ກອງປະຊຸມຄົບຄະນະບໍລິຫານງານ ສະຫະພັນກຳມະບານເມືອງວຽງຄຳ ເທຶື່ອທີ 5 ສະໄໝທີ III

ເພື່ອເປັນການສະຫລຸບຕີລາຄາຜົນຂອງການຈັດຕັ້ງປະຕິບັດວຽກງານກຳມະບານໃນໄລຍະຜ່ານມາ, ສະຫະພັນກຳມະບານເມືອງວຽງຄຳ ໄດ້ເປີດກອງປະຊຸມຄົບຄະນະບໍລິຫານງານ ເທື່ອທີ 5 ສະໄໝທີ III ຂື້ນໃນວັນທີ 11 / 07 / 2018 ຢູ່ທີ່ຫ້ອງປະຊຸມຂອງຫ້ອງວ່າການປົກຄອງເມືອງວຽງຄຳ ແຂວງວຽງຈັນ,

ໂດຍການເປັນປະທານຂອງທ່ານ ໂພຄຳ ຊະນະຫົງ ຄະນະບໍລິຫານງານສະຫະພັນກຳມະບານແຂວງວຽງຈັນ ປະທານສະຫະພັນກຳມະບານເມືອງວຽງຄຳ, ໃຫ້ກຽດເຂົ້າຮ່ວມໂດຍ ທ່ານ ບົວລຳແພງ ວາງປະດີດ ຮອງປະທານສະຫະພັນກຳມະບານແຂວງວຽງຈັນ, ທ່ານ ພອນແກ້ວ ຂຸນພົນ ກຳມະການພັກແຂວງ, ເລຂາຄະນະບໍລິຫານງານພັກເມືອງເຈົ້າເມືອງ – ເມືອງວຽງຄຳ, ມີບັນດາຫົວໜ້າຫ້ອງການ, ຮອງຫ້ອງການ, ປະທານກຳມະບານຮາກຖານທົ່ວເມືອງວຽງຄຳ ແລະ ບັນດາແຂກເຂົ້າຮ່ວມທັງໝົດ 51 ສະຫາຍ, ຍິງ 20 ສະຫາຍ.

ໃນກອງປະຊຸມ ທ່ານ ໂພຄຳ ຊະນະຫົງ ໃຫ້ກຽດຂື້ນຜ່ານຮ່າງບົດສະຫລຸບການຈັດຕັ້ງປະຕິບັດມະຕິກອງປະຊຸມສາມັນຄົບຄະນະບໍລິຫານງານສະຫະພັນກຳມະບານເມືອງວຽງຄຳ ເທື່ອທີ 4 ສະໄໝທີ III ແລະ ທິດທາງແຜນການປີ 2018

ໃນບົດສະຫລຸບຍັງໄດ້ໃຫ້ຮູ້ສະຫະພັນກຳມະບານເມືອງວຽງຄຳ ມີສະມາຊິກກຳມະບານທັງໝົດ 611 ສະຫາຍ, ຍິງ 373 ສະຫາຍ, ມີພະນັກງານກຳມະບານອາຊີບ 08 ສະຫາຍ, ຍິງ 05 ສະຫາຍ, ມີ 31 ຮາກຖານ, ມີ 45 ໜ່ວຍຂື້ນກັບ, ມີສະມາຊິກກອງທຶນທັງໝົດ 782 ສະຫາຍ, ຍິງ 462 ສະຫາຍ.

