ເມືອງວັງວຽງຈັດກອງປະຊຸມແຂ່ງຂັນສ້າງຂະບວນການ ການສ້າງຄອບຄົວ ແລະ ບ້ານ ສາມັກຄີປອງດອງ

ໃນຕອນເຊົ້າຂອງວັນທີ 23 ສິງຫາ 2018 ນີ້, ຢູ່ທີ່ສະໂມສອນຫ້ອງວ່າການປົກຄອງເມືອງວັງວຽງ ແຂວງວຽງຈັນ. ໄດ້ຈັດກອງປະຊຸມແຂ່ງຂັນສ້າງຂະບວນການ ການສ້າງຄອບຄົວ ແລະ ບ້ານ ສາມັກຄີປອງດອງ.

ໂດຍການເຂົ້າຮ່ວມຂອງທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງເຈົ້າເມືອງໆວັງວຽງ, ມີທ່ານ ທອງສະຫວັນ ວົງສຳພັນ ຄະນະປະຈຳພັກແຂວງ ປະທານແນວລາວສ້າງຊາດແຂວງວຽງຈັນ, ມີທ່ານ ບຸນປັນ ພົມມະວົງ ຮອງເລຂາພັກເມືອງ ປະທານແນວລາວສ້າງຊາດເມືອງ, ມີບັນດາທ່ານຄະນະປະຈໍາ, ກຳມະການພັກເມືອງ, ຫົວຫນ້າຫ້ອງການ, ພະນັກງານອາວຸໂສບຳນານ, ນາຍບ້ານ ແລະປະທານແນວລາວສ້າງຊາດບ້ານເຂົ້າຮ່ວມ.

ກອງປະຊຸມຍັງໄດ້ຮັບຟັງການຜ່ານບັນດາຂໍ້ຕົກລົງຂອງທ່ານເຈົ້າເມືອງວ່າດ້ວຍ ການແຕ່ງຕັ້ງ ຄະນະຮັບຜິດຊອບ ຂະບວນການ ສ້າງຄອບຄົວ ແລະ ບ້ານສາມັກຄີປອງດອງ ຂັ້ນເມືອງແລະຂັ້ນບ້ານ.

ທ່ານ ຄຳຜອງ ດວງວິໄລ ເຈົ້າເມືອງໆວັງວຽງ ໄດ້ຂຶ້ນຜ່ານເອກະສານຍົກສູງບົດບາດແນວລາວສ້າງຊາດໃນການເຕົ້າໂຮມຄວາມສາມັກຄີປະຊາຊົນບັນດາເຜົ່າ. ເມື່ອພວກເຮົາຫວນຄືນຫລັງກ່ອນ ນີ້ 68 ປີ ແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວແນວລາວສ້າງຊາດ ໃນປັດຈຸບັນແມ່ນຜູ້ສືບທອດ ແລະ ເສີມຂະຫຍາຍມູນເຊື້ອອັນສະຫງ່າລາສີຂອງ ແນວ ລາວອິດສະຫລະ, ແນວລາວຮັກຊາດໃນເມື່ອກ່ອນເຊິ່ງໄດ້ ເຕົ້າໂຮມຄວາມສາມັກຄີປະຊາຊົນລາວ ບັນດາເຜົ່າເຂົ້າໃນການຕໍ່ສູ້ກູ້ຊາດໃນເມື່ອກ່ອນ ແລະ ການປະຕິບັດສອງໜ້າທີ່ແຫ່ງການ ປົກປັກຮັກສາ ແລະ ພັດທະນາ ປະເທດຊາດໃນປັດຈຸບັນ.

