ເມືອງໝື່ນ, ແຂວງວຽງຈັນ ຄົ້ນພົບຖ້ຳພະພຸດທະຮູບເກົ່າແກ່ອາຍຸຫຼາຍຮ້ອຍປີຢູ່ຜາຮົ່ມທ້າວ

ໃນຕອນເຊົ້າຂອງວັນທີ 13 ມີນາ 2018 ນີ້ ທ່ານ ພູວອນວອນ ບຸນວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງ – ເມືອງໝື່ນ ໄດ້ນຳພາ ບັນດາຫ້ອງການ ທີ່ກ່ຽວຂ້ອງ ໂດຍສົມທົບກັບ ອົງການປົກຄອງບ້ານວັງ ແລະ ບ້ານນ້ຳຮີ້ ເມືອງໝື່ນ ລົງກວດກາຜາຮົ່ມທ້າວ ທີ່ຕັ້ງຢູ່ລະຫວ່າງກາງ ບ້ານວັງ ແລະ ບ້ານ ນ້ຳຮີ້ ເມືອງໝື່ນ ແຂວງວຽງຈັນ ຫ່າງຈາກສຳນັກງານປົກຄອງເມືອງປະມານ 27 ກິໂລແມັດ, ຕິດກັບທາງຫຼວງແຫ່ງຊາດເລກທີ 4501 ,

ໂດຍອີງໃສ່ການລາຍງານໃຫ້ຂໍ້ມູນ ຂອງບັນດາ ເຖົ້າແກ່ແນວໂຮມ ແລະ ບັນດາ ພໍ່ແມ່ປະຊາຊົນທັງສອງບ້ານ ເຊິ່ງການລົງກວດກາຕົວຈິງໃນເທື່ອນີ້ ໄດ້ພົບເຫັນຖ້ຳ ທີ່ມີພະພຸດທະຮູບເກົ່າແກ່ ອາຍຸຫຼາຍຮ້ອຍປີ ຈຳນວນຫຼາຍຮູບ

ນອກຈາກນີ້ ຍັງມີບັນດາຖໍ້າທີ່ມີຄວາມງົດງາມ ນ່າຕື່ນຕາຕື່ນໃຈ ຕ່າງໆ ອີກ 4 ຖ້ຳດ້ວຍກັນ ,ມີທຳມະຊາດທີ່ຍັງອຸດົມສົມບູນ ແລະ ຍັງມີທະເລໝອກ ສອງ ຝັ່ງ ລາວ – ໄທ ທີ່ນ່າຊົມ ເໝາະ ສຳລັບການຜັກຜ່ອນ ຖ່າຍຮູບພາບງາມໆ ເຊິ່ງເໝາະທີ່ສຸດທີ່ຈະພັດທະນາເປັນແຫຼ່ງທ່ອງທ່ຽວ ໄຫວ້ພະ,ເດີນປ່າ ແລະ ທ່ຽວຊົມທິວທັດທາງທຳມະຊາດ ແມ່ນ້ຳຂອງ ຝັ່ງລາວ – ໄທ .

ພາຍຫຼັງການລົງສຳຫຼວດໃນເທື່ອນີ້ສຳເລັດລົງ ທ່ານ ພູວອນ ບຸນວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງ – ເມືອງໝື່ນ ກໍ່ໄດ້ຂຶ້ນແຜນກະກຽມ ທີ່ຈະສ້າງສະຖານທີ່ດັ່ງກ່າວ ເປັນແຫຼ່ງທ່ອງທຽວ ຂອງເມືອງໝື່ນ ທັນທີ ເບື້ອງຕົ້ນນີ້ຈະໄດ້ ທຳການບຸກເບີກສະຖານທີ່ບ່ອນຈອດລົດ ຮ້ານອາຫານ , ແລະ ຫ້ອງນ້ຳ ເພື່ອຮອງຮັບບັນດາແຂກທີ່ມາທ່ຽວຊົມ ຄາດວ່າຈະເປີດບໍລິການໃຫ້ນັກທ່ອງທ່ຽວ ສາມາດເຂົ້າມາທ່ຽວຊົມໄຫວ້ພະ ໄດ້ກອນບຸນປີໃໝ່ລາວທີ່ຈະມາຮອດໃນໄວໆນີ້.

ຂ່າວ ແຫວນຄຳ ນັກຂ່າວ ເມືອງໝື່ນ

Leave a Reply

Your email address will not be published. Required fields are marked *