ເມືອງຫມື່ນ ເປີດຊຸດຝຶກອົບຮົມທິດສະດີການເມືອງ ແລະ ການປົກຄອງໃຫ້ຄະນະພັກບ້ານ,ນາຍບ້ານຢູ່ເມືອງໝື່ນ ແຂວງວຽງຈັນ

ພິທີເປີດຊຸດຝຶກອົບຮົມທິດສະດີການເມືອງ ແລະ ການປົກຄອງໃຫ້ຄະນະພັກບ້ານ,ນາຍບ້ານ ຢູ່ເມືອງໝື່ນ ແຂວງວຽງຈັນ ໄດ້ຈັດຂຶ້ນໃນຕອນເເລງຂອງວັນທີ 25 ພຶດສະພາ 2018 ນີ້ ຢູ່ສະໂມສອນໃຫຍ່ຫ້ອງວ່າການປົກຄອງ ເມືອງໝື່ນ ແຂວງວຽງຈັນ

ເປັນກຽດເຂົ້າຮ່ວມໂດຍສະຫາຍ ພູວອນ ບຸນວິໄລ ກຳມະການພັກແຂວງ ເລຂາພັກເມືອງ,ເຈົ້າເມືອງ – ເມືອງໝື່ນ,ມີທ່ານ ອາຈານ ທອງວັນ ຈັນທະລາ ຮອງຫົວໜ້າໂຮງຮຽນທິດສະດີການເມືອງ – ການປົກຄອງແຂວງວຽງຈັນ , ມີຄະນະປະຈຳພັກເມືອງ,ກຳມະການພັກເມືອງ,ຫົວໜ້າຫ້ອງການ ,ມີເລຂາພັກບ້ານ,ນາຍບ້ານເປົ້າໝາຍ 22 ບ້ານທົ່ວເມືອງ ເຂົ້າຮ່ວມຢ່າງພ້ອມພຽງ.

ໃນພິທີໄດ້ມີການຜ່ານຂໍ້ຕົກຂອງທ່ານເຈົ້າແຂວງ – ແຂວງວຽງຈັນ ສະບັບເລກທີ 234 /ຈຂ,ວຈ,ລົງວັນທີ 16 ມີນາ 2018 ວ່າດ້ວຍການອະນຸມັດໃຫ້ໂຮງຮຽນທິດສະດີການເມືອງ – ການປົກຄອງແຂວງວຽງຈັນ ເປີດຊຸດຝຶກອົບຮົມທິດສະດີການເມືອງ,ການປົກຄອງ ໃຫ້ແກ່ຄະນະພັກບ້ານ,ນາຍບ້ານ ໃນທົ່ວແຂວງວຽງຈັນປະຈຳປີ 2018,ຜ່ານມະຕິຕົກລົງຂອງຄະນະປະຈຳພັກເມືອງ ວ່າດ້ວຍ: ການແຕ່ງຕັ້ງຄະນະຮັບຜິດຊອບຝຶກອົບຮົມ ທິດສະດີການເມືອງ – ການປົກຄອງ ໃຫ້ເລຂາໜ່ວຍພັກບ້ານ – ນາຍບ້ານ ທົ່ວເມືອງໝື່ນ ,ຜ່ານມະຕິຂອງຄະນະປະຈຳພັກເມືອງວ່າດ້ວຍ:ການອະນຸມັດບຸກຄະລາກອນໃນການເຂົ້າຮ່ວມຝຶກອົບຮົມ,ຜ່ານແຜນການດຳເນີນ ແລະ ລະບຽບຂອງຊຸດຝຶກອົບຮົມ.

ການຝຶກອົບຮົມໃນເທື່ອນີ້ມີຜູ້ເຂົ້າຮ່ວມການຝຶກທັງໝົດຈຳນວນ 22 ຄົນ,ຍິງ 1 ຄົນ,ຫຼັກສູດໃນການຝຶກປະກອບມີ 3 ກຸ່ມວິຊາ ຄື: ທິດທາງລວມປະກອບມີ 4 ບົດ,ວຽກພັກປະກອບມີ 7 ບົດ , ວຽກບໍລິຫານ ແລະ ການປົກຄອງປະກອບມີ 8 ບົດ ໃຊ້ເວລາໃນການຝຶກທັງໝົດ 91 ຊົວໂມງ ລວມ 10 ວັນ ພາຍຫຼັງສຳເລັດການຝຶກຜູ້ທີ່ສອບເສັງໄດ້ ຈະໄດ້ຮັບໃບຢັ້ງຢືນຈາກໂຮງຮຽນທິດສະດີການເມືອງ – ການປົກຄອງແຂວງວຽງຈັນ.

ຈຸດປະສົງ ຂອງການເປີດຝຶກອົບຮົມ ທິດສະດີການເມືອງ-ການປົກຄອງໃນເທື່ອນີ້ ແມ່ນເພື່ອເປັນການ ສ້າງໃຫ້ເລຂາພັກບ້ານ – ນາຍບ້ານ ໃນຂອບເຂດທົ່ວເມືອງໝື່ນ ທີ່ພວມດຳລົງຕຳແໜ່ງ ຫຼື ກະກຽມດຳລົງຕຳແໜ່ງຢູ່ອົງການຈັດຕັ້ງພັກ, ລັດ ແລະ ອົງການຈັດຕັ້ງມະຫາຊົນ. ແລະ ເພື່ອເປັນການສ້າງໃຫ້ໄດ້ຖັນແຖວພະນັກງານສະມາຊິດພັກ ໃຫ້ມີຄວາມຮູ້ ທາງທິດສະດີການເມືອງ-ການປົກຄອງ, ຮູ້ແນວທາງນະໂຍບາຍຂອງພັກ, ຮູ້ຄຸ້ມຄອງເສດຖະກິດ. ສ້າງໃຫ້ມີທັດສະນະຫຼັກໝັ້ນຊົນຊັ້ນໜັກແໜ້ນ, ເຊື່ອໝັ້ນຕໍ່ການນຳພາ ແລະ ອຸດົມການຂອງພັກກໍ່ຄືພາລະກິດປ່ຽນແປງໃໝ່ຮອບດ້ານ ແລະ ມີຫຼັກການຂອງພັກ ເຮັດໃຫ້ສາມາດປະຕິບັດໜ້າທີວຽກງານໃຫ້ມີປະສິດທິພາບ ນັບມື້ນັບສູງຂື້ນ.

ຂ່າວ ແຫວນຄຳ

Leave a Reply

Your email address will not be published. Required fields are marked *