ເມືອງວັງວຽງ ປະກາດ ຜາມອມ,ຜາໂພ ເປັນເຂດປ່າສະຫງວນຂອງບ້ານນາມ່ວງ, ເມືອງວັງວຽງ, ແຂວງວຽງຈັນ

ໃນວັນທີ 24 ມັງກອນ ປີ2018 ຢູ່ທີ່ອ່າງຫຼວງບ້ານນາມ່ວງ ເມືອງວັງວຽງ, ແຂວງວຽງຈັນ ໄດ້ຈັດພິທີປະກາດຜາມອມ,ຜາໂພເປັນເຂດປ່າສະຫງວນ.

ໂດຍເປັນກຽດເຂົ້າຮ່ວມຂອງທ່ານ ສຸວຽງທອງ ວົງຈຳປາ ຄະນະປະຈຳພັກເມືອງ ຮອງເຈົ້າເມືອງໆວັງວຽງ, ມີທ່ານ ນາງຄຳຮຸ່ງ ທິບພາວົງ ຄະນະປະຈຳພັກເມືອງ ປະທານກວດກາພັກ-ລັດເມືອງວັງວຽງ, ມີບັນດາຫົວໜ້າຫ້ອງການຮອງຫ້ອງການທີ່ກ່ຽວຂ້ອງ, ມີທ່ານນາຍບ້ານທັງ 11 ບ້ານເຂດກຸ່ມນາລ້ອງກວາງ, ມີປະຊາຊົນພາຍໃນບ້ານເຂົ້າຮ່ວມ.

ໃນພິທີ ທ່ານ ຄໍາ ອິນທະໄຊ ນາຍບ້ານໆນາມ່ວງ ໄດ້ຂຶ້ນຜ່ານບົດລາຍງານບ້ານນາມ່ວງ ເປັນບ້ານຫນື່ງທີ່ຂຶ້ນກັບກຸ່ມບ້ານນາລ່ອງກວາງມີເນື້ອທີ່ທັງໝົດ 609 ເຮັກຕາ, ມີ 85 ຫຼັງຄາເຮືອນ, ມີ 99 ຄອບຄົວ, ມີພົນລະເມືອງທັງໝົດ 469 ຄົນ, ມີ 1 ຊົນເຜົ່າຢູ່ຮ່ວມກັນ(ລາວລຸ່ມ).

ໃນໄລຍະຜ່ານມາອົງການຈັດຕັ້ງຂັ້ນບ້ານ, ຂັ້ນເມືອງໂດຍສະເພາະຫ້ອງການກະສີກຳ ແລະ ປ່າໄມ້ເມືອງ ກໍຄືຫ້ອງການຊັບພະຍາກອນທຳມະຊາດ ແລະ ສີ່ງແວດລ້ອມເມືອງກໍ່ໄດ້ເອົາໃຈໃສປະສານງານກັນຢ່າງກົມກຽວ ເພື່ອກຳນົດຈຸດຄຸ້ມຄອງປ່າສະຫງວນ, ປ່າປ້ອງກັນ, ປ່າຊົມໃຊ້.

ທັ້ງນີ້ກໍ່ເພື່ອຄວາມອຸດົມສົມບຸນຂອງລະບົບນີເວດທີ່ມີຄຸນຄ່າທາງທຳມະຊາດ ແລະ ປົກປັກຮັກສາຊັບພະຍາກອນທຳມະຊາດໃຫ້ມີຄວາມຍືນຍົງແຕ່ການກຳນົດຈຸດຕ່າງໆທີ່ຜ່ານມາບໍ່ໄດ້ກຳນົດສະເພາະກຳນົດແບບລັກສະນະລວມ ຍັງບໍ່ໄດ້ກຳນົດຈຸດຂອບເຂດທີ່ຫວງຫ້າມເປັນປ່າສະຫງວນທີ່ຈະແຈ້ງ

ມາຮອດປະຈຸດບັນ ເຫັນວ່າມີທ່າອ່ຽງສະພາບລວມຂອງການພັດທະນາເສດຖະກິດສັງຄົມໂດຍ ສອດຄ່ອງຕາມແຜນນະໂຍບາຍຂອງພັກ-ລັດ ໄດ້ມີການຂະຫຍາຍຕົວ ຢ່າງກ້ວງຂວາງ ໂດຍສະເພາະຄວາມຕ້ອງການໃນການພັດທະນາການຊົມໃຊ້ທີດິນ,ປ່າໄມ້ ແລະ ນໍ້ານັບມື້ນັບກວ້າງຂວາງ

