ກຸ່ມບ້ານຜາເຈົ້າ, ເມືອງກາສີ ໄດ້ຮັບກະເບື້ອງຊ່ວຍເຫຼືອ ເພື່ອມຸງຫລັງຄາສະໂມສອນ ຈຳນວນ 1,210 ແຜ່ນ, ລວມມູນຄ່າກວ່າ 15 ລ້ານກີບ

ໃນວັນທີ 29 ມີນາ 2018 ນີ້, ຢູ່ທີ່ຫ້ອງການກຸ່ມ ບ້ານຜາເຈົ້າ ເມືອງກາສີ ແຂວງວຽງຈັນ ໄດ້ມີພິທີມອບ – ຮັບກະເບື້ອງມຸງຫຼັງຄາສະໂມສອນ ຈຳນວນ 1.210 ແຜ່ນ ພ້ອມດ້ວຍອຸປະກອນຄົບຊຸດ ລວມມູນຄ່າທັງໝົດ 15.000.000 ກີບ ຂຶ້ນຢ່າງເປັນທາງການ.

ເຊິ່ງຕາງໜ້າກ່າວມອບໂດຍແມ່ນ ທ່ານ ຂັນທອງ ພາລະຄອນ ຫົວໜ້າພະແນກອາກອນແຂວງວຽງຈັນ ແລະ

ຂຶ້ນກ່າວຮັບໂດຍ ທ່ານ ຄຳພຽນ ວັນຍົງຍຸດ ນາຍບ້ານໆຜາເຈົ້າ ເປັນຜູ້ຕາງໜ້າໃຫ້ແກ່ 10 ບ້ານພາຍໃນກຸ່ມບ້ານຜາເຈົ້າ, ໂດຍການເປັນກຽດເຂົ້າຮ່ວມ ຂອງ ທ່ານ ຄຳສົດ ເພັດລາວັນ ກຳມະການພັກແຂວງ ເລຂາພັກເມືອງ ເຈົ້າເມືອງໆກາສີ, ມີທ່ານ ຄຳເຫຼັກ ທອງສະຫວັນ ຮອງຫົວໜ້າພະແນກການເງິນແຂວງວຽງຈັນ, ມີເລຂາຄະນະພັກ ແລະ ສະມາຊິກພາຍໃນກຸ່ມບ້ານ ພ້ອມດ້ວຍພະນັກງານທີ່ກ່ຽວຂ້ອງຂັ້ນແຂວງ – ຂັ້ນເມືອງເຂົ້າຮ່ວມເປັນສັກຂີພິຍານ.

ຈຸດປະສົງໃນການມອບຄັ້ງນີ້ກໍ່ເພື່ອເປັນການປະກອບສ່ວນຊຸກຍູ້ໃນການກໍ່ສ້າງສະໂມສອນຂອງກຸ່ມບ້ານຜາເຈົ້າ ເພື່ອທີ່ຈະໄດ້ນຳໃຊ້ເປັນບ່ອນເຕົ້າໂຮມຂອງປະຊາຊົນ ແລະ ກໍ່ເປັນສະຖານທີ່ສຳລັບຕ້ອນຮັບການນຳຂັ້ນສູນກາງ, ຂັ້ນແຂວງ, ຂັ້ນເມືອງ ທີ່ລົງມາຢ້ຽມຢາມ ແລະ ເຮັດວຽກຢູ່ກຸ່ມຜາເຈົ້າ,

ໃນໂອກາດດັ່ງກ່າວ ທ່ານ ຄຳພຽນ ວັນຍົງຍຸດ ນາຍບ້ານໆຜາເຈົ້າ ກໍ່ໄດ້ກ່າວສະແດງຄວາມຂອບໃຈມາຍັງພາກສ່ວນຂະແໜງການເງິນແຂວງວຽງຈັນ ທີ່ໃຫ້ການສະໜັບສະໜູນຊຸກຍູ້ຊ່ວຍເຫຼືອໃນການກໍ່ສ້າງສະໂມສອນຂອງກຸ່ມບ້ານຜາເຈົ້າໃນຄັ້ງນີ້ ແລະ ເພື່ອເປັນການສະແດງຄວາມຮູ້ບຸນຄຸນຕໍ່ພາກສ່ວນດັ່ງກ່າວ ທ່ານ ເຈົ້າເມືອງໆກາສີ ກໍ່ໄດ້ຂຶ້ນມອບໃບກຽດຕິຄຸນໃຫ້ແກ່ພາກສ່ວນຂະແໜງການເງີນແຂວງວຽງຈັນອີກດ້ວຍ.

ຂ່າວ: ເມືອງກາສີ.

Leave a Reply

Your email address will not be published. Required fields are marked *