ພິທີເຊັນບົດບັນທຶກຄວາມເຂົ້າໃຈໃນການຮ່ວມມືການດຳເນີນໂຄງການສົ່ງເສືມກະສິກຳອິນຊີເປັນສິນຄ້າ ຢູ່ເມືອງວັງວຽງ.

ໃນຕອນແລງຂອງວັນທີ 10 ສິງຫາ 2018 ນີ້, ຢູ່ທີ່ຫ້ອງການກະສິກຳແລະປ່າໄມ້ເມືອງວັງວຽງ ແຂວງວຽງຈັນ, ໄດ້ ຈັດພິທີເຊັນບົດບັນທຶກຄວາມເຂົ້າໃຈໃນການຮ່ວມມືການດຳເນີນໂຄງການສົ່ງເສືມກະສິກຳອິນຊີເປັນສິນຄ້າ ຢູ່ເມືອງວັງວຽງ,

ໂດຍການເຂົ້າຮ່ວມຂອງທ່ານ ຄຳຜອງ ດວງວິໄລ ກຳມະການພັກແຂວງເລຂາພັກເມືອງ ເຈົ້າເມືອງໆວັງວຽງ, ມີທ່ານ ຊົງໄຊ ລັດຕະນະຄຳເພັດ ກຳມະການພັກເມືອງຫົວຫນ້າຫ້ອງການກະສິກຳແລະປ່າໄມ້ເມືອງ, ມີທ່ານ ທອງດຳ ພົມວິຈິດ ຫົວຫນ້າສະມາຄົມພັດທະນາກະສິກຳ ແລະສິ່ງແວດລ້ອມແບບຢືນຍົງ ( SAEDA ), ມີບັນດາທ່ານກຳມະການພັກເມືອງ, ຫົວຫນ້າຫ້ອງການທີ່ກ້ຽວຂ້ອງແລະພະນັກງານວິຊາການເຂົ້າຮ່ວມ.

ໃນພິທີທ່ານໄດ້ຜ່ານຂໍ້ຕົກລົງວ່າດ້ວຍ: ການເຫັນດີຮັບເອົາການຮ່ວມມື ແລະ ການສະໜັບສະໜູນຈາກສະມາຄົມພັດທະນາກະສິກຳ ແລະສິ່ງແວດລ້ອມແບບຢືນຍົງ ( SAEDA ) ເພື່ອສົ່ງເສີມກະສິກຳອິນຊີເປັນສິນຄ້າ, ຂໍ້ຕົກລົງວ່າດ້ວຍ: ການແຕ່ງຕັ້ງຄະນະຊີ້ນຳ ແລະ ຄະນະປະສານງານໂຄງການສົ່ງເສີມກະສິກຳອິນຊີເປັນສິນຄ້າ.
ທ່ານ ທອງດຳ ພົມວິຈັດ ຫົວຫນ້າສະມາຄົມພັດທະນາກະສິກຳ ແລະສິ່ງແວດລ້ອມແບບຢືນຍົງ ( SAEDA )ໄດ້ຂື້ນຜ່ານຈຸດປະສົງຂອງໂຄງການວ່າ: ຊາວກະສິກອນຂະໜາດນ້ອຍຂອງບ້ານເປົ້າໝາຍໃນເມືອງວັງວຽງຈະໄດ້ຮັບການປະກອບສ່ວນໃນຜັນຂະຫຍາຍຍຸດທະສາດການພັດທະນາຜະລິດຕະພັນກະສິກຳອິນຊີເປັນສິນຄ້າ, ການປັບປຸງການຜະລິດກະສິກຳອິນຊີ ແລະ ໂອກາດໃນການເຂົ້າເຖີງການຕະຫລາດທີ່ດີຂຶ້ນ, 10 ບ້ານເປົ້າໝາຍ 200 ຄົວເຮືອນຂອງຊາວກະສິກອນໂດຍສະເພາະຊົນເຜົ່າ ແມ່ນຈະໄດ້ຮັບການປັບປຸງຜົນຜະລິດເຂົ້າ ແລະຜັກອິນຊີໄດ້ຕະຫຼອດປີ, ຢ່າງໜ້ອຍຊາວກະສິກອນຄອບຄົວເປົ້າໝາຍ 40% ຄົວເຮືອນຈະມີລາຍໄດ້ເພີ້ມຂຶ້ນຢ່າງຕ່ຳ 20% ຈາກການຜະລິດກະສິກຳອິນຊີ, ອົງການຈັດຕັ້ງຊາວກະສິກອນໃນເມືອງວັງວຽງຈະມີຄວາມສາມາດການບໍລິຫານອົງກອນທີ່ມີຄວາມໂປງໄສ. ທີ່ຕັ້ງຂອງໂຄງການແມ່ນຢູ່ທີ່ຫ້ອງການກະສິກຳແລະປ່າໄມ້ເມືອງວັງວຽງ ໃນນັ້ນມີງົບປະມານ 299 ລ້ານກວ່າກີບ. ແລະໄດ້ຮັບທຶນການສະໜັບສະໜູນຈາກ : ອົງການອາຫານເພື່ອໂລກ-ປະເທດເຢຍລະມັນ ( Bread for the World-BMZ ).

ພ້ອມນັ້ນ, ຍັງໄດ້ຮັບຊົມວີດີໂອ ຜ່ານລະບົບສາຍຈໍໂປແຈ໋ກເຕີ ກ່ຽວກັບຄວາມສຳເລັດໃນການຈັດຕັ້ງປະຕິບັດຂອງໂຄງການສົ່ງເສີມກະສິກຳອິນຊີເປັນສິນຄ້າຢູ່ແຂວງຊຽງຂວາງ ແລະ ໄດ້ຟັງການອະທິບາຍລາຍລະອຽດກິດຈະກຳຕ່າງໆທີ່ຈະໄດ້ຈັດຕັ້ງປະຕິບັດແຕ່ລະໄລຍະ.

ຫລັງຈາກນັ້ນ, ບັນດາທ່ານເຈົ້າເມືອງວັງວຽງແລະຫ້ອງການທີ່ກ້ຽວຂ້ອງກໍ່ໄດ້ປະກອບຄຳເຫັນກ່ຽວກັບ ກຸ່ມບ້ານທີ່ເປັນເປົ້າໝາຍຂອງໂຄງການສົ່ງເສີມກະສິກຳອິນຊີເປັນສິນຄ້າຢູ່ເມືອງວັງວຽງ.

ການເຊັນບົດບັນທຶກຄວາມເຂົ້າໃຈໃນການຮ່ວມມືການດຳເນີນໂຄງການສົ່ງເສືມກະສິກຳອິນຊີເປັນສິນຄ້າ ຢູ່ເມືອງວັງວຽງ. ລະຫວ່າງ ຫ້ອງການກະສິກຳແລະປ່າໄມ້ເມືອງວັງວຽງ ກັບ ສະມາຄົມມພັດທະນາກະສິກຳ ແລະ ສິ່ງແວດລ້ອມແບບຍືນຍົງ ( SAEDA ) ໂດຍສ່ອງໜ້າອຳນາດການປົກຄອງເມືອງວັງວຽງ.

Leave a Reply

Your email address will not be published. Required fields are marked *