ປີ 2018 ເມືອງຊະນະຄາມ ສາມາດປ່ອຍປາລົງສູ່ທຳມະຊາດໄປແລ້ວຫຼາຍກວ່າ 1 ລ້ານໂຕ

ໃນຕົ້ນເດືອນທີ່ຜ່ານມາ ( 12 ກໍລະກົດ 2018 ) ຫ້ອງການກະສິກຳ ແລະ ປ່າໄມ້ເມືອງຊະນະຄາມ ໄດ້ຈັດໃຫ້ມີພິທີປ່ອຍປາ ຢູ່ທີ່ຝາຍນໍ້າມີ້ ຂອງບ້ານນໍ້າກວນ ເມືອງຊະນະຄາມ ແຂວງວຽງຈັນ

ໂດຍພາຍໃຕ້ການເປັນປະທານຂອງທ່ານ ສະໝານ ວິເສດຍະພົງ ເລຂາພັກເມືອງ ເຈົ້າເມືອງ ເມືອງຊະນະຄາມ, ມີທ່ານ ພັທ ພອນໄຊ ສັກບັນດິດ ຮອງເລຂາພັກເມືອງ ຫົວໜ້າກອງບັນຊາການ ທະຫານ ເມືອງຊະນະຄາມ, ມີຄະນະປະຈຳພັກເມືອງ, ກຳມະການພັກເມືອງ ຫົວໜ້າຫ້ອງການ ພະນັກງານ ອ້ອມຂ້າງເມືອງ ນັກທຸລະກິດ ພໍ່ຄ້າຊາວຂາຍ ອຳນາດການປົກຄອງບ້ານ ແລະ ພໍ່ແມ່ປະຊາຊົນບ້ານນໍ້າກວນກໍ່ເປັນກຽດເຂົ້າຮ່ວມເປັນຈຳນວນຫຼວງຫຼາຍ.

ໃນພິທີດັ່ງກ່າວ ທ່ານ ບຸນຊ່ວງ ວັນສີ ກໍາມະການພັກເມືອງ ຫົວໜ້າຫ້ອງການ ກະສິກໍາ ແລະ ປ່າໄມ້ເມືອງ ໄດ້ສະຫຼຸບການປ່ວຍປາໃນປີນີ້ແມ່ນສາມາດ ປ່ວຍປາໄດ້ 3 ຄັ້ງ ເຊັ່ນ: ຄັ້ງທີ 1 ປ່ອຍໄດ້ 1ແສນໂຕ ຄັ້ງທີ 2 ປ່ອຍໄດ້ 1 ແສນໂຕ ແລະ ຄັ້ງທີ 3 ສາມາດປ່ອຍໄດ້ 9 ກ່ວາແສນໂຕ

ສະຫລຸບ ລວມແລ້ວ ປີນີ້ສາມາດປ່ອຍປາໄດ້ທັງໜົດ 1 ລ້ານກວ່າໂຕ ເຊີ່ງໄດ້ເພີ້ມຂື້ນຫຼາຍກວ່າປີທີ່ຜ່ານມາ ສະເພາະປາທີ່ນໍາມາປ່ອຍໃນຄັ້ງນີ້ແມ່ນທາງເມືອງ ໄດ້ປະກອບສ່ວນຈຳນວນ 200 ຖົງ ແລະ ທາງກົມປະມົງນໍ້າຈີດ ເມືອງຊຽງຄານ (ປະເທດໄທ) ປະກອບສ່ວນ 400 ຖົງ, ເຊີ່ງປາທີ່ນໍາມາປ່ອຍໃນຄັ້ງນີ້ ປະກອບມີປາດຸກ, ປາຕະພຽນ, ປາເກັດແລບ, ປາອີ່ສົບ, ປາໄນ, ປາເອີນ ແລະ ປາບຶກ

ພ້ອມນີ້ກໍ່ໄດ້ກຳນົດເອົາຈຸດເຂດດັ່ງກ່າວເປັນເຂດວັງສະຫງວນຂອງປາ ເຊີ່ງມີຈຸດພິກັດຄວາມຍາວຂອງວັງສະຫງວນ ແຕ່ຈຸດເໜືອຫາຈຸດໃຕ້ມີ 360 ແມັດ, ຄວາມກວ້າງຂອງວັງສະຫງວນກຳນົດເອົາຕາມຂອບເຂດທັງສອງຟາກຝັ່ງມີໄລຍະຫ່າງກັນ 120 ແມັດ , ລວມເນື້ອທີ່ເປັນວັງສະງວນທັງໜົດ 43.200ຕາແມັດ.

ຈຸດປະສົງໃນການປ່ອຍປາ ໃນຄັ້ງນີ້ ກໍ່ເພື່ອ ອານຸລັກຮັກສາ ຊະນິດພັນປາ ແລະ ສັດນໍ້າຊະນະນິດອື່ນ ໃຫ້ຍືນຍົງຢູ່ກັບແຫຼ່ງນໍ້າທຳມະຊາດຕະຫຼອດໄປ ເພື່ອຮັບປະກັນໃຫ້ແກ່ການຄຸ້ມຄອງແຫຼ່ງທີ່ຢູ່ອາໃສ ບ່ອນວາງໄຂ່ ແລະ ບ່ອນແຜ່ພັນຂອງປາຊະນິດພັນປາລວມທັງສັດນໍ້າຊະນິດອື່ນ ໄດ້ຢ່າງມີປະສິດທິຜົນ, ເພື່ອຢຸດຕິການໃຊ້ເຄື່ອງມືຫາປາແບບດັບສູນ ເຊັ່ນ:ການນໍາໃຊ້ໄຟຟ້າຊ໊ອດປາ,ການນຳໃຊ້ລະເບີດ ແລະ ວັດຖຸອື່ນໆ ເພື່ອບັນລຸຄາດໝາຍ ໃຫ້ແກ່ການວາງໄຂ່ ຂອງຊະນິດພັນປາທີ່ຂື້ນມາປະສົມພັນ ແລະ ວາງໄຂ່ໃຫ້ມີຜົນສຳເລັດ ພ້ອມທັງເປັນບ່ອນຄໍ້າສະບຽງອາຫານໃຫ້ຫຼາຍຂື້ນ.

Leave a Reply

Your email address will not be published. Required fields are marked *