບ ດົງຮວນ ພ້ອມດ້ວຍ ທີມງານຈາກປະເທດ ສ ເກົາຫຼີ ລວມມູນຄ່າທັງໝົດ 60. 000 ໂດລາ,

ຫຼັງຈາກນັ້ນ ທ່ານ ດຣ ແບ ດົງຮວນ ແລະ ທ່ານ ດຣ ຄຳສິງ ດວງປັນຍາ ກໍ່ໄດ້ຂຶ້ນເຊັນບົດບັນທຶກມອບ – ຮັບການສ້ອມແປງ ແລະ ຕໍ່ເຕີມສຸກສາລາບ້ານຈຽງ ໂດຍຊ່ອງໜ້າກັບ ທ່ານ ດຣ ອິນປອນ ມະນີແສງ ຫົວໜ້າພະແນກສາທາລະນະສຸກ ແຂວງວຽງຈັນ

ພ້ອມນັ້ນທ່ານກໍ່ໄດ້ມອບຕໍ່ໃຫ້ເມືອງກາສີໂດຍແມ່ນ ທ່ານ ຄຳສົດ ເພັດລາວັນ ກຳມະການພັກແຂວງ ເລຂາພັກເມືອງເຈົ້າເມືອງໆກາສີ ພ້ອມດ້ວຍພະນັກງານທີ່ ກ່ຽວຂ້ອງ ຂັ້ນແຂວງ, ຂັ້ນເມືອງເຂົ້າຮ່ວມ ເປັນສັກຂີພິຍານ.

ຈາກນັ້ນທ່ານ ຄຳສົດ ເພັດລາວັນ ກໍ່ໄດ້ຂຶ້ນມອບໃບກຽດຕິ ຄຸນໃຫ້ແກ່ທ່ານ ດຣ ແບ ດົງຮວນພ້ອມດ້ວຍທີມງານ ຈຳນວນ 5 ໃບ ແລະ ທ່ານ ດຣ ຄຳສິງ ດວງປັນຍາກໍ່ໄດ້ຂຶ້ນມອບກະຕ່າຂອງ ຂວັນໃຫ້ແກ່ທ່ານ ຫົວໜ້າພະແນກສາທາລະນະສຸກແຂວງວຽງຈັນທັງສອງທ່ານ ພ້ອມດ້ວຍການມອບຂອງຂວັນ ໃຫ້ແກ່ທາງທ່ານ ດຣ ແບ ດົງຮວນ ພ້ອມທີມງານ ແລະ ທາງທີມງານ ສ ເກົາຫຼີກໍ່ໄດ້ມອບຂອງຂວັນ ໃຫ້ແກ່ທຸກໆທ່ານທີເຂົ້າຮ່ວມພິທີ.

ໃນໂອກາດດັ່ງກ່າວນີ້ ທ່ານ ພູທອນ ກໍ່ໄດ້ຂຶ້ນຜ່ານຂໍ້ຕົກລົງ ຂອງທ່ານຫົວ ໜ້າພະແນກສາທາລະນະສຸກແຂວງວຽງຈັນ ສະບັບເລກທີ 3360/ພສຂ.ວຈ ລົງວັນທີ 28 ກັນຍາ 2018 ວ້າດ້ວຍ: ການຍົກລະດັບຄຸນນະພາບການປິ່ນປົວຢູ່ສຸກສາລາເປັນໂຮງໝໍນ້ອຍ.

ໃນຕອນທ້າຍພິທີທ່ານ ດຣ ອິນປອນ ມະນີແສງ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດ ຊອບກໍ່ສ້າງທີ່ໄດ້ເອົາໃຈໃສ່ກໍ່ສ້າງສຸກສາ ລາແຫ່ງນີ້ໃຫ້ສຳເລັດຕາມຄາດໝາຍ.

ພ້ອມນັ້ນທ່ານກໍ່ໄດ້ເໜັ້ນໜັກໃຫ້ ພະນັກງານແພດ – ໝໍ ຈົ່ງເອົາໃຈໃສ່ເພີ່ມທະວີຄວາມຮັບຜິດຊອບໃນການປົກປັກຮັກສາໃຫ້ໄດ້ນຳໃຊ້ຍາວນານ ແລະ ເກີດປະໂຫຍດສູງສຸດ ດ້ານ ທ່ານ ຄຳສົດ ເພັດລາວັນ ກໍ່ໄດ້ກ່າວວ່າ: ການກໍ່ສ້າງສຸກສາລາດັ່ງກ່າວແມ່ນມີ ຄວາມໝາຍຄວາມສຳຄັນ ຕໍ່ຊີວິດການເປັນຢູ່ຂອງປະຊາຊົນບັນດາເຜົ່າ ທັງເປັນການພັດທະນາສຸຂະພາບຂອງ ປະຊາຊົນ ໃຫ້ນັບມື້ນັບດີຂຶ້ນເປັນກ້າວໆ

ພ້ອມດຽວກັນນັ້ນພະນັກງານແພດ – ໝໍຕ້ອງເອົາໃຈໃສ່ເພີ່ມທະວີຮັດ ແໜ້ນຄວາມສາມັກຄີທັງພາຍໃນ ແລະ ພາຍນອກ, ຍົກສູງຄວາມຮັບຜິດຊອບໃນການໃຫ້ການບໍລິການຄົນເຈັບ ດ້ວຍຄວາມຈິງໃຈ ພ້ອມກັນບົວລະບັດປົກປັກຮັກສາ ແລະ ນຳໃຊ້ໃຫ້ເກີດຜົນປະໂຫຍດອັນສູງສຸດ.

ພ້ອມນັ້ນທ່ານຍັງກ່າວສະແດງຄວາມຂອບອົກຂອບໃຈ ແລະ ຮູ້ບຸນຄຸນຕໍ່ທ່ານ ດຣ ແບ ດົງຮວນພ້ອມດ້ວຍທີມງານ ທີ່ໄດ້ໃຫ້ການອຸ້ມຊູຊ່ວຍເຫຼືອໃນຄັ້ງນີ້ ແລະ ກໍ່ຂໍໃຫ້ທ່ານສືບຕໍ່ຊ່ວຍເຫຼືອເມືອງກາສີໃນຕໍ່ໜ້າຕື່ມອີກ.

ຂ່າວ: ເມືອງກາສີ.

Leave a Reply

Your email address will not be published. Required fields are marked *