ເມືອງກາສີ, ແຂວງວຽງຈັນ ສະເຫຼີມສະຫຼອງວັນຊາດ ຄົບຮອບ 42 ປີ

          ໃນໂອກາດວັນສະຖາປະນາ ສປປ ລາວ ຄົບຮອບ 42 ປີ (2/12/1975 – 2/12/2017). ໃນວັນທີ 6 ທັນວານີ້ ເມືອງກາສີ ໄດ້ຈັດງານໂຮມຊຸມນຸມ ເພື່ອສະເຫຼີມສະຫຼອງວັນຊາດ ຄົບຮອບ 42ປີ ຂື້ນຢ່າງເປັນທາງການ ຢູ່ທີ່ສະໂມສອນຂອງເມືອງ


          ໂດຍການເປັນກຽດເຂົ້າຮ່ວມຂອງ ທ່ານ ຄໍາສົດ ເພັດລາວັນ ກຳມະການພັກແຂວງ ເລຂາພັກເມືອງ ເຈົ້າເມືອງກາສີ, ມີບັນດາຄະນະປະຈຳພັກເມືອງ, ກຳມະການພັກເມືອງ, ພະນັກງານອາວຸໂສບຳນານ, ຫົວໜ້າຫ້ອງການ, ທະຫານ-ຕຳຫຼວດ, ພະນັກງານ-ລັດຖະກອນ ຕະຫຼອດຮອດພໍ່ແມ່ປະຊາຊົນບັນດາເຜົ່າ ພາຍໃນເມືອງເຂົ້າຮ່ວມຢ່າງຫຼວງ ຫຼາຍ. 


          ໃນໂອກາດດັ່ງກ່າວ ທ່ານ ຄຳສົດ ເພັດລາວັນ ກຳມະການພັກແຂວງ ເລຂາພັກເມືອງ ເຈົ້າເມືອງໆກາສີ ໄດ້ໃຫ້ກຽດຂື້ນປາຖະກະຖາ ເຊີ່ງທ່ານໄດ້ຍົກໃຫ້ເຫັນເຖີງ ມູນເຊື້ອການກຳເນີດ ຄວາມໝາຍຄວາມສຳຄັນຂອງວັນຊາດທີ 2 ທັນວາ ແລະ ບາງຜົນສຳເລັດໃນການປົກປັກຮັກສາ ພັດທະນາປະເທດຊາດ ຕະຫຼອດໄລຍະ 42ປີ ພາຍໃຕ້ການຊີ້ນຳໆພາຂອງພັກປະຊາຊົນປະຕິວັດລາວ ໄດ້ເຮັດໃຫ້ປະເທດລາວ ໄດ້ມີສະຖຽນລະພາບ ທາງດ້ານການເມືອງ, ປະເທດຊາດໄດ້ຮັບການພັດທະນາດີຂຶ້ນເປັນກ້າວໆ, ປະຊາຊົນບັນດາເຜົ່າ ໄດ້ປະກອບສ່ວນເຂົ້າໃນພາລະກິດ ປົກປັກຮັກສາ ແລະ ສ້າງສາພັດທະນາປະເທດຊາດ ຈົນເຮັດໃຫ້ ສາທາລະນະລັດ ປະຊາທິປະໄຕ ປະຊາຊົນລາວ ມີການພັດທະນາດີຂຶ້ນຢ່າງບໍ່ຢຸດຢັ້ງ.


          ພ້ອມນັ້ນ ທ່ານຍັງກ່າວອີກວ່າ: ວັນທີ 2 ທັນວາປີ 1975 ແມ່ນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ເປັນພັນໆປີຂອງຊາດລາວເຮົາ, ແມ່ນວັນທີ່ປະຊາຊົນລາວບັນດາເຜົ່າໄດ້ມີອິດສະຫຼະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ, ແມ່ນວັນທີ່ປະເທດລາວໄດ້ມີເອກະລາດຢ່າງສົມບູນ ມີປະຊາທິປະໄຕຢ່າງຄົບຖ້ວນ, ມີທີ່ຕັ້ງອັນສົມກຽດ ແລະ ມີຖານະເທົ່າທຽມກັບປະເທດອື່ນໆ ໃນເວທີປະຊາຄົມໂລກ, ວັນທີ 2 ທັນວາ ແມ່ນວັນແຫ່ງສັນຕິພາບ, ວັນແຫ່ງການກ້າວສູ່ຍຸກສະໄໝໄໝ່ແຫ່ງການສ້າງປະເທດລາວ ໃຫ້ກາຍເປັນປະເທດ ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ.

