ພິທີປະກາດຮັບຮອງ ບ້ານນໍ້າແພດ ເປັນບ້ານປ້ອງກັນຄວາມສະຫງົບດີຂອງເມືອງໝື່ນ ແຂວງວຽງຈັນ

ໃນວັນທີ 14 ກັນຍາ 2018 ຜ່ານມານີ້ ເມືອງໝື່ນ ແຂວງວຽງຈັນ ໄດ້ຈັດພິທີປະກາດຮັບຮອງບ້ານນໍ້າແພດ ເປັນບ້ານປ້ອງກັນຄວາມສະຫງົບດີ ຂອງເມືອງໝື່ນ ແຂວງວຽງຈັນ

ໂດຍການເປັນກຽດເຂົ້າຮ່ວມຂອງທ່ານ ບຸນສອນ ເພັດລາວັນ ຄະນະປະຈຳພັກແຂວງ ຮອງເຈົ້າແຂວງໆວຽງຈັນ, ທ່ານ ພູວອນ ບຸນວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງ, ປະທານປ້ອງກັນຊາດ-ປ້ອງກັນຄວາມສະຫງົບ ເມືອງໝື່ນ, ທ່ານ ພັທ ທອງສະຫວັນ ເຮືອງພົມມີ ຮອງຫົວໜ້າກອງບັນຊາການ ປກສ ແຂວງ, ທ່ານ ພັທ ບຸນເຄນ ໄຊຍະບົວພາ ຫົວໜ້າກອງບັນຊາການ ປກສ ເມືອງ, ທ່ານ ພັທ ບົວວັນ ພະວິໄຊ ຮອງຫົວໜ້າຫ້ອງສຳມະໂນຄົວ-ກໍ່ສ້າງຮາກຖານ ປກສ ແຂວງ, ມີເລຂາພັກບ້ານ, ນາຍບ້ານ , ແຂກທີ່ຖືກເຊີນ, ພ້ອມດ້ວຍປະຊາຊົນພາຍໃນບ້ານເຂົ້າຮ່ວມຢ່າງພ້ອມພຽງ.

ທ່ານ ລັດຖະກອນ ວົງສີ ເລຂາພັກບ້ານ ນາຍບ້ານໆນໍ້າແພດ ຂື້ນຜ່ານບົດສະຫຼຸບການເປີດຂະບວນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ພ້ອມທັງວາງທິດທາງແຜນການໃນຕໍ່ໜ້າ,

ບ້ານນໍ້າແພດ ປະກອບມີ 492 ຫຼັງຄາເຮືອນ, ມີ 424 ຄອບຄົວ, ມີ 31 ໜ່ວຍສາມັກຄີ, ມີພົນລະເມືອງທັງໝົດ 3.011 ຄົນ, ຍິງ 1.456 ຄົນ ຍັງບໍ່ທັນຂື້ນສຳມະໂນຄົວ 103 ຄອບຄົວ ມີ 645, ຍິງ 312 ຄົນ ປະຊາຊົນສ່ວນຫຼາຍແມ່ນມີມູນເຊື້ອດຸໝັ່ນຂະຫຍັັນພຽນ ໃນການຜະລິດກະສີກຳປູກຝັງລ້ຽງສັດ ແລະ ດ້ານອຸສະຫະກໍາຈຳນວນໜຶ່ງ ບ້ານນໍ້າແພດແມ່ນມີອົງການຈັດຕັ້ງພັກ-ລັດ ເປັນລະບົບຄົບຊຸດ ມີຄວາມເຂັ້ມແຂງຮອບດ້ານ

