ເມືອງໝື່ນ ຈັດພິທີພົບປະຕັ້ງຄ້າຍມິດຕະພາບເຍົາວະຊົນທັນວາ 5 ໂຮງຮຽນ ກຸ່ມໂນນໄຮ.

ເພື່ອເປັນການສ້າງຂະບວນການຂັບນັບຮັບຕ້ອນວັນຊາດທີ 2 ທັນວາ ຄົບຮອບ 43 ປີ ,ວັນຄ້າຍວັນເກີດຂອງປະທ່ານ ໄກສອນ ພົມວິຫານ ຄົບຮອບ 98 ປີ ,ວັນສ້າງຕັ້ງກອງທັບປະຊາຊົນລາວຄົບຮອບ 70 ປີ,ວັນສ້າງຕັ້ງເຍົາວະຊົນຄົບຮອບ 63 ປີ ແລະ ກອງປະຊຸມໃຫຍ່ຄັ້ງທີ III ຂອງຄະນະບໍລິຫານງານຊາວໜຸ່ມເມືອງ ທີ່ຈະເປີດຂຶ້ນໃຫ້ມີຂະບວນຟົດຟື້ນ,

ເພື່ອເຕົ້າໂຮມສະມາຊິກເຍົາວະຊົນ – ອານຸຊົນເຂົ້າສູ່ການຈັດຕັ້ງກໍ່ຄືຂະບວນການລວມຂອງຊາດ ,ຂອງພັກ ພ້ອມທັງເປັນການເປີດໂອກາດໃຫ້ເດັກເຍົາວະຊົນໄດ້ພົບປະເເລກປ່ຽນບົດຮຽນເຊິ່ງກັນ ແລະ ກັນ.

ຕອນເຊົ້າຂອງ ວັນທີກາງເດືອນ ພະຈິກ 2018 ນີ້ ຢູ່ທີ່ໂຮງຮຽນປະຖົມສົມບູນບ້ານ ໂພນສີວິໄລ ເມືອງໝື່ນ ແຂວງວຽງຈັນ ໄດ້ຈັດພິທີ ຕັ້ງຄ້າຍພົບປະເຍົາວະຊົນທັນວາ 5 ໂຮງຮຽນ ກຸ່ມໂນນໄຮ ຂຶ້ນ ພາຍໃຕ້ການໃຫ້ກຽດເຂົ້າຮ່ວມ ຂອງທ່ານ ພັທ ບຸນເຄນ ໄຊຍະບົວພາ ຄະນະປະຈຳພັກເມືອງ ຫົວໜ້າກອງບັນຊາການ ປກສ ເມືອງໝື່ນ, ທ່ານ ຢາງ ລໍ ຮອງເລຂາຄະນະບໍລິຫານງານຊາວໜຸ່ມເມືອງ , ມີບັນດາຫົວໜ້າອຳນວຍການໂຮງຮຽນ ພາຍໃນກຸ່ມໂນນໄຮ,ແຂກຖືກເຊີນ,ຄູ – ອາຈານ ແລະ ນ້ອງນ້ອຍເຍົາວະຊົນເຂົ້າຮ່ວມ.

ໃນພິທີໄດ້ຜ່ານປະຫວັດຄວາມເປັນມາຂອງຄ້າຍເຍົາວະຊົນ ພ້ອມທັງສະເໜີບັນດາກ້ອນກຳລັງ

ຈາກນັ້ນ ຄະນະປະທ່ານ ແລະ ບັນດາແຂກຖືກເຊີນກໍ່ໄດ້ພ້ອມກັນ ເດີນຊົມຄ້າຍມິດຕະພາບຂອງນ້ອງນ້ອຍເຍົາຊົນ 5 ໂຮງຮຽນກຸ່ມໂນນໄຮຄື: ໂຮງຮຽນປະຖົມບ້ານໂພນສີວິໄລ, ໂຮງຮຽນປະຖົ່ມສົມບູນບ້ານນາປ່າໄຜ່, ໂຮງຮຽນປະຖົມສົມບູນບ້ານໂພນງາມ, ໂຮງຮຽນປະຖົມສົມບູນບ້ານນ້ຳຮອນ ແລະ ໂຮງຮຽນ ມສ ນ້ຳຮອນ

