ເມືອງແກ້ວອຸດົມ ຖືກຮັບຮອງເປັນເມືອງສະຫະພັນແມ່ຍິງ 03 ດີ ຮອບທີ II ສະໄໝທີ 7

ພິທີປະຮັບຮອງ ເອົາເມືອງແກ້ວອຸດົມ ເປັນເມືອງສະຫະພັນແມ່ຍິງ 03 ດີຮອບທີ II ສະໄໝທີ 07, ພິທີຈັດຂື້ນໃນວັນທີ 04 ພຶດສະພາ 2018  ຜ່ານມານີ້ ຢູ່ທີສະໂມສອນຂອງເມືອງດັ່ງກ່າວ

ໂດຍໃຫ້ກຽດເຂົ້າຮ່ວມເປັນປະທານ ຂອງທ່ານ ດາວເຮືອງ ນັນທະວົງ ຄະນະປະຈຳພັກແຂວງ ຮອງເຈົ້າແຂວງໆວຽງຈັນ. ມີທ່ານ ນາງ ຈັນທະບູນ ໂພສະລາດ ກຳມະການພັກແຂວງ ປະທານສະຫະພັນແມ່ຍິງແຂວງ, ມີເຈົ້າເມືອງ, ຕົວແທນຈາກສະຫະພັນແມ່ຍິງເມືອງອ້ອມຂ້າງ, ຫົວໜ້າຫ້ອງການຢູ່ພາຍໃນເມືອງ ແລະ ແຂກທີຖືກເຊີນເຂົ້າຢ່າງພ້ອມພຽງ.

ທ່ານ ນາງ ພອນສະຫວັນ ສອນທະວົງ ຄະນະບໍລິຫານງານສະຫະພັນແມ່ຍິງແຂວງປະທານສະຫະພັນແມ່ຍິງເມືອງແກ້ວອຸດົມ ໄດ້ຂື້ນຜ່ານບົດລາຍງາຍການຈັດຕັ້ງປະຕິບັດຂໍ້ແຂ່ງຂັນ 03 ດີໃນໄລຍະຜ່ານມາ.

ສະຫະພັນແມ່ຍິງເມືອງແກ້ວອຸດົມ ເປັນອົງການຈັດຕັ້ງມະຫາຊົນໜື່ງ, ຊື່ງເປັນເສນາທິການໃຫ້ແກ່ຄະນະພັກອຳນາດການປົກຄອງເມືອງ ແລະ ສະ ຫະພັນແມ່ຍິງແຂວງ ໂດຍເຮັດໜ້າທີ່ສືກສາອົບຮົມການເມືອງແນວຄິດ, ເຕົ້າໂຮມຄວາມສາມັກຄີແມ່ຍິງບັນດາເຜົ່າບັນດາ ທຸກຊັ້ນຄົນໃນທົ່ວເມືອງ ເພື່ອປະຕິບັດແນວທາງນະໂຍບາຍຂອງພັກ ເປັນຕົວແທນປົກປ້ອງສິດຜົນປະໂຫຍດອັນຊອບທຳຂອງແມ່ຍິງ ແລະ ເດັກນ້ອຍ.

ສະຫະພັນແມ່ຍິງເມືອງແກ້ວອຸດົມ ປະກອບມີສະມາຊີກທັງໝົດ 2,831 ຄົນ ຜ່ານການຈັດຕັ້ງປະຕິບັດສາມາດຮັບຮອງເປັນໜ່ວຍແມ່ຍິງສາມດີໄດ້ 26 ບ້ານ ແລະ ສະຫະພັນແມ່ຍິງໜ່ວຍ 03 ດີອ້ອມຂ້າງເມືອງໄດ້ 28 ໜ່ວຍ, ມີສະມາຊີກແມ່ຍິງທັງໝົດມີ 2,661 ຄົນ, ເປັນພົນລະເມືອງດີ 2,661 ຄົນ, ພັດທະນາດີ 2,651 ຄົນ, ສາ້ງຄອບຄົວດີ 2,654 ຄົນ, ຕີລາຄາຈັດແບ່ງປະເພດສະມາຊີກບຸກຄົນ 03 ດີຄືປະເພດ I ມີ 2,309 ຄົນ, ປະເພດ II ມີ 352 ຄົນ, ບ້ານຕົວແບບໃນການຈັດຕັ້ງປະຕິບັດຂໍ້ແຂງຂັນ 03 ດີຕິດພັນກັບບ້ານ 03 ສ້າງມີ 05 ບ້ານ ແລະ ຕົວແບບສະຫະພັນແມ່ຍິງ 03 ດີ ຕິດກັບວຽກງານວິຊາສະເພາະມີ  28 ໜ່ວຍອ້ອມຂ້າງເມືອງ.

ເປັນກຽດມອບໃບຢັ້ງຢືນເມືອງສະຫະພັນແມ່ຍິງ 03 ດີຮອບທີ II ໃນຄັ້ງນີ້ ໂດຍແມ່ນທ່ານ ນາງ ຈັນທະບູນ ໂພສະລາດ ກຳມະການພັກແຂວງປະທານສະຫະພັນແມ່ຍິງແຂວງ.

ນອກຈາກນີ້ ຍັງໄດ້ມອບໃບຍ້ອງຍໍຂອງທ່ານ ເຈົ້າເມືອງໆແກ້ວອຸດົມ ໃຫ້ແກ່ສະມາຊິກເອື້ອຍນ້ອງແມ່ຍິງ ຜູ້ທີມີຜົນງານດີເດັ່ນໃນການຈັດຕັ້ງປະຕິບັດໜ້າທີ່ວຽກງານວິຊາສະເພາະ ກໍຄືການຈັດຕັ້ງປະຕິບັດຂໍ້ແຂ່ງຂັນ 03 ດີ

 

ຕອນທ້າຍຂອງພິທີ ທ່ານ ດາວເຮືອງ ນັນທະວົງ ຄະນະປະຈຳພັກແຂວງ ຮອງເຈົ້າແຂວງໆວຽງຈັນ, ທ່ານ ນາງ ຈັນທະບູນ ໂພສະລາດ ກຳມະການພັກແຂວງ ປະທານສະຫະພັນແມ່ຍິງແຂວງ, ທ່ານເຈົ້າເມືອງພ້ອມດ້ວຍສະມາຊິກແມ່ຍິງ ແລະ ແຂກຖືກເຊີນຍັງໄດ້ຮ່ວມກັນລັ່ນຄອງ 09 ບາດພ້ອມທັງເປີດປ້າຍເພື່ອເປັນສິຣິມຸງຄຸນໃຫ້ແກ່ເມືອງອີກດ້ວຍ.

ພາບ ແລະ ຂ່າວໂດຍ : ນັກຂ່າວເມືອງແກ້ວອຸດົມ

Leave a Reply

Your email address will not be published. Required fields are marked *