ກອງປະຊຸມຝຶກອົບຮົມຫົວຂໍ້: ວິທີປະຕິບັດທີ່ດີສຳລັບໂຮງແຮມຂະຫນາດນ້ອຍ, ເຮືອນພັກແລະຮ້ານອາຫານ ທີ່ເມືອງວັງວຽງ ແຂວງວຽງຈັນ.

ໃນຕອນເຊົ້າຂອງວັນທີ 20 ສິງຫາປີ 2018 ທີ່ຜ່ານມາ, ຢູ່ທີ່ສະໂມສອນ ເມືອງວັງວຽງ ແຂວງວຽງຈັນ, ໄດ້ຈັດກອງປະຊຸມຝຶກອົບຮົມວິທີປະຕິບັດທີ່ດີສຳລັບໂຮງແຮມຂະຫນາດນ້ອຍ, ເຮືອນພັກແລະຮ້ານອາຫານ ທີ່ເມືອງວັງວຽງ ແຂວງວຽງຈັນ.

ໂດຍການເຂົ້າຮ່ວມຂອງທ່ານ ຄຳຟອງ ບົວທອງ ກຳມະການພັກແຂວງ ຫົວຫນ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງວຽງຈັນ, ມີທ່ານ ນາງ ດາລານີ ພົມມະວົງສາ ຮອງຫົວຫນ້າສະຖາບັນສື່ມວນຊົນ, ວັດທະນະທຳ ແລະ ທ່ອງທ່ຽວແຂວງວຽງຈັນ, ມີບັນດາທ່ານຮອງຫົວຫນ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງ, ວິຊາການ ແລະ ຜູ້ປະກອບການທຸລະກິດທາງດ້ານການໂຮງແຮມ, ເຮືອນພັກແລະ ຮ້ານອາຫານພາຍໃນເມືອງເຂົ້າຮ່ວມ.

ທ່ານ ນາງ ດາລານີ ພົມມະວົງສາ ຮອງຫົວຫນ້າສະຖາບັນສື່ມວນຊົນ, ວັດທະນະທຳ ແລະ ທ່ອງທ່ຽວແຂວງວຽງຈັນໄດ້ໃຫ້ກຽດຂື້ນກ່າວຈຸດປະສົງຂອງການຝຶກອົບຮົມວ່າ: ເພື່ອເປັນການຮັບປະກັນໃຫ້ແກ່ການບໍລິການແຂກທີ່ມາຢ້ຽມຢາມເມືອງວັງວຽງໃຫ້ມີຄວາມປະທັບໃຈ

ໂດຍສະເພາະປີທ່ອງທ່ຽວ 2018 ຈື່ງເຫັນວ່າມີຄວາມສຳຄັນ ແລະ ຈຳເປັນຕ້ອງໄດ້ມີການຍົກລະດັບຄວາມຮູ້ ແລະ ທັກສະການບໍລິການ ເພື່ອໃຫ້ໄດ້ຄຸນນະພາບຂອງການບໍລິການ, ມີຄວາມເຂົ້າໃຈກ່ຽວກັບລູກຄ້າ, ວິທີປະຕິບັດທີ່ດີຕໍ່ລູກຄ້າ ແລະ ການປັບປຸງການບໍລິການຂອງຕົນໃຫ້ມີຄຸນນະພາບ ເກີດມີຄວາມປະທັບໃຈ ແລະ ຮັບປະກັນຄຸນນະພາບປະສົບການທີ່ດີຂອງນັກທ່ອງທຽວທີ່ມາຢ້ຽມຢາມເມືອງວັງວຽງ.

ທ່ານ ຄຳຟອງ ບົວທອງ ກຳມະການພັກແຂວງ ຫົວຫນ້າພະແນກຖະແຫຼງຂ່າວ,ວັດທະນະທຳ ແລະ ທ່ອງທ່ຽວແຂວງວຽງຈັນ ຍັງໄດ້ເນັ້ນໃຫ້ນັກສຳມະນາກອນໃນຄັ້ງນີ້ ເອົາໃຈໃສ່ບັນດາເນື້ອໃນສຳຄັນຄື: ຄຸນນະພາບການບໍລິການ ແລະ ການເອົາໃຈໃສ່ຕໍ່ລູກຄ້າ, ວິທີປະຕິບັດທີ່ດີ ການບໍລິການພາກສ່ວນຫນ້າ ( ການເວົ້າຈາທີ່ເປັນມິດແລະ ໝັ້ນໃຈ, ການທັກທາຍ, ການໃຫ້ຂໍ້ມູນ, ການເອົາໃຈໃສ່ ແລະ ການແກ້ໄຂບັນຫາຕໍ່ແຂກ ), ວິທີປະຕິບັດທີ່ດີ ການບໍລິການອາຫານ ແລະ ເຄື່ອງດື່ມ, ການກະກຽມໂຕະອາຫານ ການບໍລິການອາຫານເຊົ້າ, ວິທີປະຕິບັດທີ່ດີ ການບໍລິການແມ່ເຮືອນ ການທຳຄວາມສະອາດຫ້ອງນອນ ຫ້ອງນ້ຳ, ການປູຕຽງ.

ການຝຶກອົບຮົມຈັດຂຶ້ນໂດຍ: ສະຖາບັນສື່ມວນຊົນ, ວັດທະນະທຳ ແລະ ທ່ອງທ່ຽວແຂວງວຽງຈັນ ແລະ ໄດ້ດຳເນີນໄປເປັນເວລາ 3 ວັນ, ນັບແຕ່ວັນທີ 19 – 23 ສິງຫາ 2018 .

Leave a Reply

Your email address will not be published. Required fields are marked *