ແນວລາວສ້າງ ຊາດເວລາໃດກໍ່ມີບົດບາດອັນ ໃຫຍ່ຫລວງໃນການປຸກລະດົມ, ຂົນຂວາຍ ແລະ ເຕົ້າໂຮມ ຄວາມສາມັກຄີຂອງປະຊາຊົນລາວ ບັນດາເຜົ່າພາຍໃຕ້ ການນຳພາຂອງພັກ. ໃນໄລຍະຕໍ່ສູ້ກູ້ຊາດຕ້ານກັບການຮຸກຮານ ແລະ ແຊກແຊງຂອງ ຈັກກະພັດລ່າເມືອງຂຶ້ນ; ບົດບາດຂອງແນວ ລາວອິດສະຫລະ ກໍ່ຄືແນວລາວສ້າງຊາດ ໄດ້ຕິດພັນກັບ ບົດບາດຊື່ສຽງຂອງບັນດາ ຜູ້ນໍາທີ່ເປັນຕົວແທນຈາກບັນດາຊັ້ນຄົນ, ເຜົ່າຊົນ ແລະ ພັກຝ່າຍການເມືອງ, ໄດ້ກາຍເປັນແຮງ ດຶງດູດເຕົ້າໂຮມທຸກຊັ້ນຄົນ, ເຜົ່າຊົນ, ສາສະໜາ, ນັບທັງຜູ້ຊົງ ຄຸນວຸດທິທີ່ຮັກຊາດ ທັງພາຍໃນ ແລະ ຕ່າງປະເທດເຂົ້າ

ຮ່ວມຂະບວນການຕໍ່ສູ້ປົດປ່ອຍ ຊາດອັນຍືດເຍື້ອຍາວນານທໍລະຫົດອົດທົນ. ມູນເຊື້ອ, ຄວາມສາມັກຄີປອງດອງ ແລະ ນໍ້າໃຈຕໍ່ສູ້ອາດຫານ ບໍ່ຍອມ ຈໍານົນ ໄດ້ຮັບການເສີມຂະຫຍາຍຢ່າງແຂງແຮງສູ່ລະດັບສູງຈົນໃນທີ່ສຸດກໍ່ສາມາດຍາດໄດ້ໄຊຊະນະຢ່າງສົມບູນ ແລະ ກ້າວເຖິງສະຖາປະນາສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2ທັນວາ 1975 ຢ່າງສະຫງ່າຜ່າເຜີຍ.

ທ່ານ ບຸນປັນ ພົມມະວົງ ຮອງເລຂາພັກເມືອງ ປະທານແນວລາວສ້າງຊາດເມືອງໄດ້ຂື້ນຜ່ານ ຂໍ້ຕົກລົງ ຂອງຄະນະກຳມະການ ສູນກາງແນວລາວສ້າງຊາດ ວ່າດ້ວຍ ມາດຕະຖານ ຄອບຄົວ ແລະ ບ້ານສາມັກຄີປອງດອງ.
ຫຼັງຈາກນັ້ນ, ປະທານແນວລາວສ້າງຊາດບ້ານ 23 ບ້ານກໍ່ໄດ້ຈັບມືກັນເພື່ອເປີດຂະບວນການ ການສ້າງຄອບຄົບ ແລະ ບ້ານ ສາມັກຄີປອງດອງ.

ຕອນທ້າຍ ທ່ານ ທອງສະຫວັນ ວົງສຳພັນ ປະທານແນວລາວສ້າງຊາດແຂວງວຽງຈັນ ກໍ່ຍັງໃຫ້ກຽດໂອ້ລົມວ່າ: ຈົ່ງພ້ອມກັນ ກຳແໜ້ນເນື້ອໃນເອກະສານ, ນິຕິກຳ ແລະ ບັນດາມາດຕະຖານຕ່າງໆ ຂອງການສ້າງຄອບຄົວ ແລະ ບ້ານ ສາມັກຄີປອງດອງ ໃຫ້ເຂົ້າໃຈ ຢ່າງເລິກເຊິ່ງ ທັງນີ້ ກໍເພື່ອເປັນບ່ອນອີງໃນການຈັດຕັ້ງ ປະຕິບັດໃຫ້ຖືກຕ້ອງ, ສອດຄ່ອງ, ມີຄວາມເປັນເອກະພາບ ແລະ ສາມາດຈັດຕັ້ງປະຕິບັດ ບັນລຸຕາມຈຸດປະສົງທີວາງໄວ້.

ຂ່າວ: ດາວວີ ສຸລິຍາ ເມືອງ ວັງວຽງ

Leave a Reply

Your email address will not be published. Required fields are marked *