ບ້ານຈັດສັນ 3 ບ້ານຂອງເມືອງຫີນເຫີບ ຖືກມອບ-ຮັບ ແລະ ເປີດການນຳໃຊ້ຢ່າງເປັນທາງການ.

ພິທີມອບ-ຮັບ ແລະ ເປີດການນຳໃຊ້ບ້ານຈັດສັນທັງ 3 ບ້ານຂອງເມືອງຫີນເຫີບ ແຂວງວຽງຈັນ ຄື:ບ້ານຫີນເຫີບເໜືອ,ບ້ານຫີນເຫີບໃຕ້ ແລະ ບ້ານວຽງທອງ ທີ່ຖືກຜົນກະທົບຈາກໂຄງການເຂື່ອນໄຟຟ້ານ້ຳລີກ1 ໄດ້ຈັດຂຶ້ນຢ່າງເປັນທາງການ ໃນວັນທີ 4 ພຶດສະພາ 2018 ຜ່ານມນີ້, ຢູ່ທີບ້ານຈັດສັນຫີນເຫີບເໜືອ ໂດຍການເປັນກຽດເຂົ້າຮ່ວມຂອງ ທ່ານ ວິນັດ ສີສຸວົງ ຄະນະປະຈຳພັກແຂວງ,ປະທານກວດກາພັກ,ຫົວໜ້າພະແນກກວດກາລັດແຂວງວຽງຈັນ, ມີບັນດາພາກສ່ວນທີ່ກ່ຽວຂ້ອງຂັ້ນແຂວງ,ຂັ້ນເມືອງ,ພ້ອມດ້ວຍພໍ່ແມ່ປະຊາຊົນພາຍໃນ 3 ບ້ານດັ່ງກ່າວເຂົ້າຮ່ວມ.

ທ່ານ ພິພັດພົງ ຈັນດີ ຜູ້ອຳນວຍການບໍລິສັດໄຟຟ້ານ້ຳລີກ1 ໄດ້ມີຄຳເຫັນ ແລະ ກ່າວມອບບ້ານຈັດສັນວ່າ: ໂຄງການກໍ່ສ້າງເຂື່ອນໄຟຟ້ານ້ຳລີກ1 ໄດ້ຮັບສັນຍາສຳປະທານ 30 ປີ ຈາກລັດທະບານລາວ ເລີ່ມແຕ່ເດືອນກຸມພາ ປີ 2013 ຮອດ ປີ 2044 ແລະ ໄດ້ເຊັນສັນຍາຊື້-ຂາຍໄຟຟ້າ ແຕ່ວັນທີ 15 ສິງຫາ 2013. ທາງໂຄງການໄດ້ມີການກໍ່ສ້າງຕາມແຜນງານທີ່ໄດ້ກຳນົດ ແລະ ມີການຊົດເຊີຍ ແລະ ຍົກຍ້າຍຈັດສັນປະຊາຊົນທີ່ໄດ້ຮັບຜົນກະທົບທັງໝົດ 10 ບ້ານລວມມີ 489 ຄອບຄົວ,ໂດຍມີ 3 ບ້ານໃນ 112 ຄອບຄົວທີ່ຕ້ອງໄດ້ຍົກຍ້າຍໄປຢູ່ເຮືອນຫຼັງໃໝ່ທີ່ໂຄງການໄດ້ກໍ່ສ້າງໃຫ້ ແລະ 38 ຄອບຄົວທີ່ຕ້ອງການຄ່າຊົດເຊີຍຄ່າເຮືອນແທນການຍົກຍ້າຍສຳເລັດແລ້ວໃນເດືອນມີນາ 2018 ແລະ ປະຈຸບັນກຳລັງດຳເນີນການຟື້ນຟູອາຊີບໃຫ້ແກ່ປະຊາຊົນ112 ຄອບຄົວ ທີ່ໄດ້ຮັບຜົນກະທົບເປັນຕົ້ນແມ່ນ ໄດ້ຕອບສະໜອງ ແລະ ຝຶກອົບຮົມການປູກຝັງ-ລ້ຽງສັດ,ການຫັດຖະກຳ ແລະ ອື່ນໆ,ພ້ອມທັງໄດ້ມອບເງິນໃຫ້ທັງ 3 ບ້ານເພຶ່ອສູດບ້ານໃໝ່ຕາມຮີດຄອງປະເພນີຕື່ມອີກ.

ທ່ານ ອຸດົງ ວົງສະຫວາດ ກຳມະການພັກແຂວງ,ເລຂາພັກເມືອງ,ເຈົ້າເມືອງໆຫີນເຫີບ ໄດ້ມີຄຳເຫັນ ແລະ ກ່າວຮັບບ້ານຈັດສັນວ່າ: ໃນໄລຍະຜ່ານມາເຫັນວ່າ ຜູ້ພັດທະນາໂຄງການໄດ້ເອົາໃຈໃສ່ຢ່າງຈິງຈັງເປັນຕົ້ນແມ່ນ ການເກັບກຳຂ້ໍມູນຜົນກະທົບທັງໝົດ,ການຈັດສັນເນື້ອທີ່ດິນທີ່ຢູ່ອາໃສ່ ແລະ ກໍ່ສ້າງເຮືອນໃຫ້ແກ່ຄອບຄົວທີ່ຖືກຜົນກະທົບຈຳນວນ 112 ຫຼັງ ໃນ 3 ບ້ານ,ພ້ອມນີ້ ທາງໂຄງການຍັງໄດ້ຈ່າຍຄ່າຊົດເຊີຍຊັບສິນຕ່າງໆຂອງປະຊາຊົນທີ່ໄດ້ຮັບຜົນກະທົບຈຳນວນ 489 ຄອບຄົວ ລວມມູນຄ່າທັງໝົດ 35 ຕື້ກວ່າກີບ,ທາງໂຄງການຍັງໄດ້ພັດທະນາພື້ນຖານໂຄງລ່າງເປັນຕົ້ນແມ່ນ ການກໍ່ສ້າງທາງປູຢາງເຂົ້າບ້ານຈັດສັນທັງ 3 ບ້ານ,ຕິດຕັ້ງໄຟຟ້າ,ນ້ຳປະປາ,ກໍ່ສ້າງໂຮງຮຽນປະຖົມຫຼັງໃໝ່ຢູ່ບ້ານຫີນເຫີບເໜືອ,ຍົກລະດັບຂົວນ້ຳແສດ ແລະ ຍົກລະດັບທາງນ້ຳຖ້ວມ 6 ຈຸດເຫັນວ່າວຽກງານພື້ນຖານໂຄງລ່າງຖືວ່າສຳເລັດ 100%.

ໃນພິທີຍັງໄດ້ມີການລົງນາມເຊັນມອບ-ຮັບບ້ານຈັດສັນທັງ 3 ບ້ານ ລະຫວ່າງ ທ່ານ ພິພັດພົງ ຈັນດີຜູ້ອຳນວຍການບໍລິສັດໄຟຟ້ານ້ຳລີກ1 ເຊັນມອບ ແລະ ທ່ານ ອຸດົງ ວົງສະຫວາດ ເຈົ້າເມືອງໆຫີນເຫີບເຊັນຮັບ.

ໃນພິທີຍັງມີການຕັດແຖບຜ້າ,ລັ່ນຄ້ອງ 9 ບາດ ແລະ ປ່ອຍປຸມເປົ້າ ເພຶ່ອເປັນສິລິມຸງຄຸນໃຫ້ແກ່ບ້ານຈັດສັນທັງ 3 ບ້ານຕື່ມອີກ.

Leave a Reply

Your email address will not be published. Required fields are marked *