          ພ້ອມນັ້ນທ່ານເຈົ້າເມືອງຍັງຮຽກຮ້ອງມາຍັງ ສະມາຊິກພັກ, ພະນັກງານ, ທະຫານ, ຕໍາຫຼວດ ຕະຫຼອດຮອດພໍ່ແມ່ປະຊາຊົນບັນດາເຜົ່າຊາວເມືອງກາສີ ຈົ່ງພ້ອມກັນສືບຕໍ່ເສີມຂະຫຍາຍມູນເຊື້ອ ວັນຊາດທີ 2 ທັນວາ ເຂົ້າໃນການສ້າງສາພັດທະນາປະເທດຊາດ ເປັນຕົ້ນແມ່ນ: ຕັ້ງໜ້າເຊີດຊູນໍ້າໃຈຮັກຊາດ ເປັນເຈົ້າຕົນເອງ ສ້າງຄວາມເຂັ້ນແຂງດ້ວຍຕົນເອງ ເພື່ອສ້າງປະເທດຊາດໃຫ້ມັ່ງຄັ້ງເຂັ້ມແຂງ ປະຊາຊົນຮັ່ງມີຜາສຸກ ສັງຄົມມີຄວາມສາມັກຄີປອງດອງຍຸຕິທໍາ ແລະສີວິໄລ; ຕັ້ງໜ້າປຸກລະດົມຂະບວນການເຄື່ອນໄຫວຈັດຕັ້ງປະຕິບັດກອງປະຊຸມໃຫຍ່ຂອງພັກ ແລະ ແຜນພັດທະນາເສດຖະກິດສັງຄົມ ຂອງລັດໃຫ້ປະກົດຜົນເປັນຈິງ; ເພີ່ມທະວີແຫ່ງການຄຸ້ມຄອງລັດ ຄຸ້ມຄອງສັງຄົມຕາມທິດພັກນໍາພາ ລັດຄຸ້ມຄອງດ້ວຍກົດໝາຍ ແລະ ປະຊາຊົນເປັນເຈົ້າເຂົ້າຮ່ວມ ເພື່ອເຮັດໃຫ້ສັງຄົມມີຄວາມສະຫງົບ ສາມັກຄີປອງດອງ ແລະ ມີການພັດທະນາດ້ວຍຄວາມໜັກແໜ້ນຕໍ່ເນື່ອງ; ເພີ່ມຄວາມສາມັກຄີປອງດອງຂອງປະຊາຊົນບັນດາເຜົ່າ ພາຍໃຕ້ການນຳພາຂອງພັກ, ເອົາໃຈໃສ່ຈຳກັດແກ້ໄຂປະກົດການຫຍໍ້ທໍ້ຕ່າງໆໃນສັງຄົມ ໃຫ້ໝົດໄປເປັນກ້າວໆ; ເອົາໃຈໃສ່ປະຕິບັດແນວທາງການຕ່າງປະເທດ ຢ່າງສະໝໍ່າສະເໝີແຕ່ຕົ້ນຕະຫຼອດປາຍ ໂດຍສະເພາະປະເທດເພື່ອນມິດຍຸດທະສາດ, ບັນດາປະເທດໃກ້ຄຽງ ກໍ່ຄືບັນດາປະເທດປະຊາຄົມອາຊຽນ, ອົງການຈັດຕັ້ງສາກົນ ແລະ ປະເທດເພື່ອນມິດໃນໂລກ. 

          ພ້ອມນັ້ນ ທ່ານ ຄໍາສົດ ເພັດລາວັນ ຍັງຍົກໃຫ້ເຫັນເຖີງ ການກຳເນີດ, ຄວາມໝາຍຄວາມສຳຄັນ ຂອງວັນມະຫາປະຕິວັດເດືອນຕຸລາລັດເຊຍ ຄົບຮອບ 100ປີ.  

         ຫຼັງຈາກນັ້ນ ທ່ານ ຄຳອົ້ນ ອິນທະວົງ ກຳມະການພັກເມືອງ ຫົວໜ້າຫ້ອງການໂຄສະນາ-ອົບຮົມເມືອງກາສີ ໄດ້ໃຫ້ກຽດຂື້ນປະຖະກະຖາ ວັນຄ້າຍວັນເກີດຂອງປະທານ ໄກສອນ ພົມວິຫານ ຄົບຮອບ 97ປີ. ໃນໂອກາດນີ້ ຍັງໄດ້ຮັບຊົມການສະແດງສິນລະປະ ຂອງນ້ອງນ້ອຍເຍົາວະຊົນ ຈາກບັນດາໂຮງຮຽນອ້ອມຂ້າງເມືອງອີກດ້ວຍ.


ຂ່າວ: ເມືອງກາສີ

Leave a Reply

Your email address will not be published. Required fields are marked *