ກຸ່ມຜະລິດນ້ຳປູກາສີຄຳ ຮັບຮອງລະບຽບການຄຸ້ມຄອງການນຳໃຊ້ເຄື່ອງໝາຍລວມໝູ່

ໃນວັນທີ 18 ກັນຍາ 2018 ນີ້, ຢູ່ທີ່ຫ້ອງການໜ່ວຍງານວິທະຍາສາດ ແລະ ເຕັກໂນໂລຊີ ເມືອງກາສີໄດ້ຈັດພິທີຮັບຮອງລະບຽບການຄຸ້ມຄອງການນຳໃຊ້ເຄື່ອງໝາຍລວມໝູ່ຂອງກຸ່ມປຸງແຕ່ງນ້ຳປູກາສີຄຳ ບ້ານ ນາມົນໃໝ່ ເມືອງກາສີ ແຂວງວຽງຈັນ ຂຶ້ນຢ່າງເປັນທາງການ

ພາຍໃຕ້ການເປັນປະທານຂອງ ທ່ານ ປອ ນາງ ຂັນລາສີ ແກ້ວບຸນພັນ ຫົວໜ້າກົມຊັບສິນທາງປັນຍາ ກະຊວງວິທະຍາສາດ ແລະ ເຕັກໂນໂລຊີ, ມີທ່ານ ວິໄລສອນ ຈິ່ງບ່າວໂຮມ ວ່າການ ຫົວໜ້າພະແນກວິທະຍາສາດ ແລະ ເຕັກໂນໂລຊີ ແຂວງວຽງຈັນ, ມີທ່ານ ສິດສະຫວັດ ຫົວໜ້າໜ່ວຍງານວິທະຍາສາດ ແລະ ເຕັກໂນໂລຊີເມືອງກາສີ, ມີບັນດາພະນັກງານຂະແໜງການທີ່ກ່ຽວຂ້ອງພ້ອມດ້ວຍກຸ່ມຜູ້ປະກອບການເຂົ້າຮ່ວມທັງໝົດ 22 ຄົນ, ຍິງ 15 ຄົນ.

ໃນໂອກາດດັ່ງກ່າວ ທ່ານ ປອ ນາງ ຂັນລາສີ ແກ້ວບຸນພັນ ຫົວໜ້າກົມຊັບສິນທາງປັນຍາ ກະຊວງ ວິທະຍາ ສາດ ແລະ ເຕັກໂນໂລຊີ ກໍ່ໄດ້ໃຫ້ກຽດຂຶ້ນມີຄຳເຫັນເຊີ່ງກ່ອນອຶ່ນທ່ານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ກຸ່ມຜູ້ຜະລິດນ້ຳປູທີ່ສູ້ຊົນຍາດໄດ້ຜົນງານສາມາດເຮັດໃຫ້ຜະລິດຕະພັນສິນຄ້າຂອງຕົນກາຍເປັນທີຍອມຮັບກາໝາຍສິນຄ້າໂອດ໋ອບແຫ່ງຊາດ.

ພ້ອມນັ້ນທ່ານຍັງໄດ້ຮຽກຮ້ອງໃຫ້ກຸ່ມຜູ້ຜະລິດນ້ຳປູຈົ່ງເພີ່ມທະວີເຕົ້າໂຮມຄວາມສາມັກຄີຂອງສະມາຊິກພາຍໃນກຸ່ມໃຫ້ເປັນອັນໜື່ງອັນດຽວກັນ, ພ້ອມກັນສືບຕໍ່ພັດທະນາສິນຄ້າໂອດ໋ອບຂອງເມືອງກໍ່ຄືນ້ຳປູກາສີຄຳໃຫ້ເປັນທີ່ຍອມຮັບ ແລະ ມີຊື່ສຽງໂດ່ງດັງຍິ່ງໆຂຶ້ນ

ຄຽງຄູ່ກັນນັ້ນທ່ານໄດ້ຮຽກຮ້ອງມາຍັງກຸ່ມຈົ່ງພ້ອມກັນສຸມທຸກສະຕິປັນຍາເຂົ້າໃນການຄົ້ນຄ້ວາສ້າງລະບຽບການຄຸ້ມຄອງການນຳໃຊ້ເຄື່ອງໝາຍລວມໝູ່ຂອງກຸ່ມຜະລິດນ້ຳປູກາສີຄຳ ພາຍໃຕ້ໂຄງການສ້າງຄວາມເຂັ້ມແຂງທາງດ້ານວຽກງານ ຊັບສິນທາງປັນຍາ ໃນຄັ້ງນີ້ໃຫ້ສົມບູນ ແລະ ສາມາດນຳໃຊ້ໄດ້ດ້ວຍວິໄສທັດອັນກ້ວາງໄກ.

ໃນໂອກາດດັ່ງກ່າວທ່ານກໍ່ໄດ້ຂຶ້ນມອບໃບຢັ້ງຢືນການຈົດທະບຽນເຄື່ອງໝາຍການຄ້າ ໃຫ້ແກ່ກຸ່ມຜະລິດນ້ຳປູກາສີຄໍາ ແລະ ຕາງໜ້າຂຶ້ນຮັບໂດຍແມ່ນທ່ານນາງ ຄຳນາງ ສີແສງຈັນ ຫົວໜ້າກຸ່ມປຸງແຕ່ງນ້ຳປູກາສີຄຳ ບ້ານ ນາມົນໃໝ່ ເມືອງກາສີ ແຂວງວຽງຈັນ,

ຫຼັງຈາກນັ້ນ ທ່ານ ອາພິວັດ ສົມບູນຂັນ ຫົວໜ້າພະແນກເຄື່ອງ ໝາຍການຄ້າ ກົມຊັບສິນທາງປັນຍາ ກະຊວງວິທະຍາສາດ ແລະ ເຕັກໂນໂລຊີໄດ້ຂຶ້ນຜ່ານຮ່າງລະບຽບ ວ່າດ້ວຍ: ການຄຸ້ມຄອງການນຳໃຊ້ເຄື່ອງໝາຍລວມໝູ່ຂອງກຸ່ມຜະລິດນ້ຳປູກາສີຄຳ ບ້ານ ນາມົນໃໝ່ ເຊີ່ງທ່ານໄດ້ໃຫ້ຮູ້ວ່າ: ການສ້າງລະບຽບດັ່ງກ່າວແມ່ນແນໃສ່ສົ່ງເສີມໃຫ້ມີການຮັກສາຮູບແບບການຜະລິດສິນຄ້າເອກະລັກຂອງກຸ່ມໃຫ້ມີຄວາມຢືນຢົງ, ມີຄຸນນະພາບ, ສ້າງຊື່ສຽງໃຫ້ສິນຄ້າຂອງກຸ່ມ ແລະ ສ້າງຄວາມເຊື່ອໝັ້ນ ພ້ອມທັງປົກປ້ອງສິດຜົນປະໂຫຍດຂອງຜູ້ບໍລິໂພກ, ສຳລັບຮ່າງລະບຽບການຄຸ້ມຄອງການນຳໃຊ້ເຄື່ອງໝາຍລວມໝູ່ແມ່ນມີທັງໝົດ 1 ພາກ, ມີ 13 ຂໍ້.

ຂ່າວ: ເມືອງກາສີ.

Leave a Reply

Your email address will not be published. Required fields are marked *