ສະນັ້ນ ເພື່ອເປັນການສ້າງຄວາມເຂັ້ມແຂງໃຫ້ແກ່ການປົກປັກຮັກສາ ແລະ ຄຸ້ມຄອງປ່າໄມ້ໃຫ້ມີຄວາມຍືນຍົງຕາມທິດສີຂຽວ, ອີກອັນຫນຶ່ງກະເພື່ອເປັນການຮອງຮັບໃຫ້ການກະກຽມຄວາມພ້ອມເຂົ້າສູ້ປີທ່ອງທ່ຽວລາວ 2018 ເວົ້າລວມ, ເວົ້າສະເພາະເມືອງວັງວຽງ ກໍ່ຄືເຂດນາງລ້ອງກວາງໃຫ້ເຕັມດ້ວຍບັນຍາກາດທີ່ດີ, ມີອາກາດສົດໃສ, ມີພູຜາທີສວຍງາມ ແລະ ມີແຫຼ່ງທ່ອງທ່ຽວທີ່ຕິດພັນກັບທຳມະຊາດທີ່ແທ້ຈິງ,

ດັ່ງນັ້ນ ທາງຄະນະຮັບຜິດຊອບໄດ້ປະຕິບັດຕາມທິດຊີ້ນຳຂອງເຈົ້າເມືອງໆວັງວຽງໄດ້ລົງສຳຫຼວດກວດກາພື້ນທີ່ຕົວຈິງ ໂດຍສົມທົບກັບອົງການຈັດຕັ້ງບ້ານ ຂອງບ້ານນາມ່ວງ ເຫັນໄດ້ວ່າ ເຂດຜາມອມ,ຜາໂພ ເຊິ່ງເປັນເຂດຍອດນໍ້າ ອອກຈາກຮູຜາແລ້ວໄຫຼມາໃສເຂດອ່າງຫຼວງ, ຖ້າເຂດດັ່ງກ່າວບໍ່ໄດ້ຮັບການອະນຸລັກຮັກສາ ຫຼື ກຳນົດເປັນເຂດປ່າສະຫງວນໄວ້ໃນອານາຄົດ ແນ່ນອນອາດຈະມີບັນຫາຄືກັນກັບຫ້ວຍນໍ້າອື່ນໆ

ທາງເມືອງ ແລະ ການຈັດຕັ້ງບ້ານນາມ່ວງຈື່ງເຫັນໄດ້ຄວາມສຳຄັນໃນການຟື້ນຟູທຳມະຊາດ ແລະ ສີ່ງແວດລ້ອມໃຫ້ເປັນມິດກັບສັງຄົມຢ່າງກວ້າງຂວາງ ທາງເມືອງຈຶ່ງໄດ້ອອກຂໍ້ຕົກລົງສະບັບເລກທີ549/ຈມ.ວວ ລົງວັນທີ 08/ 11/ 2017 ວ່າດ້ວຍການກຳນົດເຂດ ຜາມອມ,ຜາໂພ ໃນເນື້ອທີ 59 ເຮັກຕາ ເປັນເຂດສະຫວງນຂອງບ້ານນາມ່ວງ ກຸ່ມນາລ້ອງກວາງ ເມືອງວັງວຽງ.

ໃນຕອນທ້າຍພິທີທ່ານ ສຸວຽງທອງ ວົງຈຳປາ ຄະນະປະຈຳພັກເມືອງ ຮອງເຈົ້າເມືອງໆວັງວຽງ ຍັງໃຫ້ກຽດໂອ້ລົມ ແລະ ເປີດແຖບຜ້າຮັບຮອງເອົາເຂດຜາມອມ,ຜາໂພ ເປັນເຂດສະຫງວນຂອງບ້ານນາມ່ວງ ກຸ່ມນາລ້ອງກວາງ ເມືອງວັງວຽງ.

ພາບ ແລະ ຂ່າວ : ໝອນແກ້ວ ນັກຂ່າວເມືອງວັງວຽງ

Leave a Reply

Your email address will not be published. Required fields are marked *