ເມືອງຊະນະຄາມ ຈັດກອງປະຊຸມປຶກສາ ຫາລື ລະຫວ່າງພາກລັດ ພາກເອກະຊົນ ຢູ່ເມືອງຊະນະຄາມ

ໃນລະຫວ່າງຕົ້ນເດືອນ ກັນຍາ 2018 ຫ້ອງການຖະຂ່າວ ວັດທະນະທຳ ແລະ ທ່ອງທ່ຽວເມືອງຊະນະຄາມ ແຂວງວຽງຈັນ ໄດ້ເປີດກອງປະຊຸມປຶກສາຫາລື ລະຫວ່າງພາກລັດ – ພາກທຸລະກິດ ໃນການສົ່ງເສີມປີທ່ອງທ່ຽວ 2018 ຢູ່ທີ່ຮ້ານອາຫານ ນິກິຕ໋າ

ໂດຍໃຕ້ການເປັນປະທານຂອງທ່ານ ສະໝານ ວິເສດຍະພົງ ເລຂາພັກເມືອງເມືອງ ເຈົ້າເມືອງ ເມືອງຊະນະຄາມ,ມີທ່ານ ຈັນເພັງ ສຸວັນນະຈັກຄຳ ກຳມະການພັກເມືອງ ຫົວໜ້າຫ້ອງການ ຖະແຫຼງຂ່າວ ວັດທະນະທຳ ແລະ ທ່ອງທ່ຽວເມືອງຊະນະຄາມ ມີຫົວໜ້າຫ້ອງການ ຮອງຫ້ອງການ ນາຍບ້ານທັງ 4 ບ້ານໃນເຂດເທດສະບານເມືອງ ແລະ ມີບັນດາຫົວໜ່ວຍທຸລະກິດທີ່ຂື້ນກັບການຄຸ້ມຄອງ ຂອງຫ້ອງການຖະແຫຼງຂ່າວວັດທະນະທຳ ແລະ ທ່ອງທ່ຽວເມືອງຊະນະຄາມ ກໍ່ເປັນກຽດເຂົ້າຮ່ວມຢ່າງພ້ອມພຽງ

ໃນວາລະກອງປະຊຸມ ທ່ານ ນາງພູຂົງ ນາມມະວົງ ຮອງຫົວໜ້າຫ້ອງການຖະແຫຼງຂ່າວ ວັດທະນະທຳ ແລະ ທ່ອງທ່ຽວເມືອງຊະນະຄາມ ໄດ້ຜ່ານບົດສະຫຼຸບ ວຽກງານການເຄື່ອນໄຫວ ຂອງບັນດາກຸ່ມທຸລະກິດ ໃນໄລຍະ 1 ປີຜ່ານມາເຊັ່ນ: ກຸ່ມທຸລະກິດ ຮ້ານອາຫານ ຮ້ານກິນດື່ມ ບັນເທິງ ຮ້ານເຝີເຂົ້າປຽກ ເຂົ້າປຸ່ນ ກຸ່ມເຮືອນພັກ,ກຸ່ມເສີມຄວາມງາມ ແລະ ວົງດົນຕີເອເລັກໂທນ ໃນການບໍລິການ ການຮັບໃຊ້ສັງຄົມກໍ່ເຫັນວ່າເຮັດໄດ້ດີພໍສົມຄວນ

ນອກຈາກນີ້ກອງປະຊຸມຍັງໄດ້ມີການຄົ້ນຄ້ວາປືກສາຫາລື ປະກອບຄວາມຄິດຄວາມເຫັນ ຈາກບັນດາພາກສ່ວນທີ່ເຂົ້າຮ່ວມໃນກອງປະຊຸມເປັນຕົ້ນແມ່ນການເຂົ້າ – ອອກຂອງແຂກ ທີ່ຜ່ານດ່ານ ຕມ ແລະ ດ່ານພາສີ ການໃຫ້ຄວາມສະດວກ ແກ່ນັກທ່ອງທ່ຽວ ແລະ ການກຳນົດລາຄາການນຳທ່ຽວ ໃຫ້ມີຄວາມຊັດເຈນ ເໝາະສົມ

ສະເພາະບັນດາຮ້ານອາຫານ ກິນດື່ມບັນເທິງ ເຮືອນພັກ ຈະຕ້ອງໄດ້ກຳນົດລາຄາຈັດເຈນ ເພື່ອເປັນການບໍ່ເອົາປຽບລູກຄ້າ ຫຼື ນັກທ່ອງທ່ຽວ ທີ່ມາໃຊ້ບໍລິການ,

ນອກຈາກນີ້ກອງປະຊຸມ ໄດ້ຕົກລົງເຫັນດີເປັນເອກະພາບກັນ ໃນການຈັດຕັ້ງປະຕິບັດວຽກງານຂອງບັນດາກຸ່ມ ແລະ ກອງທຶນຂອງກຸ່ມເຊັ່ນ: ຮ້ານ ອາຫານ ຮ້ານກິນດື່ມ ບັນເທິງ ເຝີ ເຂົ້າປຽກ ເຮືອນພັກ ວົງດົນຕີເອເລັກໂທນ ຫົວໜ່ວຍລະ 30 ພັນກີບ /ເດືອນ ເງິນຈຳນວນນີ້ແມ່ນຈະໄດ້ໃຊ້ເຂົ້າໃນການພັດທະນາ ກຸ່ມໃຫ້ມີຄວາມເຂັ້ມແຂງ ແລະ ຍືນຍົງຕະຫຼອດໄປ

ຕອນທ້າຍຂອງກອງປະຊຸມຍັງໄດ້ມອບໃບຍອງຍໍຂອງທ່ານເຈົ້າເມືອງ ເມືອງເມືອງຊະນະຄາມ ໃຫ້ບັນດາຫົວໜ່ວຍທຸລະກິດ ທີ່ປະກອບສ່ວນ ເຂົ້າໃນວຽກງານບຸນອອກພັນສາ ປະຈຳປີ 2017 ທີ່ໄດ້ຮັບໃຊ້ສັງຄົມດ້ວຍຄວາມຈິງໃຈ

Leave a Reply

Your email address will not be published. Required fields are marked *