ສະຫະພັນນັກຮົບເກົ່າບ້ານໂນນສະຫ່ວາງ ຈັດກອງປະຊຸມສະຫຼຸບວຽກງານການເຄື່ອນໄຫວ ປີ 2018 ແລະ ວາງທິດທາງແຜນການປີ 2019

ວັນທີ 16 ພະຈິກ 2018 ທີ່ຜ່ານມານີ້ ຢູ່ທີ່ຫ້ອງການບ້ານໂນນສະຫ່ວາງ ເມືອງວຽງຄຳ ແຂວງວຽງຈັນ ໄດ້ຈັດກອງປະຊຸມສະຫຼຸບວຽກງານການເຄື່ອນໄຫວປະຈຳປີ 2018 ແລະ ວາງທິດທາງແຜນການປະຈໍາປີ 2019

ໂດຍການເປັນປະທານຂອງ ທ່ານ ພັທ ແສງເພັດ ແສນທະລາ ປະທານສະຫະພັນນັກຮົບເກົ່າ ເມືອງວຽງຄຳ, ມີ ທ່ານ ບຸນຂຳ ແສນທຳມະວົງ ຮອງເລຂາຄະນະພັກຮາກຖານ ບ້ານໂນນສະຫ່ວາງ, ຄະນະໜ່ວຍ 2 ໜ່ວຍ ແຂກຖືກເຊີນ ພ້ອມດ້ວຍສະມາຊິກນັກຮົບເກົ່າພາຍໃນບ້ານເຂົ້າຮ່ວມຢ່າງພ້ອມພຽງ.

ທ່ານ ພັຕ ຄຳພໍໃຈ ລອດໂພໄຊ ຄະນະບໍລິຫານງານສະຫະພັນນັກຮົບເກົ່າ ບ້ານໂນນສະຫວ່າງ ເມືອງວຽງຄຳ ກ່າວວ່າ: ຕະຫຼອດໄລຍະ 1 ປີ ຜ່ານມາ, ຄະນະບໍລິຫານງານສະຫະພັນນັກຮົບເກົ່າພວກເຮົາ ໄດ້ຖືເອົາຄວາມສຳຄັນການສຶກສາອົບຮົມການເມືອງແນວຄິດ ໃນຖັນແຖວນັກຮົບເກົ່າດ້ວຍຫຼາຍຮູບການຫຼາຍວິທີ ແລະ ໄດ້ເອົາໃຈໃສ່ປັບປຸງໂຄງປະກອບການຈັດຕັ້ງແຕ່ລະຂັ້ນ

ຍົກສູງແບບແຜນວິທີເຮັດວຽກຂອງຄະນະບໍລິຫານງານ, ສຸມໃສ່ປັບປຸງການຈັດຕັ້ງບ້ານໃຫ້ເຂັ້ມແຂງເຕົ້າໂຮມ ຄວາມສາມັກຄີ ໃນຖັນແຖວນັກຮົບເກົ່າເຄື່ອນໄຫວໄປຕາມທິດຊີ້ນຳຂອງກົມການເມືອງສູນກາງພັກ, ກົດລະບຽບສະຫະພັນນັກຮົບເກົ່າແຫ່ງຊາດລາວວາງອອກຢ່າງເຂັ້ມງວດ

ັພ້ອມນັ້ນຍັງໄດ້ເຊື່ອມຊຶມແນວທາງນະໂຍບາຍຂອງພັກ, ພາລະບົດບາດ ແລະ ສິດໜ້າທີ່ຂອງນັກຮົບເກົ່າ ຍາມໃດກໍ່ເປັນເຈົ້າການເສີມຂະຫຍາຍບົດບາດເປັນແວ່ນແຍງໃຫ້ຄົນລຸ້ນຫຼັງ ໃນການຮັກສາທາດແທ້ຄຸນສົມບັດສິນທຳປະຕິວັດ, ແບບແຜນ ການດຳລົງຊີວິດທີ່ກ້າວໜ້າ ອິງຕາມຄຳຂວັນທີ່ວ່າ: ເພີ່ງຕົນເອງ, ກຸ້ມຕົນເອງ ແລະສ້າງຄວາມເຂັ້ມແຂງດ້ວຍຕົນເອງ

ສະຫະພັນນັກຮົບເກົ່າບ້ານໂນນສະຫວ່າງພວກເຮົາປະກອບມີ 2 ໜ່ວຍ ມີສະມາຊິກທັງໝົດ 80 ສະຫາຍ, ຍິງ 43 ສະຫາຍ, ປະຈຸບັນມີເງິນກອງທຶນ 23 ລ້ານກີບ ໃນປີຜ່ານມາສະມາຊິກພວກເຮົາໄດ້ຊ່ວຍປຶກສາ ຫາລື ເອກະພາບຊ່ວຍອໍານາດການປົກຄອງບ້ານ ໄດ້ 28 ຄັ້ງ, ຄົ້ນຄວ້າຍ້ອງຍໍໃກ້ແກ່ສະຫະພັນນັກຮົບເກົ່າ ໄດ້ 2 ຄັ້ງ, ເຂົ້າຮ່ວມຮັບຟັງປາຖະກາຖາ ແລະ ຮ່ວມຊ່ອງແສງຂັ້ນຕ່າງໆໄດ້ 48 ຄັ້ງ

