ເມືອງຊະນະຄາມ ຈັດພິທີປິດ ຊຸດຝຶກອົບຮົມ ວຽກງານສຳຫຼວດ ວັດແທກ ການຂື້ນທະບຽນອອກໃບຕາດິນ ແລະ ມອບ – ຮັບໃບຕາດິນ

ໃນວັນທີ 16 ກໍລະກົດ 2018 ທີ່ຜ່ານມາ ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງຊະນະຄາມ ແຂວງວຽງຈັນ ໄດ້ປິດຊຸດຝຶກອົບຮົມ ວຽກງານສຳຫຼວດວັດແທກ ການຂື້ນທະບຽນອອກໃບຕາດິນ ແລະ ມອບ – ຮັບ ໃບຕາດິນ ຢູ່ທີ່ຫ້ອງປະຊຸມຂອງເມືອງຊະນະຄາມ ແຂວງວຽງຈັນ

ໂດຍການເປັນກຽດເຂົ້າຮ່ວມຂອງທ່ານ ສົມມາດ ພົນເສນາ ກຳມະການສູນກາງພັກ ລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ມີທ່ານ ອຸ່ນແສງ ແກ້ວດາວັນ ຄະນະປະຈຳພັກແຂວງວຽງຈັນ ຫົວໜ້າຄະນະຈັດຕັ້ງແຂວງວຽງຈັນ ຜູ້ຊີ້ນຳເມືອງຊະນະຄາມ ມີຄະນະນຳຂັ້ນກົມ ຂັ້ນແຂວງຂັ້ນເມືອງ ນັກຝຶກອົບຮົມ ທັງ 8 ໂຕເມືອງຂອງແຂວງວຽງຈັນ ແລະ ພໍ່ແມ່ປະຊາຊົນ ກໍ່ເປັນກຽດເຂົ້້າຮ່ວມ 1 ຮ້ອຍກ່ວາຄົນ.

ໃນພິທີດັ່ງກ່າວທ່ານແກ້ວ ພິມມະວົງ ຮອງເຈົ້າເມືອງ ເມືອງຊະນະຄາມ ໄດ້ລາຍງານເຖິງສະພາບການຈັດຕັ້ງປະຕິບັດການຝຶກອົບຮົມ ວຽກງານການສຳຫຼວດວັດແທກ ຂື້ນທະບຽນອອກໃບຕາດິນ ຢູ່ເມືອງຊະນະຄາມ ແຂວງວຽງຈັນ ໂດຍໄດ້ກຳນົດເວລາ 6 ເດືອນ ແລະ ໄດ້ກຳນົດເປັນ 3 ໄລຍະ ຄື: ໄລຍະການຝຶກອົບຮົມ,ໄລຍະການຊຸກຍູ້ຕິດຕາມ ແລະ ໄລຍະການຖອດຖອນບົດຮຽນ , ໂດຍໄດ້ກຳນົດເອົາບ້ານເປົ້າໝາຍ 4 ບ້ານຄື ບ້ານປາກພາງ,ບ້ານດົງຂ່າ, ບ້ານ ໂນນສະຫວັນ,ບ້ານ ນໍ້າກວນສະເພາະນັກຝຶກອົບເຮົາທີ່ມາເຂົ້າຮ່ວມ

ໃນຄັ້ງນີ້ມີວິຊາການຈາກກົມທີ່ດິນເຂົ້າຮ່ວມ 8 ທ່ານ,ວິຊາການຈາກ ພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມແຂວງວຽງຈັນ 3 ທ່ານ ,ວິຊາການ ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມທັງ 8 ໂຕເມືອງ 21 ທ່ານ,ຈາກເມືອງຊະນະຄາມ 13 ທ່ານ ລວມທັງໜົດທີ 45 ທ່ານ.

ຈຸດປະສົງ ຂອງວຽກງານຝຶກອົບຮົມ ວຽກງານ ສຳຫຼວດວັດແທກການຂື້ນທະບຽນອອກໃບຕາດິນໃນຄັ້ງນີ້ກໍ່ເພື່ອ ສ້າງຄວາມເຂັ້ມແຂງ ໃຫ້ພະນັກງານວິຊາການຂັ້ນທ້ອງຖິ່ນ ໃນການນຳໃຊ້ເຕັກນິກ ສຳຫຼວດ ວັດແທກຂື້ນທະບຽນ ອອກໃບຕາດິນ ໃຫ້ມີປະສິດທິພາບສູງສຸດ ເພື່ອເກັບກຳຂໍ້ມູນທີ່ດິນທຸກຕອນ ໃຫ້ເຂົ້າສູ່ລະບົບ ຖານຄຸ້ມຄອງຂໍ້ມູນທີ່ດິນໃນຂອບເຂດທົ່ວເມືອງຊະນະຄາມ ໃຫ້ມີລັກຊະນະລວມສູນ ແລະ ຍືນຍົງ ໃຫ້ຖືກຕ້ອງຕາມຮູບແບບແຜນຍຸດທະສາດ ຂອງກົມທີ່ດິນ ກະຊວງຊັບພະຍາກອນ ທຳມະຊາດ ແລະ ສິ່ງແວດລ້ອມ ທີ່ວາງອອກ.

ນອກຈາກນີ້ໃນພິທີດັ່ງກ່າວຍັງໄດ້ ມອບ – ຮັບ ໃບຕາດິນໃຫ້ປະຊາຊົນ ບ້ານປາກພາງ ຈໍານວນ 113 ໃບ ແລະ ປະຊາຊົນບ້ານສິພູມ ຈຳນວນ 23 ໃບ ໂດຍການເປັນສັກຂີພິຍານຈາກການນໍາຂັ້ນກະຊວງ,ຂັ້ນແຂວງ,ຂັ້ນເມືອງ ແລະ ຍັງຈະສືບຕໍ່ອອກໃບຕາດິນໃຫ້ປະຊາຊົນທີ່ຍັງບໍ່ທັນສຳເລັດໃນຂັ້ນຕໍ່ໄປ.

Leave a Reply

Your email address will not be published. Required fields are marked *