ເມືອງກາສີ ປາຖະກະຖາຫວນຄືນມູນເຊື້ອ ວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 16 ປີ

ໃນວັນທີ 25 ກັນຍາ 2018 ທີ່ຜ່ານມານີ້ ຢູ່ທີ່ສະໂມສອນຂອງເມືອງກາສີ ແຂວງວຽງຈັນ. ໄດ້ຈັດພິທີປາຖະກາຖາຫວນຄືນມູນເຊື້ອ ວັນສ້າງຕັ້ງສະຫະພັນນັກຮົບເກົ່າ ແຫ່ງຊາດລາວ ຄົບຮອບ 16 ປີ ຂື້ນຢ່າງເປັນທາງການ.

ໂດຍພາຍໃຕ້ການເປັນປະທານ ຂອງທ່ານ ພັທ ບຸນຮັກ ທຳມະວົງ ຮອງເລຂາພັກເມືອງ ຫົວໜ້າກອງບັນຊາການທະຫານເມືອງກາສີ, ເຂົ້າຮ່ວມມີທ່ານ ພັທ ບຸນເຮືອງ ຈັນທະພາວົງ ອາດີດປະທານສະຫະພັນນັກຮົບເກົ່າເມືອງກາສີ, ມີບັນດາແຂກຖືກເຊີນ, ຫົວໜ້າຫ້ອງການອ້ອມຂ້າງເມືອງ ພ້ອມດ້ວຍສະມາຊິກນັກຮົບເກົ່າໃນທົ່ວເມືອງກາສີເຂົ້າຮ່ວມຢ່າງພ້ອມພຽງ.

ໃນໂອກາດດັ່ງກ່າວ ທ່ານ ພັທ ບຸນຮັກ ທຳມະວົງ ຮອງເລຂາພັກເມືອງ ຫົວໜ້າກອງບັນຊາການທະຫານເມືອງ ໄດ້ໃຫ້ກຽດຂື້ນປາຖະກາຖາວັນສ້າງຕັ້ງນັກຮົບເກົ່າຄົບຮອບ 16 ປີ ເຊີ່ງທ່ານກ່າວວ່າ: ອົງການຈັດຕັ້ງຂອງນັກຮົບເກົ່າ ໄດ້ຮັບການສ້າງຕັ້ງຂຶ້ນຕາມດໍາລັດ ເລກທີ 238/ນຍ ລົງວັນທີ 19 ທັນ ວາ 2001 ໂດຍໃສ່ຊື່ວ່າ “ສະມາຄົມນັກຮົບເກົ່າລາວ”

ຈາກນັ້ນມາ ແມ່ນໄດ້ປັບປຸງ ແລະ ສ້າງຕັ້ງເປັນ “ສະຫະພັນນັກຮົບເກົ່າແຫ່ງຊາດລາວ” ຕາມຂໍ້ຕົກລົງເລກທີ 68/ກມສພ ລົງວັນທີ 9 ກັນຍາ2002; ສະຫະພັນນັກຮົບເກົ່າແຫ່ງຊາດລາວ ແມ່ນອົງການຈັດຕັ້ງມະຫາຊົນໜຶ່ງຂອງພັກພາຍໃຕ້ການຊີ້ນໍາ-ນໍາພາຂອງຄະນະບໍລິຫານງານສູນກາງພັກ ແລະກົມການເມືອງສູນກາງພັກ

ມີຖານະທຽບເທົ່າກັບອົງການຈັດຕັ້ງຂອງພັກ-ລັດ ແລະ ອົງການຈັດຕັ້ງອື່ນໆຂອງພັກ ເຄື່ອນໄຫວພາຍໃຕ້ລັດຖະທໍາມະນູນ ແລະ ກົດໝາຍຂອງ ສປປ ລາວ

ມີພາລະບົດບາດ ເປັນເສນາທິການໃຫ້ສູນກາງພັກ ແລະ ລັດຖະບານກ່ຽວກັບວຽກງານຂົນຂວາຍເຕົ້າໂຮມຈັດຕັ້ງ ແລະ ສຶກສາອົບຮົມນັກຮົບເກົ່າໃຫ້ຮັກສາມູນເຊື້ອ ປະຕິວັດປະກອບສ່ວນເຂົ້າໃນການຄຸ້ມຄອງລັດ ຄຸ້ມຄອງສັງຄົມປົກປັກຮັກສາ ແລະ ພັດທະນາປະເທດຊາດ.

ຕະຫຼອດໄລຍະ 16 ປີຜ່ານມາ ສະຫະພັນນັກຮົບເກົ່າແຫ່ງຊາດລາວ ໄດ້ຮັບການປັບປຸງກໍ່ສ້າງຕົນເອງ ແລະ ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ອັນພົ້ນເດັ່ນໄດ້ເອົາໃຈໃສ່ຫັນລົງຮາກຖານ ເກັບກໍາຄວາມຄິດເຫັນສຶກສາອົບຮົມການ ເມືອງ-ແນວຄິດຖັນແຖວນັກຮົບເກົ່າ ປຸກລະດົມຂະບວນການແຂ່ງຂັນ 3 ດີ 6 ຮັກສາຕິດພັນກັບການແຂ່ງຂັນຮັກຊາດ ແລະ ພັດທະນາ,