ໄດ້ເຂົ້າຮ່ວມພິທີເປີດປີທ່ອງທ່ຽວເມືອງວຽງຄຳ ແລະ ງານບຸນຕ່າງໆ ໄດ້ 1 ຄັ້ງ ມີຜູ້ເຂົ້າຮ່ວມ 80 ສະຫາຍ , ເຂົ້າຮ່ວມກອງປະຊຸມສົງປະຈຳແຂວງວຽງຈັນ 1 ຄັ້ງ ມີຜູ້ເຂົ້າຮ່ວມ 50 ສະຫາຍ, ເຂົ້າຮ່ວມກອງປະຊຸມໃຫຍ່ສະຫະພັນນັກຮົບເກົ່າເມືອງ ຄັ້ງທີ IV ມີຜູ້ເຂົ້າຮ່ວມ 32 ສະຫາຍ.

ໃນພິທີຍັງໄດ້ມອບໃບຍ້ອງຍໍ ສະຫະພັນນັກຮົບເກົ່າແຫ່ງຊາດ ຈຳນວນ 14 ສະຫາຍ, ໃບຍ້ອງຍໍສະຫະພັນນັກຮົບເກົ່າແຂວງ ຈໍານວນ 29 ສະຫາຍ,ໃບຢັ້ງຢືນ 3 ດີ 6 ຮັກສາ ຈໍານວນ 2 ໃບ ໃຫ້ໜ່ວຍສະຫະພັນນັກຮົບເກົ່າບ້ານໂນນສະຫວ່າງ, ໂດຍເປັນກຽດມອບຂອງທ່ານ ພັທ ແສງເພັດ ແສນທະລາ ແລະ ທ່ານ ບຸນຂຳ ແສນທຳມະວົງ.

ທ່ານ ພັທ ແສງເພັດ ແສນທະລາ ປະທານສະຫະພັນນັກຮົບເກົ່າ ເມືອງວຽງຄຳ ຍັງໄດ້ໃຫ້ກຽດຂື້ນມີຄຳເຫັນ ແລະ ໂອ້ລົມຕໍ່ກອງປະຊຸມດັ່ງກ່າວ: ຊື່ງກ່ອນອື່ນທ່ານກໍ່ເຫັນດີເປັນເອກະພາບນຳບົດສະຫຼຸບວຽກງານການເຄື່ອນໄຫວໃນໄລຍະ 1 ປີຜ່ານມາ ແລະ ຍັງໄດ້ເນັ້ນໜັກກ່ຽວກັບພາລະບົດບາດຂອງນັກຮົບເກົ່າ ຢູ່ໃນຂົງເຂດຮາກຖານບ້ານເພື່ອເຮັດໃຫ້ສະມາຊິກນັກຮົບເກົ່າ ມີຄວາມໜັກແໜ້ນທາງດ້ານການເມືອງແນວຄິດ,ການຈັດຕັ້ງໃຫ້ມີຄວາມສາມັກຄີ, ຊ່ວຍເຫຼືອເຊິ່ງກັນ ແລະ ກັນ ຢູ່ໃນຖັນແຖວນັກຮົບເກົ່າຂອງພວກເຮົາ

ເພີ່ມທະວີຄວາມເປັນເອກະພາບກັນ ແລະ ແບບແຜນວິທີເຮັດວຽກ ລະຫວ່າງ ພະນັກງານ, ອຳນາດການປົກຄອງບ້ານ, ອົງການຈັດຕັ້ງມະຫາຊົນເພື່ອເຮັດໃຫ້ສະມາຊີກຂອງພວກເຮົາມີໃບໜ້າອັນໃໝ່, ຮູ້ເຖິງວຽກງານພາລະບົດບາດ, ສິດແລະໜ້າທີ່ຂອງວຽກງານນັກຮົບເກົ່າຢ່າງເລິກເຊິ່ງ ຢູ່ໃນຖັນແຖວນັກຮົບເກົ່າໃນແຕ່ລະເຂດ, ແຕ່ລະຂັ້ນ, ລົງເຜີຍແຜ່ກົດລະບຽບກອງທຶນໃຫ້ສະມາຊີກຮັບຮູ້ຢ່າງທົ່ວເຖີງ, ກຳໄດ້ວຽກງານກ່ຽວກັບ 3 ດີ 6 ຮັກສາ ເພື່ອນຳເອົາໄປຈັດຕັ້ງປະຕິບັດເຂົ້າໃນວຽກງານຂອງຕົນໃຫ້ໄດ້ຮັບຜົນສຳເລັດເປັນກ້າວໆ.

ພາບ-ຂ່າວ: ປກສ ແຂວງວຽງຈັນ, ທອງສີ 28328274

Leave a Reply