ຫ້ອງວ່າການປົກຄອງເມືອງວັງວຽງ ຈັດພິທີບາສີສູ່ຂວັນສົ່ງທ້າຍປີເກົ່າຕ້ອນຮັບປີໃໝ່ ພ.ສ 2561

ໃນຕອນເຊົ້າຂອງວັນທີ 6 ເມສາ 2018 ຜ່ານມານີ້, ຢູ່ທີ່ຫ້ອງວ່າການປົກຄອງເມືອງວັງວຽງ ແຂວງວຽງຈັນ, ໄດ້ຈັດພິທີບາສີສູ່ຂວັນ ສົ່ງທ້າຍປີເກົ່າຕ້ອນຮັບປີໃໝ່ ພ.ສ 2561.

ໂດຍການເຂົ້າຮ່ວມຂອງທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ມີບັນດາທ່ານຄະນະປະຈຳພັກເມືອງ, ກຳມະການພັກເມືອງ, ຫົວຫນ້າ-ຮອງຫ້ອງການ, ກົມກອງຫ້ອງການອ້ອມຂ້າງເມືອງ, ພະນັກງານອາວຸໂສບຳນານ, ນາຍບ້ານ, ນັກທຸລະກິດ ແລະ ພະນັກງານລັດຖະກອນເຂົ້າຮ່ວມຢ່າງພ້ອມພຽງ.

ທ່ານ ບຸນປັນ ພົມມະວົງ ຄະນະປະຈໍາພັກເມືອງ ປະທານແນວລາວສ້າງຊາດເມືອງ ກໍ່ໄດ້ໃຫ້ກຽດຂື້ນອວຍພອນປີໃໝ່ ພສ 2561 ນີ້ວ່າ: ດັ່ງທີ່ພວກເຮົາຮູ້ນໍາກັນແລ້ວວ່າ ປີ ພສ 2560 ທີ່ຜ່ານພົ້ນໄປນີ້ ເປັນປີໜຶ່ງທີ່ມີຄວາມໝາຍຄວາມສຳຄັນຂອງເມືອງວັງວຽງ ເຊິ່ງເປັນປີທີ່ IV ແຫ່ງການຈັດຕັ້ງປະຕິບັດ ມະຕິກອງໃຫຍ່ຄັ້ງທີ່ VI ຂອງອົງຄະນະພັກເມືອງວັງວຽງ.

ປະຈຸບັນ ສະພາບເສດຖະກິດມີການຂະຫຍາຍຕົວຢ່າງຕໍ່ເນື່ອງ ລວມຍອດຜະລິດຕະພັນ ພາຍໃນສະເລ່ຍຕໍ່ຫົວຄົນໄດ້ 2.527 ໂດລາ/ຄົນ/ປີ. ເທົ່າກັບ 20.216.000 ກີບ/ຄົນ/ປີ. ໃນປີໃໝ່ປີນີ້ຄະນະພັກອົງການປົກຄອງເມືອງວັງວຽງກຳລັງກະກຽມດຳເນີນກອງປະຊຸມໃຫຍ່ 3 ຂັ້ນ, ໃຫ້ສຳເລັດຂັ້ນຮາກຖານພັກ-ອົງການປົກຄອງທ້ອງຖິ່ນທ້າຍປີ 2018 ແລະພ້ອມກັນເພີ່ມທະວີ, ຮັກສາມູນເຊື້ອຄວາມສາມັກຄີອັນເປັນປຶກແຜນແໜ້ນໜາຢູ່ພາຍໃຕ້ການນຳພາຂອງພັກ, ຜ່ານຜ່າຄວາມຫຍຸ້ງຍາກ ແລະສິ່ງທ້າທາຍທົດສອບ ສຶບຕໍ່ເສີມຂະຫຍາຍຜົນສຳເລັດອັນດີງາມ, ຕັ້ງໜ້າແກ້ໄຂຈຸດອ່ອນ ແລະຂໍ້ຄົງຄ້າງໃນປີຜ່ານມາ. ທັງນີ້ກໍ່ເພື່ອເຮັດໃຫ້ເມືອງວັງວຽງ ເປັນເມືອງໜ້າຢູ່ ໜ້າຊົມ ສົມກັບຄຳຂວັນທີ່ວ່າ: ເມືອງແຫ່ງສາຍນ້ຳໄຫຼ – ປ່າໄມ້ສີຂຽວ – ທ່ອງທ່ຽວປອດໄພ – ນ້ຳໃຈຊາວເມືອງປະເສີດ

ຫລັງຈາກນັ້ນ, ກໍ່ມີພິທີບາສີສູ່ຂວັນໃຫ້ແກ່ ອຳນາດການປົກຄອງເມືອງວັງວຽງ, ໂອກາດດຽວກັນນີ້ບັນດາຫ້ອງການ, ກົມກອງ, ນັກທຸລະກິດ ແລະ ພາກສ່ວນຕ່າງໆໄດ້ນຳກະຕ່າຂອງຂວັນເຂົ້າອວຍພອນ ອຳນາດການປົກຄອງ ເມືອງວັງວຽງ ເພື່ອສະແດງເຖິງຄວາມຮູ້ບຸນຄຸນເນື່ອງໃນໂອກາດ ສົ່ງທ້າຍປີເກົ່າຕ້ອນຮັບປີໃໝ່ ພ.ສ 2561 ຕື່ມອີກ

Leave a Reply

Your email address will not be published. Required fields are marked *