ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ ຢ້ຽມຢາມ ແລະ ເຮັດວຽກຢູ່ເມືອງແມດ ແຂວງວຽງຈັນ

ຕອນເຊົ້າວານນີ້ ( ວັນທີ 20 ທັນວາ 2017 ) ທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ເລຂາທິການສູນກາງພັກ, ປະທານຄະນະກວດກາສູນກາງພັກ-ອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ພ້ອມດ້ວຍຄະນະ ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງແມດ ແຂວງວຽງຈັນ

ໂດຍ ທ່ານ ວີດົງ ໄຊຍະສອນ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ ພ້ອມດ້ວຍຄະນະນຳຂັ້ນແຂວງ, ເມືອງ ແລະ ພະນັກງານ ຫຼັກແຫຼ່ງໄດ້ໃຫ້ການຕ້ອນຮັບຢ່າງອົບອຸ່ນ.

ທ່ານ ລໍາໄມ ກູດລາວົງ ກໍາມະການພັກແຂວງ, ເລຂາພັກເມືອງ, ເຈົ້າເມືອງໆແມດ ໄດ້ລາຍງານຫຍໍ້ການຈັດຕັ້ງປະຕິບັດແຜນ ພັດທະນາ ເສດຖະກິດ-ສັງຄົມ ຂອງເມືອງໃນໄລຍະຜ່ານມາ ເຊິ່ງບາງຕອນສຳຄັນທ່ານໄດ້ກ່າວວ່າ: ທົ່ວເມືອງມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍໂດຍພື້ນຖານ, ເສດຖະກິດໄດ້ຮັບການພັດທະນາ ແລະ ຂະຫຍາຍຕົວ ໃນລະດັບ 8,05% ໃນໄລຍະ 1 ປີ ຜ່ານມາ ລວມຍອດຜະລິດຕະພັນພາຍໃນບັນລຸ 139 ຕື້ກວ່າກີບ, ສະເລ່ຍລາຍຮັບໃສ່ຫົວຄົນ ໄດ້ 762 ໂດລາຕໍ່ຄົນຕໍ່ປີ, ທຽບໃສ່ ປີ 2014-2015 ເພີ່ມຂຶ້ນ 316 ໂດລາ. ເດັກໃນເກນອາຍຸໄດ້ເຂົ້າຮຽນ, ອັດຕາເຂົ້າຮຽນຊັ້ນອານຸບານ ປະຕິບັດໄດ້ 67,37%; ຊັ້ນປະຖົມ ປະຕິບັດໄດ້107,39%, ຊັ້ນມັດທະຍົມຕອນຕົ້ນປະຕິບັດ ໄດ້ 95,03%, ຊັ້ນມັດທະຍົມຕອນປາຍ ປະຕິບັດໄດ້ 74%, ອັດຕາປະລະການຮຽນ 3,40%

ທົ່ວເມືອງມີກຸ່ມບ້ານພັດທະນາ 4 ກຸ່ມບ້ານ, ສ້າງບ້ານພັດທະນາ ໄດ້ 5 ບ້ານ, ມີຄອບຄົວພັດທະນາ 799 ຄອບຄົວ, ເມືອງມີບ້ານ ທຸກຍາກ 7 ບ້ານ, ມີ 149 ຄອບຄົວ, ທຽບໃສ່ ປີ 2014-2015 ຫຼຸດລົງ 4 ບ້ານ, ຄອບຄົວທຸກຍາກຫຼຸດລົງ 599 ຄອບຄົວ ແລະ ປັບປຸງແຕ່ງຕັ້ງ 5 ໜ່ວຍງານພະນັກງານຊ່ວຍວຽກຂັ້ນບ້ານ ຈໍານວນ 75 ທ່ານ.

ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມ ແລະ ມີຄຳເຫັນຊີ້ນຳຕໍ່ການພັດທະນາເສດຖະກິດ-ສັງຄົມຂອງເມືອງຕື່ມບາງດ້ານ ເປັນຕົ້ນ

ເອົາໃຈໃສ່ປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບຢ່າງແຂງແຮງ ໂດຍສະເພາະແມ່ນຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ ຢ່າງທັນການ;

ເອົາໃຈໃສ່ພັດທະນາສີມືແຮງງານໃຫ້ແກ່ປະຊາຊົນ ເພື່ອສາມາດສ້າງວຽກເຮັດງານທຳ ກໍ່ຄືລາຍຮັບໃຫ້ແກ່ເຂົາເຈົ້າ;

  • ເອົາໃຈໃສ່ຕໍ່ການແກ້ໄຂຄວາມທຸກຍາກຂອງປະຊາຊົນ ໃຫ້ຫຼຸດໜ້ອຍຖອຍລົງເປັນກ້າວໆ;
  • ສືບຕໍ່ຊຸກຍູ້ປະຊາຊົນເອົາໃຈໃສ່ພັດທະນາຕົນເອງ ໂດຍເລັ່ງໃສ່ການນຳໃຊ້ທ່າແຮງຂອງທ້ອງຖິ່ນ ລວມທັງ ການສ້າງສະຕິຄວາມເປັນເຈົ້າການເຄົາລົບລະບຽບກົດໝາຍ, ນັບຖືການຈັດຕັ້ງ, ສ້າງສະຕິຊາດ.
  • ເອົາໃຈໃສ່ຕໍ່ວຽກງານຮັກສາສຸຂະພາບຂອງປະຊາຊົນ ຕາມຫຼັກອະນາໄມ 3 ສະອາດ;
  • ປັບປຸງລະບົບການເມືອງຢູ່ຮາກຖານ ໃຫ້ມີຄວາມໜັກແໜ້ນ, ເຂັ້ມແຂງ ບົນພື້ນຖານຄວາມເປັນເອກະພາບຂອງຄະນະພັກ-ຄະນະນຳທຸກຂັ້ນ ແລະ ຄວາມສາມັກຄີພາຍໃນຢ່າງແໜ້ນແຟ້ນ ເຊິ່ງສິ່ງເຫຼົ່ານີ້ມັນເປັນຂອດຕັດສິນ ຕໍ່ການຈັດຕັ້ງປະຕິບັດວຽກງານຮອບດ້ານຂອງເມືອງ ໃຫ້ມີຜົນສຳເລັດ.

ນອກຈາກນີ້ ຍັງໄດ້ມອບເງິນຈຳນວນ 10 ລ້ານ ກີບ, ຄອມພີວເຕີຈຳນວນ 2 ຊຸດ, ປິນເຕີ ຈຳນວນ 1 ຊຸດ, ຢາປົວພະຍາດ ຈຳນວນ 2 ແກັດ, ເຄື່ອງນຸ່ງຫົ່ມອີກຈຳນວນໜຶ່ງໃຫ້ທາງຄະນະພັກເມືອງ ອຳນາດ ການປົກຄອງແມດ.

ພາຍຫລັງສຳເລັດການຢ້ຽມຢາມເມືອງແມດ ແລ້ວຍັງໄດ້ສືບຕໍ່ລົງເຮັດວຽກ ແລະ ຢ້ຽມຢາມ ເມືອງກາສີ ຕື່ມອີກ.

ລາຍລະອຽດການລົງຢ້ຽມຢາມເມືອງກາສີ ຕິດຕາມໄດ້ໃນໂພສຂ່າວຕໍ່ໄປ.

Leave a Reply

Your email address will not be published. Required fields are marked *