ສົກປີ2016 ແຂວງວຽງຈັນສາມາດສ້າງລາຍຮັບກິດຈະການດ້ານບໍ່ແຮ່ທັງໝົດ 2 ຕື້ກວ່າກີບ, ກວມເນື້ອທີ່ ກວມເອົາ 71.94% ເນື້ອທີ່ຂອງແຂວງ.

ແຂວງວຽງຈັນ ເປັນແຂວງຫນື່ງທີ່ມີຄວາມອຸດົມສົມບູນທາງດ້ານຊັບພະຍາກອນແຮ່ທາດ ແລະ ມີຄວາມສວຍງາມທາງດ້ານທີວທັດທຳມະຊາດ, ແຂວງວຽງຈັນແມ່ນໄດ້ປົກຄຸມເຂດພື້ນທີ່ເປັນທົ່ງພຽງ ແລະ ເຂດທີ່ເປັນພູດອຍ ມີຊັບພະຍາກອນທຳມະຊາດອັນລ້ຳຄ່າທີ່ເອື້ອຍອຳນວຍໃນການດຶງດູດການລົງທຶນທັງພາຍໃນ ແລະ ຕ່າງປະເທດ ໂດຍສະເພາະແມ່ນການລົງທຶນເຂົ້າໃນການພັດທະນາຊັບພະຍາກອນແຮ່ທາດ ຊຶ່ງສະແດງໃຫ້ເຫັນວ່າການລົງທຶນດ້ານບໍ່ແຮ່ໄດ້ມີບາດກ້າວຂະຫຍາຍຕົວ ແລະ ມີຈຳນວນເພີ່ມຂື້ນຕາມລຳດັບໃນແຕ່ລະປີ.

ກອງປະຊຸມສະຫຼຸບວຽກງານການຄຸ້ມຄອງການລົງທຶນດ້ານບໍ່ທີ່ສະໂມສອນໄຟຟ້າ ເຂື່ອນນໍ້າງື່ມ1 ພາຍໃຕ້ ການເປັນປະທານໂດຍ ທ່ານ ຄຳບົງ ຄອນສະຫວັນ ຫົວໜ້າພະແນກພະລັງງານ ແລະ ບໍ່ແຮ່ ແຂວງວຽງຈັນ, ໃຫ້ກຽດເຂົ້າຮ່ວມ ໂດຍທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ແລະ ທ່ານ ນາງ ສິງຄຳ ຄົງສະຫວັນ ຮອງເຈົ້າແຂວງໆວຽງຈັນ. ມີບັນດາຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກອ້ອມຂ້າງແຂວງ, ທ່ານເຈົ້າເມືອງ, ຮອງເຈົ້າເມືອງ ແລະ ແຂກທີ່ມີກຽດເຂົ້າຮ່ວມ.  

ທ່ານ ຄຳບົງ ຄອນສະຫວັນ ຫົວໜ້າພະແນກພະລັງງານ ແລະ ບໍ່ແຮ່ແຂວງວຽງຈັນ ໄດ້ຂື້ນກ່າວໄຂກອງປະຊຸມ ແລະ ຜ່ານບົດສະຫຼຸບວຽກງານຄຸ້ມຄອງການລົງທຶນບໍ່ແຮ່. 

ສົກປີ 2016 ແຂວງວຽງຈັນມີກິດຈະການດ້ານບໍ່ແຮ່ທີ່ໄດ້ຮັບການອະນຸຍາດຈາກສູນກາງ ແລະ ທ້ອງຖີ່ນໃຫ້ດຳເນີນຄົ້ນຄວ້າ, ສຳຫລວດ ແລະ ຂຸດຄົ້ນປຸງແຕ່ງແຮ່ທາດທັງນັກລົງທຶນ ພາຍໃນ ແລະ ຕ່າງປະເທດຈໍານວນ 93 ບໍລິສັດ, 125 ກິດຈະການ ມີເນື້ອທີ່ 1.145.897,36 ເຮັກຕ່າ ທີ່ກວມເອົາ 71.94% ຂອງເນື້ອທີ່ແຂວງວຽງຈັນ, ໃນນີ້ຢູ່ໃນຂັ້ນຕອນ ຊອກຄົ້ນຄວ້າສຳຫຼວດມີ 26 ບໍລິສັດ, 26 ກິດຈະການ, ມີເນື້ອທີ່ 1.114.381 ເຮັກຕ່າ ແລະ ຂັ້ນຕອນຂຸດຄົ້ນປຸງແຕ່ 67 ບໍລິສັດ, 99 ກິດຈະການ ມີເນື້ອທີ່ 31,516.36 ເຮັກຕ່າ. 

ປະເພດແຮ່ທາດທີ່ໄດ້ຮັບອະນຸຍາດດຳເນີນກິດຈະການດ້ານບໍ່ແຮ່ມີ : ປະເພດແຮ່ຄຳ, ແຮ່ທາດ, ແຮ່ຊືນ, ສັງກະສີ, ຖ່ານຫີນ, ບາລິດ, ຫີນປູນ, ດິນໜຽວ, ຂີ້ເຈຍ, ເກືອໂຟຕັດ, ຟົດສເຟດ. 

ວຽກງານດ້ານການຜະລິດ, ການຈໍາໜ່າຍ ແລະ ການປະຕິບັດ ທາງດ້ານການເງິນ ສາມາດຜະລິດ ແລະ ຈໍາໜ່າຍແຮ່ທາດບາລິດ (ປະເພດກ້ອນ) ຈຳນວນ 41 ພັນກວ່າໂຕນ, ແຮ່ທາດບາລິດ (ປະເພດຝຸ່ນ) 3 ພັນກວ່າໂຕນ, ແຮ່ສັງກະສີ 890 ໂຕນ, ແຮ່ຊືນ 518 ໂຕນ, ແຮ່ຖ່ານຫີນ 18 ພັນກວ່າໂຕນ, ຂີ້ເຈຍ 247 ໂຕນ, ຫີນປູນ 53 ພັນກວ່າໂຕນ, ຫີນກໍ່ສ້າງ 69 ພັນກວ່າໂຕນ, ດີນໜຽວ 29 ພັນກວ່າໂຕນ, ດິນຊາຍພູ 25 ພັນກວ່າໂຕນ, ສາມາດສ້າງລາຍຮັບຈາກກິດຈະການທັງໝົດ 2.161.991.628 ກີບ ທີ່ສະເພາະຂັ້ນແຂວງໄດ້ອະນຸຍາດ ໃນນີ້ມີຄ່າເຊົ່າເນື້ອທີ່ສໍາປະທານ, ຄ່າຊັບພະຍາກອນ, ຄ່າອາກອນກຳໄລ ແລະ ຄ່າອາກອນນມູນຄ່າເພີ່ມ. 

ແລະ ທ່ານສາມາດຕິດຕາມລາຍລະອຽດຂອງຂ່າວໄດ້ທາງໜ້າໜັງສືພີມ, ວິທະຍຸ ແລະ ໂທລະພາບ ແຂວງວຽງຈັນ. 

Leave a Reply

Your email address will not be published. Required fields are marked *