ກອງປະຊຸມເຜີຍແຜ່ກົດໝາຍທີ່ພົວພັນເຖິງແມ່ ແລະ ເດັກໃຫ້ແກ່ແມ່ຍິງຂັ້ນເມືອງ – ຂັ້ນບ້ານ

          ໃນວັນທີ່ 9-10 ພະຈິກ 2017 ຜ່ານມາ, ຢູ່ທີ່ສະໂມສອນຂອງເມືອງວັງວຽງ ແຂວງວຽງຈັນ. ໄດ້ມີກອງປະຊຸມເຜີຍແຜ່ກົດໝາຍທີ່ພົວພັນເຖິງແມ່ແລະເດັກໃຫ້ແກ່ສະຫະພັນແມ່ຍິງຂັ້ນເມືອງ-ຂັ້ນບ້ານ. 

          ໂດຍພາຍໃຕ້ການເປັນປະທານຂອງທ່ານ ນາງ ຈັນທະບູນ ໂພຊະສານ ກຳມະການພັກແຂວງ ປະທານສະຫະພັນແມ່ຍິງແຂວງວຽງຈັນ, ມີທ່ານ ສຸວຽງທອງ ວົງຈຳປາ ຄະນະປະຈຳພັກເມືອງ ຮອງເຈົ້າເມືອງໆວັງວຽງ, ມີບັນທ່ານຄະນະປະຈຳພັກເມືອງ, ກຳມະການພັກເມືອງ, ປະທານສະຫະພັນແມ່ຍິງເມືອງ, ປະທານສະຫະພັນແມ່ຍິງໜ່ວຍອ້ອມຂ້າງ-ບ້ານແລະສະມາຊິກແມ່ຍິງເຂົ້າຮ່ວມ.


          ທ່ານ ນາງ ຈັນທະບູນ ໂພຊະສານ ກຳມະການພັກແຂວງ ປະທານສະຫະພັນແມ່ຍິງແຂວງວຽງຈັນ ຍັງໄດ້ໃຫ້ກຽດເຜີຍແຜ່ບັນດາກົດໝາຍຄື: ກົດໝາຍວ່າດ້ວຍສະຫະພັນແມ່ຍິງລາວ, ກົດໝາຍວ່າດ້ວຍການພັດທະນາແລະປົກປ້ອງແມ່ຍິງ, ກົດໝາຍວ່າດ້ວຍການຕ້ານແລະການສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ-ເດັກນ້ອຍ, ກົດໝາຍວ່າດ້ວຍການຕ້ານການຄ້າມະນຸດ, ດຳລັດນາຍົກລັດຖະມົນຕີວ່າດ້ວຍການແຕ່ງດອງລະຫວ່າງພົນລະເມືອງລາວກັບຕ່າງປະເທດ, ກົດໝາຍຄອບຄົວ, ກົດໝາຍວ່າດ້ວຍການປົກປ້ອງ ແລະ ສິດຜົນປະໂຫຍດຂອງເດັກ, ບາງເນື້ອໃນກ່ຽວກັບຄວາມສະອາດສາມາດໃນການນຳພາ, ພິທີການແລະມາລະຍາດໃນສັງຄົມ. 

          ຫຼັງຈາກນັ້ນ ກໍ່ໄດ້ລົງໄປເຜີຍແຜ່ບັນດາກົດໝາຍໃຫ້ກັບສະຫະພັນແມ່ຍິງບ້ານໂພນຄໍາ (ບ້ານສາມສ້າງ)ແລະ ບ້ານນາລ້ອງກວ້າງ.

          ກອງປະຊຸມຍັງໄດ້ຜ່ານກ່ຽວກັບບົດສະຫຼຸບ ແລະ ສະຖິຕິໂດຍທ່ານ ນາງ ຂັນຄໍາ ສີທານີ ກໍາມະການພັກເມືອງ ປະທານສະຫະພັນແມ່ຍິງເມືອງວ່າ:  ສະຫະພັນແມ່ຍິງເມືອງມີລະບົບການຈັດຕັ້ງປະກອບມີສະຫະພັນໜ່ວຍອ້ອມຂ້າງ 51 ໜ່ວຍ, ສະຫະພັນແມ່ຍິງບ້ານມີ 63 ບ້ານ. ມີຄະນະບໍລິຫານງານ 19 ຄົນ, ມີຄະນະສະຫະພັນແມ່ຍິງໜ່ວຍອ້ອມຂ້າງ-ບ້ານ 368 ຄົນ. ສະມາຊິກສະຫະພັນແມ່ຍິງມີທັງໝົດ 8.047 ຄົນ, ສະຫະພັນແມ່ຍິງ 3 ດີທັງໝົດ 7.498 ຄົນ, ປະເພດ 1 ມີ 5.318 ຄົນ, ປະເພດ 2 ມີ 2.180 ຄົນ.

          ຕອນທ້າຍ ທ່ານ ນາງ ຈັນທະບູນ ໂພຊະສານ ກຳມະການພັກແຂວງ ປະທານສະຫະພັນແມ່ຍິງແຂວງວຽງຈັນ ຍັງໄດ້ໃຫ້ກຽດໂອ້ລົມ ແລະ ຊີ້ທິດເຍື້ອງທາງຕື່ມອີກ.

ຂ່າວ: ເມືອງວັງວຽງ

Leave a Reply

Your email address will not be published. Required fields are marked *