ໄດ້ປະຕິບັດນະໂຍບາຍຕໍ່ສະມາຊິກເກີດລູກ, ນອນໂຮງໝໍ, ຜ່າຕັດຕ່າງໆ ຕາມລະບຽບຂອງກອງທຶນວາງອອກ, ໄດ້ຍົກໃຫ້ເຫັນ ຜົນງານທີ່ພົ້ນເດັ່ນທີ່ສະຫະພັນກຳມະບານເມືອງ ໄດ້ເອົາໃຈໃສ່ຕິດຕາມກວດກາແກ້ໄຂ ແລະ ໄດ້ຂະຫຍາຍກອງທຶນຊ່ວຍເຫລືອເຊິ່ງກັນ ແລະ ກັນ, ກອງທຶນທານຸເຄາະເຂົ້າສູ້ບ້ານ 3 ສ້າງ, ປະຈຸບັນແມ່ນສາມາດສ້າງຕັ້ງໜ່ວຍກອງທຶນຢູ່ບ້ານ 3 ສ້າງໄດ້ 02 ບ້ານຄື: ບ້ານດອນກວດ ແລະ ບ້ານປາກກະຍຸງ, ກຳລັງລົງຊຸກຍູ້ອີກ 03 ບ້ານຄື: ບ້ານນາເຄືອ, ບ້ານໂນນສະຫວ່າງ ແລະ ບ້ານໂພນໝີເໜືອ ເພື່ອໃຫ້ວຽກງານກຳມະບານລົງສູ້ບ້ານ 3 ສ້າງໃຫ້ເປັນໄປຕາມທິດຊີ້ນຳຂອງຂັ້ນເທິງວາງອອກ.

ຈາກນັ້ນຕໍ່ກອງປະຊຸມດັ່ງກ່າວຍັງໄດ້ຮັບຟັງແຜນການສູ້ຊົນປະກາດເມືອງວຽງຄຳ ເປັນສະຫະພັນກຳມະບານ 5 ເປັນເຈົ້າຮອບທີ 2 ປະຈຳປີ 2016 – 2018 ໃນນັ້ນໄດ້ມີການປະກອບຄໍາເຫັນຈາກຄອບຄົວຕົວແບບກໍ່ຄື: ຄອບຄົວ ທ່ານ ວັນເຄນ ແສນມັງຄະລະ ແລະ ປະທານກຳມະບານ ມສ ປາກແຈ້ງ ເພື່ອພ້ອມກັນຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ທີ່ສູນກາງສະຫະພັນກຳມະບານລາວ ໄດ້ວາງອອກໃຫ້ປະກົດຜົນເປັນຈິງ.

ທ່ານ ພອນແກ້ວ ຂຸນພົນ

ຕອນທ້າຍກອງປະຊຸມຍັງໄດ້ຮັບຟັງການໂອ້ລົມຂອງ ທ່ານ ພອນແກ້ວ ຂຸນພົນ ກຳມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງ – ເມືອງວຽງຄຳ ທ່ານໄດ້ກ່າວຍ້ອງຍໍຊົມເຊີຍຕໍ່ກັບຜົນງານທີ່ຍາດມາໄດ້ໃນໄລຍະຜ່ານມາ, ທ່ານຍັງໄດ້ເນັ້ນໃຫ້ເອົາໃຈໃສ່ ບັນດາຈຸດອ່ອນ ແລະ ຂໍ້ຄົງຄ້າງ ທີ່ໄດ້ກ່າວໃນບົດສະຫລຸບນັ້ນ ຈົ່ງພ້ອມກັນຊອກຫາວິທີເພື່ອແກ້ໄຂໃຫ້ປະກົດຜົນເປັນຈິງ, ເອົາໃຈໃສ່ປະຕິບັດຂໍ້ແຂ່ງຂັນ 5 ເປັນເຈົ້່າໃຫ້ມີບາດກ້າວ ທີ່ກ້າວໜ້າ ແລະ ຂະຫຍາຍຕົວ,

ທ່ານ ຍັງໄດ້ເນັ້ນໜັກໃຫ້ເອົາໃຈໃສ່ຕື່ມ ໃນການປະຕິບັດກົດລະບຽບຂອງກຳມະບານລາວວາງອອກເປັນຕົ້ນແມ່ນລະບຽບກອງທຶນທີ່ວາງອອກ, ພ້ອມກັນເອົາໃຈໃສ່ສຶກສາອົບຮົມວຽກການເມືອງແນວຄິດ ໃຫ້ບັນດາສະມາຊິທີ່ຢູ່ໃນຄວາມຮັບຜິດຊອບຂອງຕົນ ແລະ ເອົາໃຈໃສ່ຜັນຂະຫຍາຍເນື້ອໃນຈິດໃຈກອງປະຊຸມຄົບຄະນະບໍລິຫານງານໃນຄັ້ງນີ້ໃຫ້ປະກົດຜົນເປັນຈິງ.

ຂ່າວ: ໄຊປັນຍາ

Leave a Reply

Your email address will not be published. Required fields are marked *