ຫ້ອງການອຸດສະຫະກຳ ແລະ ການຄ້າເມືອງວັງວຽງຈັດພິທີທຳລາຍສີນຄ້າໝົດອາຍຸ ແລະ ສີນຄ້າລອກຮຽນແບບ

ໃນວັນທີ 16 ພະຈິກ 2018 ນີ້ຫ້ອງການອຸດສະຫະກໍາ ແລະ ການຄ້າເມືອງວັງວຽງຈັດພິທີທໍາລາຍສີນຄ້າໝົດອາຍຸ ແລະ ສີນຄ້າລອກຮຽນແບບຂຶ້ນ.

ໃຫ້ກຽດເຂົ້າຮ່ວມໂດຍທ່ານ ສຸວຽງທອງ ວົງຈຳປາ ຄະນະປະຈຳພັກເມືອງຮອງເຈົ້າເມືອງໆວັງວຽງ,ມີຄະນະປະຈຳພັກເມືອງ,ກຳມະການພັກເມືອງ,ມີຫົວໜ້າຫ້ອງການ,ຮອງຫ້ອງການອ້ອມຂ້າງເມືອງ. ພໍ່ຄ້າຊາວຂາຍພ້ອມດ້ວຍ ພະນັກງານໃນຫ້ອງການອຸດສະຫະກຳ ແລະ ການຄ້າເມືອງ ເຂົ້າຮ່ວມ.

ໃນພິທີ ທ່ານ ອ່ອນສີ ຈັນດາວົງ ກຳມະການພັກເມືອງຫົວໜ້າຫ້ອງການອຸດສະຫະກຳ ແລະ ການຄ້າເມືອງໄດ້ຂຶ້ນຜ່ານບົດສະຫຼຸບຜົນຂອງການກວດກາສີນຄ້າ ອຸປະໂພກ – ບໍລິໂພກຕ່າງໆຕາມຫ້າງຮ້ານຂາຍຍົກ – ຂາຍຍ່ອຍໃນທົ່ເມືອງ.

ຕາມແຈ້ງການວ່າດ້ວຍການປົກປ້ອງຜູ້ຊົມໃຊ້ສະບັບເລກທີ02/ສພຊ, ລົງວັນທີ 30 ມີຖຸນາ 2010, ຂໍ້ຕົກລົງຂອງລັດ ຖະມົນຕີກະຊວງອຸດສະຫະກຳ ແລະ ການຄ້າສະບັບເລກທີ1499/ອຄ.ກຍພນ, ລົງວັນທີ 08 ກັນຍາ 2017 ວ່າດ້ວຍການຈັດຕັ້ງປະຕິບັດວຽກງານກວດກາການຄ້າ,ໂດຍປະຕິບັດຕາມທິດຊີ້ນຳທັງສາຍຕັ້ງ ແລະ ສາຍຂວາງໃນຄັ້ງ ວັນທີ 11/ 9 /2018-10/10/2018

ຫ້ອງການອຸດສາຫະກໍາ ແລະ ການຄ້າເມືອງວັງວຽງ, ເຈົ້າໜ້າທີ່ກວດກາການຄ້າ ໄດ້ປະຕິບັດໜ້າທີ່ທາງດ້ານວຽກງານວິຊາສະເພາະ ລົງກວດກາຫ້າງຮ້ານຂາຍເຄື່ອງສົ່ງ ແລະ ຂາຍເຄື່ອງຍ່ອຍທົ່ວໄປ, ຢູ່ໃນເທດສະບານເມືອງວັງວຽງທັງໝົດ 51 ຮ້ານພ້ອມທັງສ້າງບົດບັນທຶກ ສຶກສາອົບຮົມກ່າວຕັກເຕືອນກັບເຈົ້າຂອງຮ້ານ ໄດ້ທັງໝົດ 22 ຮ້ານ, ພ້ອມໄດ້ຢຶດສິນຄ້າບໍ່ໄດ້ມາດຖານ, ສິນຄ້າປອມແປງ, ສິນຄ້າລອກຮຽນແບບ, ສິນຄ້າໝົດອາຍຸ, ໄດ້ຈຳນວນ 5 ປະເພດຂອງສິນຄ້າ ແລະ ມີ 52 ລາຍການໃນນີ້ປະກອບມີ:

ປະເພດ ເຂົ້າໜົມ ແລະ ມີ໋ໄວໄວ, ຍຳຍຳ ມີມູນຄ່າ 2,549,000 ກີບ, ປະເພດນົມປ໋ອງ,ນົມຝຸ່ນມີມູນຄ່າ 1,141,000 ກີບ, ປະເພດ ເຄື່ອງດື່ມຕ່າງໆມີມູນຄ່າ 3,404,000 ກີບ, ປະເພດເຄື່ອງປຸງແຕ່ງອາຫານມີມູນຄ່າ 2,022,000 ກີບ, ປະເພດ ຢາສູບຕ່າງໆມີມູນຄ່າ 6,862,000 ກີບ, ລວມມູນຄ່າທັງໝົດຂອງສິນຄ້າແມ່ນ: 16,005,000 ກີບ,

ສ່ວນສິນຄ້າທີ່ຢຶດມາໄດ້ທາງຫ້ອງການອຸດສາຫະກໍາ ແລະ ການຄ້າແມ່ນໄດ້ທຳລາຍຖີ້ມ, ທ່ານຫົວໜ້າຫ້ອງການອຸດສາຫະກໍາ ແລະ ການຄ້າເມືອງຍັງໃຫ້ຮູ້ວ່າຈະສືບຕໍ່ລົງສຶກສາອົບຮົມການເມືອງແນວຄິດປູກຈິດສຳນຶກເຜີຍແຜ່ລະບຽບ, ກົດໝາຍ, ນິຕິກຳຕ່າງໆທີ່ເປັນການປົກປ້ອງຜູ້ຊົມໃຊ້ໃຫ້ຜູ້ປະກອບການທຸລະກິດຫ້າງຮ້ານຂາຍຍົກ-ຂາຍຍ່ອຍຕະຫຼອດຮອດພໍ່ແມ່ປະຊາຊົນເຂົ້າໃຈເຖິງຜົນຮ້າຍຂອງສິນຄ້າດັ່ງກ່າວ.

ນອກນີ້ຍັງຈະສືບຕໍ່ຕິດຕາມກວດກາປະເພດສິນຄ້າຕາງໆຢູ່ໃນຄວາມຮັບຜິດຊອບຂອງຕົນໃຫ້ຖືກຕ້ອງຕາມລະບຽບກົດໝາຍວາງອອກແຕ່ລະໄລຍະ.

ຂ່າວ: ໝອນແກ້ວ

Leave a Reply