ກອງປະຊຸມໃຫຍ່ຄັ້ງທີ V ຂອງກຳມະບານ ຮາກຖານຫ້ອງການກະຊິກຳ ແລະ ປ່າໄມ້ເມືອງວຽງຄຳ

          ໃນຕອນເຊົ້າຂອງວັນທີ 18 ຕຸລາ 2017, ກຳມະບານຮາກຖານຫ້ອງການກະສິກຳ ແລະ ປ່າໄມ້ ເມືອງວຽງຄຳ ໄດ້ເປີດກອງປະຊຸມໃຫຍ່ຄັ້ງທີ V ຂື້ນຢ່າງເປັນທາງການ ຢູ່ທີ່ຫ້ອງປະຊຸມຂອງຫ້ອງການດັ່ງກ່າວ,

          ໂດຍການເປັນປະທານຂອງ ທ່ານ ວາດສະໜາ ວົງສັກດາ ປະທານກຳມະບານຮາກຖານຫ້ອງການກະສິກຳ ແລະ ປ່າໄມ້ ເມືອງວຽງຄຳ, ໃຫ້ກຽດເຂົ້າຮ່ວມໂດຍ ທ່ານ ສົມພອນ ໄຊຍະທັນ ຮອງເລຂາພັກເມືອງ ຮອງເຈົ້າເມືອງ-ເມືອງວຽງຄຳ, ທ່ານ ນ. ທອງຂຳ ຂຸນພົມ ຮອງປະທານສະຫະພັນກຳມະບານເມືອງວຽງຄຳ,  ແຂກຖືກເຊີນ ແລະ ພະນັກງານສະມາຊິກກຳມະບານ ທັງໝົດເຂົ້າຮ່ວມຈຳນວນ 33 ສະຫາຍ, ຍິງ 15 ສະຫາຍ. 

          ກອງປະຊຸມຍັງໄດ້ຮັບຟັງ ການຜ່ານບົດລາຍງານການເມືອງທັງສອງພາກ, ບົດສະຫລຸບການເຄື່ອນໄຫວວຽກງານ ປະຈຳປີ 2015 – 2017 ແລະ ທິດທາງແຜນການໃນຕໍ່ໜ້າ ປີ 2018 – 2020, ໂດຍແມ່ນທ່ານ ວາດສະໜາ ວົງສັກດາ ປະທານກຳມະບານຮາກຖານ,  ໃນນັ້ນຍັງໄດ້ໃຫ້ຮູ້ກ່ຽວກັບທີ່ຕັ້ງ ພາລະບົດບາດ, ສິດ ແລະ ໜ້າທີ່ ຂອງວຽກງານກຳມະບານ ເພື່ອຜັນຂະຫຍາຍເຂົ້າສູ່ວຽກງານວິຊາສະເພາະ ໃນໄລຍະຜ່ານມາ ແລະ ຕໍ່ໜ້າ. 

          ກຳມະບານຮາກຖານຫ້ອງການກະສິກຳ ແລະ ປ່າໄມ້ ເມືອງວຽງຄໍາ ປະກອບມີສະມາຊິກກຳມະບານທັງໝົດ 28 ສະຫາຍ, ຍິງ 11 ສະຫາຍ, ພະນັກງານອາສາສະໝັກ 02 ສະຫາຍ, ຍິງ 0 ສະຫາຍ, ສະມາຊິກກຳມະບານທີ່ເປັນສະມາຊິກພັກ 22 ສະຫາຍ, ຍິງ 08 ສະຫາຍ, ສຳຮອງ 02 ສະຫາຍ, ຍິງ 01 ສະຫາຍ, ມີຄອບຄົວທີ່ດີເດັ່ນໃນການສ້າງເສດຖະກິດຄອບຄົວ ເປັນຕົ້ນແມ່ນການປູກຝັງລ້ຽງສັດມີຈຳນວນ 05 ຄອບຄົວ ແລະ ສາມາດສ້າງລາຍຮັບສະເລ່ຍເຂົ້າໃນຄອບຄົວປີລະ 8,000,000 ກີບ – 50,00,000 ກີບຕໍ່ປີ, ມີສະມາຊິກກອງທຶນຊ່ວຍເຫລືອເຊິ່ງກັນ ແລະ ກັນ ແລະ ກອງທຶນທານຸເຄາະທັງໝົດ 19 ສະຫາຍ, ຍິງ 10 ສະຫາຍ, ໃນໄລຍະຜ່ານມາໄດ້ປະຕິບັດນະໂຍບາຍຕໍ່ສະມາຊິກທີ່ເຈັບເປັນ, ນອນໂຮງໝໍ, ເກີດລູກ, ຜ່າຕັດ, ອັກຄີໄພ ແລະ ອື່ນໆ ລວມເປັນເງິນທັງໝົດ 3,000,000ກີບ.  

         ກອງປະຊຸມໄດ້ປ່ອນບັດຄັດເລືອກ ເອົາຄະນະປະທານກຳມະບານຮາກຖານຊຸດໃໝ່, ກອງປະຊຸມຄັ້ງປະຖົມມະລຶກເປັນເອກະສັນ ເລືອກເອົາ ທ່ານ ສົມຈິດ ດວງປັນຍາ ເປັນປະທານກຳມະບານຮາກຖານ, ທ່ານ ພູເຂົາ ສິນປັນຍາ ເປັນຮອງປະທານ ພ້ອມທັງເປັນປະທານກວດກາ ແລະ ທ່ານ ນາງ ລາຕີ ຈັນສີ ເປັນຄະນະ.

          ຕອນທ້າຍກອງປະຊຸມ ຍັງໄດ້ຮັບຟັງການໂອ້ລົມຂອງ ທ່ານ ສົມພອນ ໄຊຍະທັນ ຮອງເລຂາພັກເມືອງ ຮອງເຈົ້າເມືອງ-ເມືອງວຽງຄຳ ເຊິ່ງທ່ານໄດ້ກ່າວຍ້ອງຍໍຊົມເຊີຍ ກ່ຽວກັບການເຄື່ອນໄຫວວຽກງານຂອງກຳມະບານຮາກຖານ ທີ່ຍາດມໄດ້ໃນໄລຍະຜ່ານມາ ແລະ ທ່ານຍັງໄດ້ເນັ້ນໜັກໃຫ້ຄະນະຊຸດໃໝ່ ຂອງກຳມະບານຮາກຖານ ຈົ່ງເພີ່ມທະວີເອົາໃຈໃສ່ ໃນການປະຕິບັດໜ້າທີ່ວຽກງານ ພ້ອມກັນຕັ້ງໜ້າຜັນຂະຫຍາຍມະຕິຕ່າງໆ ຂອງຂັ້ນເທີງວາງອອກ, ເປັນເຈົ້າການ ໃນການສຶກສາອົບຮົມການເມືອງ-ແນວຄິດ ໃຫ້ພະນັກງານ, ສະມາຊິກກຳມະບານ ໃນຂົງເຂດຂອງຕົນຮັບຜິດຊອບ ຢ່າງເຂັ້ມງວດ.


____________

ຂ່າວ: ໄຊປັນຍາ

Leave a Reply

Your email address will not be published. Required fields are marked *