ໂຄງການຄຸ້ມຄອງປ່າໄມ້ແບບຍືນນານ (SUFORD SU) ໄດ້ມອບທຶນພັດທະນາຊີວິດການເປັນຢູ່ຂອງຊາວບ້ານ (4.000$) ຈໍານວນ 12 ບ້ານ ທີ່ນອນຢູ່ໃນເປົ້າໝາຍຂອງ ໂຄງການຄຸ້ມຄອງປ່າໄມ້ແບບຍືນນານ ເມືອງຊະນະຄາມ ແຂວງວຽງຈັນ.

ໃນຕອນເຊົ້າຂອງວັນທີ 6 ມີນາ 2018 ນີ້. ຫ້ອງການກະສິກຳ ແລະ ປ່າໄມ້ເມືອງຊະນະຄາມ ແຂວງວຽງຈັນ ໄດ້ຈັດພິທີ ມອບທຶນພັດທະນາຊີວິດການເປັນຢູ່ຂອງຊາວບ້ານຈຳນວນ 12 ບ້ານ ທີ່ນອນຢູ່ໃນເປົ້າໝາຍຂອງ ໂຄງການຄຸ້ມຄອງປ່າໄມ້ແບບຍືນນານ ເມືອງຊະນະຄາມ ຢູ່ທີ່ສະໂມສອນຂອງເມືອງຊະນະຄາມ.

ໂດຍພາຍໃຕ້ການເປັນປະທານຂອງ ທ່ານ ສະໝານ ວິເສດຍະພົງສ໌ ເລຂາພັກເມືອງ ເຈົ້າເມືອງໆ ຊະນະຄາມ, ມີທ່ານ Esa Puustjarvi ຫົວໜ້າຊ່ຽວຊານໂຄງການຄຸ້ມຄອງປ່າໄມ້ແບບຍືນນານ, ມີບັນດາຫົວໜ້າຫ້ອງການ, ພະແນກການທີ່ກ່ຽວຂ້ອງ ແລະ ອຳນາດການປົກຄອງບ້ານທັງ 12 ບ້ານກໍ່ເປັນກຽດເຂົ້າຮ່ວມຢ່າງພ້ອມພຽງ.

ໃນພິທີດັ່ງກ່າວ, ທ່ານ ບຸນຊ່ວງ ວັນສີ ກໍາມະການພັກເມືອງ ຫົວຫນ້າຫ້ອງການກະສິກຳ ແລະ ປ່າໄມ້ເມືອງຊະນະຄາມ ໄດ້ຜ່ານ ບົດສະຫຼຸບ ແລະ ສະພາບລວມຂອງໂຄງການ ເຊິ່ງໂຄງການຄຸ້ມຄອງປ່າໄມ້ແບບຍືນນານນີ້ ແມ່ນໄດ້ຮັບການຊ່ວຍເຫຼືອຈາກ ທະນາຄານໂລກ, ລັດຖະບານປະເທດແຟງລັງ ແລະ ສົມທົບກັບລັດຖະບານລາວ ກໍ່ຄື ກະຊວງກະສິກຳ ແລະ ປ່າໄມ້, ໂດຍສະເພາະແມ່ນເມືອງຊະນະຄາມແມ່ນໄດ້ຮັບທຶນຈຳນວນ 12 ບ້ານ ທຶນທັງໝົດແມ່ນ 383.385.000 ກີບ, ບ້ານລະ 31.948.800 ກີບ.

ເຊິ່ງຈຸດປະສົງຂອງໂຄງການດັ່ງກວ່ານີ້ແມ່ນ ຈັດຕັ້ງແຜນນະໂຍບາຍຕາມທະສາດ, ບັນດາລະບຽບການ ແລະ ບັນດາໜ້າວຽກຕ່າງໆ ໃນການຂະຫຍາຍຕົວຂອງລະບົບການຈັດສັນຄຸ້ມຄອງປ່າໄມ້ແບບຍືນນານ, ເພື່ອສ້າງໂອກາດ ແລະ ສ້າງເງື່ອນໃຫ້ແກ່ປະຊາຊົນໃນການມີສ່ວນຮ່ວມຢ່າງຕັ້ງໜ້າເຂົ້າໃນການຄຸ້ມຄອງຮັກສາປ່າໄມ້ ແລະ ຊັບພະຍາກອນໄມ້, ເພື່ຶອໃຫ້ປ່າໄມ້ ແລະ ທີ່ດິນໃນເຂດປ່າຜະລິດໄດ້ຮັບການຈັດຕັ້ງປະຕິບັດຕາມລະບົບການຄຸ້ມຄອງປົກປັກຮັກສາປ່າໄມ້ແບບຍືນນານ, ເຮັດໃຫ້ປະຊາຊົນບັນດາເຜົ່າທີ່ຢູ່ໃນເຂດປ່າຜະລິດໄດ້ຮັບການປັບປຸງພັດທະນາຊີວິດການເປັນໃຫ້ດີຂຶ້ນເທື່ອລະກ້າວ ໂດຍບໍ່ເຂົ້າໄປບຸກລຸກທຳລາຍປ່າໄມ້ ແລະ ເພື່ອໃຫ້ປ່າໄມ້ໃນເຂດດັ່ງກ່າວ ກາຍເປັນປ່າທີ່ມີຄວາມສາມາດຕອບສະໜອງວັດຖຸດິບດ້ານປ່າໄມ້ ແລະ ເຄື່ອງປ່າຂອງດົງ ໃຫ້ແກ່ການພັດທະນາເສດຖະກິດຂອງຊາດໄວ້ຢ່າງຍືນນານ.

Leave a Reply

Your email address will not be published. Required fields are marked *