ເມືອງຫີນເຫີບ ປະກາດຮັບຮອງເປັນເມືອງສະຫະພັນແມ່ຍິງ 3 ດີ ຄັ້ງທີ 2 ໄລຍະປີ 2015 – 2017

ພິທີປະກາດຮັບຮອງ ເອົາເມືອງຫີນເຫີບເປັນເມືອງສະຫະພັນແມ່ຍິງ 3 ດີ ຄັ້ງທີ 2 ໄດ້ຈັດຂື້ນໃນຕອນເຊົ້າມື້ນີ້ ວັນທີ 23 ກຸມພາ 2018 ທີ່ ສະໂມສອນເມືອງດັ່ງກ່າວ, ໂດຍໃຫ້ກຽດເຂົ້າຮ່ວມມີ ທ່ານ ນາງ ຈັນທະບຸນ ໂພສະລາດ ກຳມະການພັກແຂວງ ປະທານສະຫະພັນແມ່ຍິງແຂວງວຽງຈັນ, ມີທ່ານ ອຸດົງ ວົງສະຫວາດ ກຳມະການພັກແຂວງ ເລຂາພັກເມືອງເຈົ້າເມືອງໆຫີນເຫີບ, ມີບັນເຈົ້າເມືອງອ້ອມຂ້າງ, ປະທານ, ຮອງປະທານອົງການຈັດຕັ້ງມະຫາຊົນຂັ້ນແຂວງ, ຂັ້ນເມືອງ, ມີບັນດາຕົວແທນສະຫະພັນແມ່ຍິງທົ່ວເມືອງເຂົ້າຮ່ວມ.

ທ່ານ ນາງ ອຳມະລາ ທິບພະແກ້ວ ກຳມະການພັກເມືອງ ປະທານສະຫະພັນແມ່ຍິງເມືອງຫີນເຫີບ ໄດ້ຂື້ນຜ່ານບົດລາຍງານການຈັດຕັ້ງປະຕິບັດຂໍ້ແຂ່ງຂັນ 3 ດີໃນໄລຍະຜ່ານມາວ່າ: ສະຫະພັນແມ່ຍິງເມືອງຫີນເຫີບ ແມ່ນອົງການຈັດຕັ້ງມະຫາຊົນໜື່ງ ຊື່ງເປັນເສນາທິການໃຫ້ແກ່ຄະນະພັກ, ອຳນາດການປົກຄອງເມືອງ ແລະ ສະຫະພັນແມ່ຍິງແຂວງ ໂດຍເຮັດຫນ້າທີ່ສຶກສາອົບຮົມການເມືອງແນວຄິດ ເຕົ້າໂຮມຄວາມສາມັກຄີແມ່ຍິງບັນດາເຜົ່າ, ບັນດາຊັ້ນຄົນໃນທົ່ວເມືອງ ເພື່ອປະຕິບັດແນວທາງນະໂຍບາຍຂອງພັກ ເປັນຕົວແທນປົກປ້ອງສິດຜົນປະໂຫຍດອັນຊອບທຳຂອງແມ່ຍິງ ແລະ ເດັກນ້ອຍ.

ສະຫະພັນແມ່ຍິງເມືອງຫີນເຫີບ ມີສະມາຊິກສະຫະພັນແມ່ຍິງທັງໝົດ 4,816 ຄົນ ຜ່ານການຈັດຕັ້ງປະຕະບັດສາມາດຮັບຮອງແມ່ຍິງ 3 ດີ ໄດ້ 43 ບ້ານ ແລະ ສະຫະພັນແມ່ຍິງຫນ່ວຍ 3 ດີອ້ອມຂ້າງເມືອງໄດ້ 23 ໜ່ວຍ, ມີສະມາຊິກແມ່ຍິງ 3 ດີຄື: ເປັນພົນລະເມືອງດີ 4,328 ຄົນ, ພັດທະນາດີ 3,920 ຄົນ, ສ້າງຄອບຄົວດີ 3,654 ຄົນ ; ຕີລາຄາຈັດແບ່ງປະເພດສະມາຊິກບຸກຄົນ 3 ດີຄື: ປະເພດ1 ມີ 3,395 ຄົນ , ປະເພດ2 ມີ 960 ຄົນ. ບ້ານຕົວແບບໃນການຈັດຕັ້ງປະຕິບັດຂໍ້ແຂ່ງຂັນ 3 ດີ ຕິດພັນກັບບ້ານ 3 ສ້າງມີ 5 ບ້ານ ແລະ ຕົວແບບສະຫະພັນແມ່ຍິງ 3 ດີ ຕິດກັບວຽກງານວິຊາສະເພາະ ມີ 12 ໜ່ວຍອ້ອມຂ້າງເມືອງ.

ເປັນກຽດຂື້ນມອບໃບຢັ້ງຢືນເມືອງສະຫະພັນແມ່ຍິງ 3 ດີ ຄັ້ງທີ 2 ໃນຄັ້ງນີ້ ໂດຍແມ່ນ ທ່ານ ນາງ ຈັນທະບູນ ໂພສະລາດ ກຳມະການພັກແຂວງ ປະທານສະຫະພັນແມ່ຍິງແຂວງ ແລະ ໃນຕອນທ້າຍຂອງພິທີ ທ່ານ ນາງ ຈັນທະບູນ ໂພສະລາດ ກຳມະການພັກແຂວງ ປະທານສະຫະພັນແມ່ຍິງແຂວງ ພ້ອມດ້ວຍ ທ່ານ ອຸດົງ ວົງສະຫວາດ ກຳມະການພັກແຂວງ ເລຂາພັກເມືອງຫີນເຫີບ ເມືອງເຈົ້າເມືອງໆຫີນເຫີບ ຍັງໄດ້ໃຫ້ກຽດລັ່ງຄ້ອງ 9 ບາດ ພ້ອມທັງເປີດປ້າຍເພື່ອເປັນສິຣິມຸງຄຸນໃຫ້ແກ່ເມືອງອີກດ້ວຍ.

Leave a Reply

Your email address will not be published. Required fields are marked *