ເມືອງກາສີຈັດພິທີເປີດການຮຽນ – ການສອນກົດໝາຍຊັ້ນຕົ້ນຊຸດທີ IV

ພິທີດັ່ງກ່າວໄດ້ຈັດຂຶ້ນໃນວັນທີ 15 ມີນາ 2018 ນີ້, ຢູ່ທີສະໂມສອນ ຂອງເມືອງກາສີ ແຂວງວຽງຈັນ. ໂດຍການເປັນປະທານຂອງ ທ່ານ ຄຳສົດ ເພັດລາວັນ ກຳມະການພັກແຂວງ ເລຂາພັກເມືອງ ເຈົ້າເມືອງໆກາສີ, ໃຫ້ກຽດເຂົ້າຮ່ວມໃນພິທີມີ ທ່ານ ໄຜ່ລ້ອມ ສິນນະວົງ ຮອງຫົວໜ້າພະແນກຍຸຕິທຳ ແຂວງວຽງຈັນ, ມີທ່ານ ອ່ອນສີ ພອນວິໄລສຸກ ຫົວໜ້າຫ້ອງການຍຸຕິທຳເມືອງກາສີ, ມີແຂກຖືກເຊີນ, ຄູ – ອາຈານພ້ອມດ້ວຍນັກສຳມະນາກອນກົດໝາຍຊັ້ນຕົ້ນເຂົ້າຮ່ວມຢ່າງພ້ອມພຽງ.

ໃນໂອກາດດັ່ງກ່າວ ທ່ານ ຄຳສົດ ເພັດລາວັນ ເຈົ້າເມືອງໆກາສີກໍ່ໄດ້ໃຫ້ກຽດຂຶ້ນກ່າວເປີດການຮຽນ – ການສອນກົດໝາຍຊັ້ນຕົ້ນຊຸດທີ່ IV ຂອງເມືອງກາສີ ຂຶ້ນຢ່າງເປັນທາງການໂດຍທ່ານໄດ້ກ່າວວ່າ: ການຮຽນ – ການສອນກົດໝາຍຊັ້ນຕົ້ນນີ້ ຈະດຳເນີນໄປເປັນເວລາ 3 ເດືອນໂດຍເລີ່ມແຕ່ວັນທີ 6 ມີນາຫາວັນທີ 6 ມິຖຸນາຈື່ງຈະຈົບຫຼັກສູດ, ເຊີ່ງມີນັກສຳມະນາກອນທີ່ມາຈາກບ້ານໃນທົ່ວເມືອງເຂົ້າຮ່ວມທັງໝົດ 43 ຄົນ.

ພ້ອມນັ້ນກໍ່ຈະໄດ້ຄົ້ນຄ້ວາ ສຶກສາຮ່ຳຮຽນບັນດາກົດໝາຍ, ນິຕິກຳ ແລະ ເອກະສານທີ່ສຳຄັນຕ່າງທີ່ພົວພັນກັບວຽກງານການປົກຄອງຢູ່ຂັ້ນ ຮາກຖານບ້ານເປັນຕົ້ນແມ່ນ: ແນວທາງການປ່ຽນແປງໃໝ່, ປະຫວັດສາດພັກ, ລັດທິມາກ – ເລນິນ, ລັດ ແລະ ກົດ ໝາຍ, ການພົນພັນສາກົນ, ລັດຖະທຳມະນູນ, ເຕັກນິກການແຕ່ງເອກະສານ, ກົດໝາຍການປົກຄອງ, ກົດໝາຍແມ່ຍິງ, ກົດໝາຍປົກປ້ອງເດັກ, ກົດໝາຍທີ່ດິນ, ກົດໝາຍປ່າໄມ້ ແລະ ກົດໝາຍອື່ນໆເປັນຕົ້ນ, ຈາກນັ້ນທ່ານກໍ່ຍັງໄດ້ເໜັ້ນໜັກໃຫ້ຄະນະຮັບຜິດຊອບ, ຄູ – ອາຈານ, ນັກຮຽນທຸກຄົນຈົ່ງພ້ອມກັນເອົາໃຈໃສ່ສຶກສາຄົ້ນຄ້ວາບົດຮຽນ – ບົດສອນ ຕ້ອງມີແຜນການຮຽນ – ການສອນຢ່າງລະອຽດ, ໃຫ້ພ້ອມກັນເອົາໃຈໃສ່ປະຕິບັດກົດລະບຽບໂດຍສະເພາະກໍ່ແມ່ນການນຸ່ງຖື, ການປະຕິບັດໂມງເວລາໃນການຂຶ້ນຫ້ອງ, ໃນເວລາຮຽນຕ້ອງມີການສ້າງຄຳຖາມເພື່ອເປັນການແລກປ່ຽນບົດຮຽນເຊີ່ງກັນ ແລະ ກັນ, ມີການຕີລາຄາຄວາມຮັບຮູ້ເຂົ້າໃຈຂອງນັກຮຽນ, ມີການຕິດຕາມກວດກາ ເປັນເຈົ້າການໃນການໃກ້ຊິດຕິດແທດສັງລວມການຮຽນ – ການສອນ ຕະຫຼອດໄລຍະເວລາຮຽນຕ້ອງມີການສ້າງກິດຈະກຳເຄື່ອນໄຫວນອກຫຼັກສູດ ເຊັ່ນ: ການຈັດການແຂ່ງຂັນກິລາຕ່າງໆເພື່ອເຮັດການຮຽນມີບັນຍາກາດຟົດຟື້ນ ພ້ອມທັງເປັນການສ້າງຄວາມສາມັກຄີພາຍໃນ ແລະ ຈົ່ງພ້ອມກັນອົດທົນ ຜ່ານຜ່າປະຕິບັດຂໍ້ຫຍຸ້ງຍາກຕ່າງໆດ້ວຍຈິດໃຈບຸທະລຸ ເຮັດໃຫ້ການຮຽນ – ການສອນໃນຄັ້ງນີ້ບັນລຸຕາມຫຼັກສູດຢ່າງວ່ອງໄວ.

ຂ່າວ: ເມືອງກາສີ.

Leave a Reply

Your email address will not be published. Required fields are marked *