ໃນປີຜ່ານມາ ຄະນະພັກ, ອຳນາດການປົກຄອງບ້ານແຕ່ລະບ້ານ ໄດ້ຊີ້ນຳ-ນຳພາ, ລົງໄກ້ສິດຕິດແທດກັບປະຊາຊົນແຕ່ລະຄອບຄົວ ໂດຍນຳເອົາແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ເອກະສານທີ່ສຳຄັນຕ່າງໆ ມາຈັດຕັ້ງເຜີຍແຜ່ເຊື່ອມຊຶມເປັນແຕ່ລະໄລຍະ ຈຶ່ງເຮັດໃຫ້ປະຊາຊົນ ຢູ່ພາຍໃນບ້ານມີຄວາມຮັບຮູ້, ມີຄວາມເຂົ້າໃຈຢ່າງຈະແຈ້ງ ພ້ອມທັງຕື່ນຕົວເຂົ້າຮ່ວມຂະບວນການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ

ຕັ້ງໜ້າແກ້ໄຂປະກົດການຫຍໍ້ທໍ້ດ້ານຕ່າງໆຢ່າງເປັນເຈົ້າການ ມີກໍາລັງ ປກຊ-ປກສ ບ້ານທັງໝົດ 35 ສະຫາຍ, ມີກ້ອງຫຼອນບ້ານ 15 ສະຫາຍ ໄດ້ເອົາໃຈໃສ່ປ້ອງກັນເວນຍາມວັນສໍາຄັນຂອງພັກ-ຊາດ ແລະ ວັນບຸນປະເພນີທີ່ສຳຄັນຕ່າງໆ, ເຫັນວ່າມີຄວາມສະຫງົບດີ

ຜ່ານການຈັດຕັ້ງປະຕິບັດວຽກງານສ້າງຄອບຄົວ ແລະ ສ້າງບ້ານປ້ອງກັນຄວາມສະຫງົບດີ ໃນໄລຍະຜ່ານມາ ສາມາດຕີລາຄາ 5 ມາດຖານຂອງຄອບຄົວທີເຮັດວຽກງານປ້ອງກັນຄວາມສະຫງົບດີ ພາຍໃນບ້ານນໍ້າແພດ ສັງລວມໄດ້ດັ່ງນີ້:

ປະເພດຄອບຄົວ 95% ຂື້ນໄປ ມີ 131 ຄອບຄົວ, ປະເພດຄອບຄົວ 85% -94% ມີ 297 , ປະເພດ 84% ລົງມາ ມີ 4 ຄອບຄົວ ແລະ ຕີລາຄາປະເມີນຜົນ 6 ມາດຖານຂອງບ້ານປ້ອງກັນຄວາມສະຫງົບດີ ສັງລວມແລ້ວບ້ານນໍ້າແພດສາມາດປະເມີນໄດ້91,52%.

ດັ່ງນັ້ນທ່ານເຈົ້າແຂວງໆວຽງຈັນ ຈື່ງຮັບຮອງເອົາບ້ານນໍ້າແພດ ເປັນບ້ານປ້ອງກັນຄວາມສະຫງົບດີຂອງເມືອງໝື່ນ, ທ່ານເຈົ້າເມືອງໆໝື່ນ ຕົກລົງມອບໃບຢັ້ງຢືນໃຫ້ຄອບຄົວທີ່ເຮັດວຽກງານປ້ອງກັນຄວາມສະຫງົບດີຈຳນວນ 424 ຄອບຄົວ ໃຫ້ກຽດຂຶ້ນມອບໃບຢັ້ງຢືນໃຫ້ແກ່ຄອບຄົວປ້ອງກັນຄວາມສະຫງົບດີ ໂດຍແມ່ນທ່ານ ທ່ານ ພູວອນ ບຸນວິໄລ ແລະ ໃຫ້ກຽດຂື້ນມອບໃບຢັ້ງຢືນໃຫ້ແກ່ບ້ານປ້ອງກັນຄວາມສະຫງົບດີ ໂດຍແມ່ນທ່ານ ບຸນສອນ ເພັດລາວັນ.

ພາບ-ຂ່າວ:ປກສ ແຂວງວຽງຈັນ

Leave a Reply

Your email address will not be published. Required fields are marked *