ແຂວງວຽງຈັນ ປາຖະກະຖາວັນສ້າງຕັ້ງແມ່ຍິງລາວ ຄົບຮອບ 63 ປີ.

ໃນຕອນເຊົ້າມື້ນີ້ ວັນທີ 24 ກໍລະກົດ 2018, ໄດ້ມີພິທີປາຖະກະຖາ ວັນສ້າງຕັ້ງສະຫະພັນແມ່ຍິງລາວ ຄົບຮອບ 63 ປີ ຢູ່ທີ່ສະໂມສອນໃຫຍ່ຂອງແຂວງ.

ໃຫ້ກຽດຂຶ້ນປາຖະກະຖາເລົ່າມູນເຊື້ອວັນດັ່ງກ່າວ ໂດຍແມ່ນ ທ່ານ  ນາງ ບົວຈັນ ສີຫານາດ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ, ໃຫ້ກຽດເຂົ້າຮ່ວມມີ ທ່ານ ນາງ ສິງຄຳ ຄົງສະຫວັນ ຮອງເຈົ້າແຂວງໆວຽງຈັນ, ມີບັນດາຄະນະປະຈໍາ, ກໍາມະການພັກແຂວງ, ແມ່ປ້າອາວຸໂສບໍານານ, ຄອບຄົວການນໍາ, ຫົວໜ້າພະແນກການ, ອົງການ, ກົມກອງ, ຕາງໜ້າໜ່ວຍສະຫະພັນແມ່ຍິງ ແລະ ເມືອງອ້ອມຂ້າງເຂົ້າຮ່ວມ.

 

ໃນໂອກາດນີ້ ທ່ານ ນາງ ບົວຈັນ ສີຫານາດ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ ໄດ້ຍົກໃຫ້ເຫັນເຖິງປະຫວັດຄວາມເປັນມາ, ການເຕີບໃຫຍ່ຂະຫຍາຍຕົວ ຂອງອົງການຈັດຕັ້ງສະຫະພັນແມ່ຍິງລາວ ແລະ ຜົນງານການເຄື່ອນໄຫວທີ່ພົ້ນເດັ່ນ ຂອງສະຫະພັນແມ່ຍິງລາວ ແລະ ແມ່ຍິງລາວບັນດາເຜົ່າ

ທັງນີ້ກໍ່ເພຶ່ອເຮັດໃຫ້ພະນັກງານ, ສະມາຊິກສະຫະພັນແມ່ຍິງ ແລະ ແມ່ຍິງລາວບັນດາເຜົ່າ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ຕໍ່ກັບມູນເຊື້ອປະຫວັດສາດແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວຂອງສະຫະພັນແມ່ຍິງໃນທົ່ວປະເທດ, ຮັບຮູ້ການເຄື່ອນໄຫວຂອງສະຫະພັນແມ່ຍິງລາວ ຕໍ່ຂະບວນການເຄື່ອນໄຫວຂອງແມ່ຍິງ ເປັນຕົ້ນແມ່ນການປະກອບສ່ວນ ໃນພາລະກິດຕໍ່ສູ້ປົດປ່ອຍຊາດ ໃນໄລຍະປີ 1955-1975 ແລະ ການປະກອບສ່ວນ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃນໄລຍະປີ 1975-2018

ພ້ອມກັນນີ້ ສະຫະພັນແມ່ຍິງລາວ ຍັງໄດ້ນໍາພາສະມາຊິກ ປະຕິບັດຄໍາຂັວນ, ຂໍ້ແຂ່ງຂັນ ໃນແຕ່ລະສະໄໝຂອງກອງປະຊຸມໃຫຍ່ ສອດຄ່ອງກັບມະຕິຕ່າງໆຂອງພັກ, ໄດ້ຫັນເອົາວຽກງານແຂ່ງຂັນ 3 ດີ ຕິດພັນກັບຂະບວນການ 3 ສ້າງ, ຂະບວນການແຂ່ງຂັນຮັກຊາດ ແລະ ພັດທະນາ ຕາມພາລະບົດບາດໜ້າທີ່ຂອງຕົນ.

 

ທ່ານ ນາງ ຈັນທະບູນ ໂພສະລາດ ປະທານສະຫະພັນແມ່ຍິງແຂວງວຽງຈັນ ໄດ້ລາຍງານຕໍ່ພິທີວ່າ: ໃນໄລຍະ 1 ປີ ຜ່ານມາ ຄະນະສະຫະພັນແມ່ຍິງແຕ່ລະຂັ້ນ ໄດ້ເປັນເຈົ້າການຊີ້ນຳ-ນຳພາ ໃນການຈັດຕັ້ງປຕິບັດຂໍ້ແຂ່ງຂັນ3ດີ ຕິດພັນກັບຂໍ້ແຂ່ງຂັນຮັກຊາດ-ພັດທະນາ ແລະ ວຽກງານ 3 ສ້າງ ສາມາດປະເມີນ ແລະ ປະກາດຮັບຮອງເມືອງສະຫະພັນແມ່ຍິງ 3 ດີ ຄັ້ງທີ 2 ໄລຍະ ປີ 2015-2017 ສຳເລັດທັງ 11 ເມືອງທົ່ວແຂວງ,ຮັບຮອງໜ່ວຍສະຫະພັນແມ່ຍິງ 3 ດີ ອ້ອມຂ້າງແຂວງ ໄດ້ 20 ໜ່ວຍ,ໜ່ວຍອ້ອມຂ້າງເມືອງໄດ້ 216 ໜ່ວຍ,ບ້ານສະຫະພັນແມ່ຍິງ 3 ດີ ໄດ້ 273 ບ້ານ,ສ້າງສະຫະພັນແມ່ຍິງ 3 ດີ ປະເພດ 1 ໄດ້ 35 ພັນກວ່າຄົນ, ປະເພດ 2 ໄດ້ 2 ພັນກວ່າຄົນ.

 

Leave a Reply

Your email address will not be published. Required fields are marked *