ພິທີເປີດຂະບວນການຂໍ້ແຂ່ງຂັນ 5 ເປັນເຈົ້າ ຂອງສະຫະພັນກຳມະບານຮາກຖານເຂື່ອນໄຟຟ້ານ້ຳງື່ມ 1

ໃນວັນທີ 14 / 11 / 2018 ຜ່ານມາ ສະຫະພັນກຳມະບານຮາກຖານເຂື່ອນໄຟຟ້ານ້ຳງື່ມ 1 ໄດ້ເປີດຂະບວນການຂໍ້ແຂ່ງຂັນ 5 ເປັນເຈົ້າ ຂື້ນຢູ່ຫ້ອງປະຊຸມດັ່ງກ່າວ

ເປັນກຽດເຂົ້າຮ່ວມໂດຍ ທ່ານ ບົວວັນ ຈັນສະຫວັດ ເລຂາຄະນະພັກຮາກຖານ, ອຳນວຍການເຂື່ອນໄຟຟ້ານ້ຳງື່ມ 1 , ທ່ານ ຈັນສະໝອນ ຈັນທາທອນ ຮອງປະທາສະຫະພັນກຳມະບານແຂວງວຽງຈັນ, ທ່ານ ດາວວຽງ ສຸນັນທະລາດ ປະທານສະຫະພັນກຳມະບານຮາກຖານເຂື່ອນໄຟຟ້ານ້ຳງື່ມ 1, ມີປະທານ – ຮອງປະທານ ແຕ່ລະຮາກຖານທິ່ຂື້ນກັບ, ແຂກຖືກເຊີນ ແລະ ສະມາຊິກກຳມະບານເຂົ້າຮ່ວມທັງໝົດ 200 ກວ່າສະຫາຍ.

ທ່ານ ດາວວຽງ ສຸນັນທະລາດ ໄດ້ຜ່ານບົດສະຫລຸບຫຍໍ້ຂອງການຈັດຕັ້ງປະຕິບັດວຽກງານກຳມະບານໃນໄລຍະຜ່ານມາ ແລະ ຄາດໝາຍສູ້ຊົນຂໍ້ແຂ່ງຂັນ 5 ເປັນເຈົ້າ, ເຊີ່ງທ່ານຍັງໃຫ້ຮູ້ວ່າ: ສະຫະພັນກຳມະບານຮາກຖານເຂື່ອນໄຟຟ້ານ້ຳງື່ມ 1 ມີຄະນະປະທານ ຈຳນວນ 05 ສະຫາຍ, ຍິງ 01 ສະຫາຍ, ມີ 04 ຮາກຖານຂື້ນກັບ, ປະກອບດ້ວຍ 08 ໜ່ວຍ, ມີສະມາຊິກກຳມະບານທັງໝົດ 163 ສະຫາຍ, ຍິງ 30 ສະຫາຍ.

ຄະນະປະທານສະຫະພັນກຳມະບານເຂື່ອນໄຟຟ້ານ້ຳງື່ມ 1 ໄດ້ວາງຄາດໝາຍສູ້ຊົນ ໃຫ້ແຕ່ລະກຳມະບານຮາກຖານຂື້ນກັບ ໃນການຊຸກຍູ້, ຕິດຕາມ, ກວດກາ, ການເຄື່ອນໄຫວຂອງສະມາຊິກກຳມະບານພ້ອມທັງມີການປະເມີນ, ສ່ອງແສງລາຍງານ ແລະ ຂໍທິດຊີ້ນຳຈາກຂັ້ນເທິງເປັນແຕ່ລະໄລຍະ

ທັ້ງນີ້ກໍ່ເພຶ່ອແນໃສ່ສ້າງສະມາຊິກກຳມະບານແຕລະສະຫາຍໃຫ້ກາຍເປັນສະມາຊິກກຳມະບານ 5 ເປັນເຈົ້າໃຫ້ກວມ 90%% ຂອງບັນດາສະມາຊິກທັງໝົດພາຍໃນສະຫະພັນກຳມະບານຮາກຖານ, ພິທີຍັງໄດ້ສະຫລຸບລາຍງານການປະເມີນສະມາຊິກກຳມະບານ 5 ເປັນເຈົ້າໃນຮອບທີ I – II ຂອງປີ 2017 – 2018 ສາມາດຕີລາຄາ ລວມໄດ້ 90%.

ຈາກນັ້ນຍັງໄດ້ມອບ-ຮັບໃບຢັ້ງຢືນຂໍ້ແຂ່ງຂັນ 5 ເປັນເຈົ້າ ປະຈຳປີ 2017 – 2018 ຂອງປະທານສະຫະພັນກໍາມະບານແຂວງ ໃຫ້ສະຫະພັນກຳມະບານຮາກຖານເຂື່ອນໄຟຟ້ານໍ້າງື່ມ 1 ຈໍານວນ 1 ໃບ ແລະ ໃບຢັ້ງຢືນຂໍ້ແຂ່ງຂັນ 5 ເປັນເຈົ້າຂອງປະທານສະຫະພັນກຳມະບານຮາກຖານເຂື່ອນໄຟຟ້ານໍ້າງື່ມ 1 ໃຫ້ກໍາມະບານຮາກຖານ ຂື້ນກັບ ຈໍານວນ 04 ໃບ.

ຈາກນັ້ນໄດ້ຮັບຟັງການໂອ້ລົມຂອງ ທ່ານ ບົວວັນ ຈັນສະຫວັດ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານດັ່ງກ່າວທີ່ຍາດມາໄດ້ຈົນບັນລຸຕາມລະດັບຄາດໝາຍທີ່ວາງໄວ້ ແລະ ຍັງໄດ້ຮຽກຮ້ອງໃຫ້ສະມາຊິກກຳມະບານທຸກສະຫາຍ ຈົ່ງເພີ່ມທະວີເອົາໃຈໃສ່ປະຕິບັດວຽກງານ ວິຊາສະເພາະ ໂດຍຕິດພັນກັບເນື້ອໃນຂໍ້ແຂ່ງຂັນ 5 ເປັນເຈົ້າໃຫ້ປະກົດຜົນເປັນຈິງ.

ຂ່າວ: ໄຊປັນຍາ

Leave a Reply