ການຈັດຕັ້ງສະຫະພັນນັກຮົບເກົ່າ ແຕ່ສູນກາງຮອດທ້ອງຖິ່ນໄດ້ຮັບການປັບປຸງ ໃຫ້ມີຄວາມເຂັ້ມແຂງໜັກແໜ້ນຢ່າງບໍ່ຢຸດຢັ້ງ ເຊິ່ງປັດຈຸບັນທົ່ວປະເທດມີໜ່ວຍຮາກຖານນັກຮົບເກົ່າ 1.318 ໜ່ວຍ, ມີສະມາຊິກ 53.958 ສະຫາຍ ( ກວມ 74,01% ຂອງຈຳນວນນັກຮົບທັງໝົດ),

ພະນັກງານປະຈຳຢູ່ອົງການສະຫະພັນນັກຮົບເກົ່າແຕ່ລະຂັ້ນໃນທົ່ວປະເທດມີທັງໝົດ 1.656 ຄົນ, ຍິງ 456 ຄົນ, ໃນນີ້ຢູ່ອົງການຂັ້ນສູນກາງມີ 111 ຄົນ, ຍິງ 46 ຄົນ,

ຢູ່ອົງການຂັ້ນທ້ອງຖິ່ນມີ 1.545 ຄົນ, ຍິງ 403 ຄົນ, ພະນັກງານບຳນານ 428 ຄົນ, ຍິງ 10 ຄົນ, ນາຍທະຫານນ-ນາຍຕຳຫຼວດຍັງປະຈຳການ 635 ຄົນ, ຍິງ 152 ຄົນ, ລັດຖະກອນ 490 ຄົນ, ຍິງ 202 ຄົນ, ລັດຖະກອນ 95% ມີ 16 ຄົນ, ຍິງ 9 ຄົນ, ອາສາສະໝັກ 87 ຄົນ, ຍິງ 37 ຄົນ,

ການປັບປຸງກໍ່ສ້າງພັກການປະຕິບັດນະໂຍບາຍ ຕໍ່ສະມາຊິກຕາມລະບຽບກົດໝາຍກໍໄດ້ຮັບການຈັດຕັ້ງປະຕິບັດຢ່າງຕັ້ງໜ້າ, ຖັນແຖວນັກຮົບເກົ່າເສີມຂະຫຍາຍໄດ້ມູນເຊື້ອເພິ່ງຕົນເອງກຸ້ມຕົນເອງ ນໍາພາຄອບຄົວທໍາການຜະລິດເປັນສິນຄ້າ ແລະ ບໍລິການຕ່າງໆ

ເອົາໃຈໃສ່ເສີມຂະຫຍາຍແນວທາງການຕ່າງປະເທດ ຂອງພັກມີໝາກຜົນດີ ໂດຍສັງລວມແລ້ວ 16 ປີຜ່ານມາ ສະຫະພັນນັກຮົບເກົ່າແຫ່ງຊາດລາວ ສາມາດຈັດຕັ້ງ ແລະ ເຄື່ອນໄຫວປະຕິບັດພາລະບົດບາດຂອງຕົນເປັນຮູບປະທຳ ແລະ ມີໝາກຜົນດີຂຶ້ນເປັນກ້າວໆມາ.

ທ່ານ ພັທ ບຸນຮັກ ທຳມະວົງ ໄດ້ກ່າວອີກວ່າ: 16 ປີຜ່ານມາ ຖັນແຖວນັກຮົບເກົ່າແມ່ນຍັງຮັກສາ ແລະ ເສີມຂະຫຍາຍໄດ້ມູນເຊື້ອອັນດີງາມຂອງຕົນປະກອບສ່ວນສໍາຄັນເຂົ້າໃນການປະຕິບັດ 2 ໜ້າທີ່ຍຸດທະສາດຂອງພັກ ແລະ ມີການເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ.

້ສາມາດຍາດໄດ້ຜົນສໍາເລັດທີ່ເປັນພື້ນຖານຫຼາຍດ້ານ, ພັກ-ລັດ ຕີລາຄາສູງຕໍ່ຜົນສໍາເລັດ ແລະ ການປະກອບສ່ວນອັນໃຫຍ່ຫຼວງດັ່ງກ່າວ,

ຫຼັງຈາກນັ້ນ ທ່ານ ອຳໄພ ໂສລັດຕະນະວົງ ຫົວໜ້າຫ້ອງວ່າການປົກຄອງເມືອງກາສີ ກໍ່ໄດ້ໃຫ້ກຽດຂຶ້ນຜ່ານຄຳສັ່ງແນະນຳຂອງທ່ານເຈົ້າແຂວງໆວຽງຈັນ ສະບັບເລກທີ 005/ຈຂ.ວຈ ລົງວັນ 18 ມິຖຸນາ 2018 ວ່າດ້ວຍ: ການຈັດຕັ້ງສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີທົ່ວແຂວງວຽງຈັນ,

ໃນຕອນທ້າຍພິທີ ທ່ານ ພັທ ບຸນຮັກ ທຳມະວົງ ຮອງເລຂາພັກເມືອງ ຫົວໜ້າກອງບັນຊາການທະຫານເມືອງກາສີ ກໍ່ໄດ້ຂຶ້ນມອບຂອງຂວັນໃຫ້ແກ່ ທ່ານ ພັທ ບຸນເຮືອງ ຈັນທະພາວົງ ອາດີດປະທານສະຫະພັນນັກຮົບເກົ່າເມືອງກາສີອີກດ້ວຍ.

ຂ່າວ: ເມືອງກາສີ!

Leave a Reply

Your email address will not be published. Required fields are marked *