ຄະນະບໍລິຫານງານຊາວໜຸ່ມເມືອງກາສີສຳເລັດຊຸດຝຶກອົບຮົມໄອທີ

ໃນວັນ 26 ກັນຍາ 2018 ທີ່ຜ່ານມານີ້, ຄະນະບໍລິຫານງານຊາວໜຸ່ມເມືອງກາສີ ໄດ້ຈັດພິທີປິດຊຸດຝຶກອົບຮົມໄອທີ ພາຍໃຕ້ໂຄງການແຮກສ່ຽວ ຄະນະບໍລິຫານງານ ຄະນະວິທະຍາສາດສິ່ງແວດລ້ອມ, ຄະນະບໍລິຫານງານ ຊາວໜຸ່ມເມືອງກາສີ,ຄະນະບໍລິຫານງານຊາວໜຸ່ມເມືອງວັງວຽງ ແລະ ຄະນະບໍລິຫານງານຊາວໜຸ່ມເມືອງເຟືອງ, ຢູ່ທີ່ສະໂມ ສອນ ຂອງເມືອງກາສີ ແຂວງວຽງຈັນ ຂຶ້ນຢ່າງເປັນທາງການ

ໂດຍການໃຫ້ກຽດເຂົ້າຮ່ວມຂອງທ່ານ ສີພັນ ມະນີທອງ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງກາສີ ທັງເປັນຜູ້ຊີ້ນຳອົງການຈັດຕັ້ງມະຫາຊົນ, ມີທ່ານ ແສງວິໄລວັນ ສິງທະວີຄູນ ຮອງເລຂາຄະນະບໍລິຫານງານຊາວໜຸ່ມ ຄະນະວິທະຍາສາດສິ່ງແວດລ້ອມ ມະຫາວິທະຍາໄລແຫ່ງ ຊາດລາວ, ມີຄູຝຶກທີ່ມາຈາກຄະນະວິທະຍາສາດສິ່ງແວດລ້ອມ ມະຫາວິທະຍາໄລແຫ່ງຊາດລາວ ພ້ອມດ້ວຍນັກສຳມະນາກອນ ເຂົ້າພ້ອມທັງໝົດ 40 ຄົນ, ຍິງ 12 ຄົນ.

ຊຸດຝຶກອົບຮົມໃນຄັ້ງນີ້ແມ່ນ ໄດ້ດຳເນີນມາແຕ່ວັນທີ 24 ຫາ 26 ກັນຍາ 2018 ເປັນເວລາ 3 ວັນ, ມີຄູຝຶກ ຈຳນວນ 3 ຄົນ, ມີນັກສຳມະນາກອນເຂົ້າຮ່ວມຝຶກອົບຮົມທັງໝົດ 35 ຄົນ, ຍິງ 11 ຄົນ ທີ່ມາຈາກສະມາຊິກຊາວໜຸ່ມຢູ່ພາຍ ໃນກົມກອງ, ຫ້ອງການອ້ອມຂ້າງເມືອງ, ສຳລັບເອກະສານທີນຳໃຊ້ເຂົ້າຝຶກອົບຮົມແມ່ນຢູ່ໃນຫົວຂໍ້ການນຳໃຊ້ Microsoft Offioce ກໍ່ຄື Word, Excel, Power Point, Internet ຂັ້ນພື້ນຖານ ໂດຍເນັ້ນການປະຕິບັດຕົວຈິງ,

ໃນໂອກາດດັ່ງກ່າວ ທ່ານ ສີພັນ ມະນີທອງ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງກາສີ ທັງເປັນຜູ້ຊີ້ນຳອົງການຈັດຕັ້ງມະຫາຊົນ ກໍ່ໄດ້ໃຫ້ກຽດຂຶ້ນມອບໃບ ຢັ້ງຢືນໃຫ້ແກ່ຜູ້ສຳເລັດການຝຶກອົບຮົມຈຳນວນ 35 ຄົນ, ຍິງ 11 ຄົນເຊິ່ງໃນນີ້ແມ່ນໄດ້ຮັບໃບຢັ້ງຢືນປະເພດດີເດັ່ນທຸກຄົນ,

ໃນຕອນທ້າຍພິທີ ທ່ານ ສີພັນ ມະນີທອງ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງກາສີ ທັງເປັນຜູ້ຊີ້ນໍາອົງການຈັດຕັ້ງມະຫາຊົນ ກໍ່ໄດ້ໃຫ້ກຽດຂຶ້ນໂອ້ລົມ ເຊິ່ງກ່ອນອື່ນທ່ານ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ກັບບັນດາ ຄູ – ອາຈານຝຶກອົບຮົມໄອທີ ພ້ອມດ້ວຍນັກສຳມະນາກອນທັງໝົດທີ່ໄດ້ພ້ອມກັນເອົາໃຈໃສ່ຈັດຕັ້ງປະຕິບັດໃຫ້ຊຸດຝຶກອົບຮົມໃນຄັ້ງນີ້ມີຜົນຢ່າງຈົບງາມ

ແລະ ທ່ານກໍ່ໄດ້ຮຽກຮ້ອງໃຫ້ບັນດານັກສຳມະນາກອນທີ່ສຳເລັດການຝຶກອົບຮົມໄອທີໃນຄັ້ງນີ້ຈົ່ງພ້ອມກັນນຳເອົາບົດຮຽນດັ່ງກ່າວໄປຈັດຕັ້ງຜັນຂະຫຍາຍເຂົ້າໃນວຽກງານວິຊາສະເພາະທີ່ຕົນເອງຮັບຜິດຊອບໃຫ້ມີຄວາມວ່ອງໄວທັນສະໄໝຂຶ້ນເປັນກ້າວໆ.

ຂ່າວ: ເມືອງກາສີ.

Leave a Reply

Your email address will not be published. Required fields are marked *