ເຊິ່ງແຕ່ລະຄ້າຍກໍ່ໄດ້ມີການຈັດວາງສະເເດງ ແບບຈຳລອງການດຳລົງຊີວິປະຈຳວັນ ຂອງບ້ານ,ເມືອງ ທີ່ມີພື້ນຖານໂຄ່ງລ່າງຄົບຊຸດ ເປັນຕົ້ນຖະໜົນຫົນທາງ, ໄຟຟ້ານ້ຳປະປາ, ສຳນັກງານອົງການຂອງເມືອງ ຕະຫຼອດຮອດເຮືອນຊານຂອງປະຊາຊົນ ລວມໄປເຖິ່ງການດຳລົງຊີວິດຂອງປະຊາຊົນລາວບັນດາເຜົ່າ ທີ່ມີການ ປູກຝັ່ງລ້ຽງສັດ, ຫົດຖະກຳ ແລະ ການຫາປາທີຖືກຕ້ອງຕາມປະເພນີຂອງລາວເຮົາ.

ໂດຍແຕ່ລະຄ້າຍຕ່າງກໍ່ໄດ້ຮັບການຍ້ອງຍໍຕິຊົມໄປຕາມໆກັນ ຈາກທ່ານປະທ່ານ ແລະ ແຂກທີ່ເຂົ້າຮ່ວມ, ໂອກາດດຽວກັນນີ້ຍັງໄດ້ຮັບຊົມການສະແດງຊິນລະປະວັນນະຄະດີ ປະເພດບົດຟ້ອນ ແລະ ຮ້ອງເພງ ຈາກຫຼານນ້ອຍເຍົາວະຊົນ ພ້ອມທັງມີການແຂ່ງຂັ່ນກິລາມ່ວນຊື່ນ ແລະ ຫຼິ້ນເກມເຊັ່ນ: ກິລາດຶງເຊືອກ ແລະ ຫຼິ້ນເກມນັ້ງປູມເປົ້າຕື່ມອືກ.

ທ້າຍພິທີ ທ່ານ ພັທ ບຸນເຄນ ໄຊຍະບົວພາ ຄະນະປະຈຳພັກເມືອງ ຫົວໜ້າກອງບັນຊາການ ປກສ ເມືອງໝື່ນ ໄດ້ກ່າວສະເເດງຄວາມຍ້ອງຍໍຊົມເຊີຍຕໍ່ຄູ – ອາຈານ ,ຄະນະຮັບຜິດຊອບ ແລະ ຫຼານນ້ອຍເຍົາວະຊົນທຸກຄົນ ທີ່ໄດ້ພ້ອມກັນຕັ້ງໃຈໃຫ້ພິທີນີ້ເກີດຂຶ້ນ ແລະ ສຳເລັດຢ່າງຈົບງາມ ແລະ ຍັງເນັ້ນໜັກໃຫ້ຫຼານນ້ອຍເຍົາວະຊົນຈົ່ງພ້ອມກັນຕັ້ງໜ້າເຮັດໜ້າທີ່ຂອງຕົນເວົ້າລວມ ເວົ້າສະເພາະປະຕິບັດເນື້ອໃນຄຳຂວັນຂອງເຍົາວະຊົນ 6 ຮັກ 3 ຊັງ ແລະ ຂໍ້ແຂ່ງຂັນ 3 ດີ 4 ຮູ້ ຂອງເຍົາວະຊົນໃຫ້ປະກົດຜົນເປັນຈິງ.

 

ຂ່າວ ແຫວນຄຳ ນັກຂ່າວ ເມືອງໝື່ນ

Leave a Reply