ເມືອງວັງວຽງ ເປີດກອງປະຊຸມໃຫຍ່ຄັ້ງທີ II ຂອງເຮືອຈັກຫາງຍາວ ແລະ ຄັດເລືອກເອົາຄະນະສະມາຄົມເຮືອຈັກຫາງຍາວຊຸດໃຫມ່

     ໃນຕອນເຊົ້າຂອງວັນທີ່ 14 ພະຈິກ 2017 ຜ່ານມານີ້, ຢູ່ທີ່ສະໂມສອນຂອງເມືອງວັງວຽງ ແຂວງວຽງຈັນ. ໄດ້ມີກອງປະຊຸມໃຫຍ່ຄັ້ງທີ່ II ຂອງເຮືອຈັກຫາງຍາວ. ໂດຍພາຍໃຕ້ການເປັນປະທານຂອງທ່ານ ສຸວຽງທອງ ວົງຈຳປາ ຄະນະປະຈຳພັກເມືອງ ຮອງເຈົ້າເມືອງໆວັງວຽງ. ມີບັນດາທ່ານຫົວຫນ້າຫ້ອງການອ້ອມຂ້າງ, ພະນັກງານທີ່ກ່ຽວຂ້ອງ ແລະສະມາຊິກເຮືອຈັກຫາງຍາວເຂົ້າຮ່ວມ.

     ທ່ານ ໂພໄຊ ຈັນທະວົງ ຫົວຫນ້າສະມາຄົມເຮືອຈັກຫາງຍາວ ໄດ້ຂຶ້ນຜ່ານບົດສະຫຼຸບ ປະຈຳສົກປີ 2015 – 2016 ແລະ ທິດທາງແຜນການ ປະຈຳສົກປີ 2017 – 2018 ວ່າ: ສະມາຄົມເຮືອຈັກຫາງຍາວ ແມ່ນອົງການຈັດຕັ້ງ ໜຶ່ງທີ່ສຳຄັນໃນການປະກອບສ່ວນເຂົ້າໃນວຽກງານການພັດທະນາເສດຖະກິດ-ສັງຄົມຂອງເມືອງວັງວຽງ. ສະມາຊິກທຸກຄົນມີຄວາມເຂົ້າໃຈເຊື່ອມຊື່ມຕໍ່ແນວທາງນະໂຍບາຍພັກ-ລັດຢ່າງດີ ໂດຍສະເພາະການດຳເນີນທຸລະກິດໄປຕາມລະບຽບກົດໝາຍວາງອອກ. ມີຄວາມສາມັກຄີເປັນເຈົ້າການໃນການບໍລິການຮັບໃຊ້ສັງຄົມເປັນຢ່າງດີ ເຊິ່ງມັນສະແດງອອກໃນການປະຕິບັດລະບຽບວິໃນຂອງສະມາຄົມວາງອອກຢ່າງເຂັ້ມງວດ. 

     ສະມາຄົມເຮືອຈັກຫາງຍາວ ເມືອງວັງວຽງມີຄະນະບໍລິຫານງານ 6 ທ່ານແລະມີ 6 ໜ່ວຍ, ມີສະມາຊິກທັງໝົດ114 ຄົນ, ມີພາຫະນະ 114 ລຳ, ມີເສື້ອຊູຊີບ 228 ຜືນ ແລະມີລາຍຮັບຈາກການປ່ອຍເຮືອທັງໝົດ 80 ລ້ານກວ່າກີບ. ສ່ວນທິດທາງແຜນການສູ້ຊົນໃນຕໍ່ໜ້າຈະເພີ່ມທະວີຈັດຕັ້ງເຊື່ອມຊຶມບັນດານິຕິກຳຕ່າງໆກໍ່ຄືກົດລະບຽບພາກສ່ວນທີ່ກ່ຽວຂ້ອງ, ຈະເພີ່ມທະວີຄວາມສາມັກຄີພາຍໃນສະມາຄົມເຮືອຈັກຫາງຍາວໃຫ້ໜັກແໜ້ນເຂັ້ມແຂງ.

     ກອງປະຊຸມຍັງໄດ້ມີການບ່ອນບັດຄັດເລືອກເອົາຄະນະຊຸດໃໝ່ ໂດຍມີຜູ້ລົງສະໝັກ 8 ທ່ານ ເລືອກເອົາ 5 ທ່ານ ຜ່ານການບ່ອນບັດຄັດເລືອກເອົາໄດ້ທ່ານ ໂລ້ນ ສີບໍລິບານ ເປັນຫົວຫນ້າ, ທ່ານ ອາກ ນາມມະໄຊ ເປັນຮອງ, ທ່ານ ກິ ວົງໄຊ-ທ່ານ ພອນ ທາວົງ- ທ່ານ ກຽນ ໂສລັດຕະນະວົງ ເປັນຄະນະ.

     ຕອນທ້າຍ ທ່ານ ສຸວຽງທອງ ວົງຈຳປາ ຄະນະປະຈຳພັກເມືອງ ຮອງເຈົ້າເມືອງໆວັງວຽງ ກໍ່ຍັງໃຫ້ກຽດໂອ້ລົມຕື່ມອີກ.

Leave a Reply

Your email address will not be published. Required fields are marked *