ພິທີເຊັນສັນຍາໂຄງການລົງທຶນກໍ່ສ້າງພື້ນຖານໂຄງລ່າງກໍ່ສ້າງຂົ້ວອູຂ້າມນ້ຳຊອງ ແລະ ລານຈອດລົດ (ຈຸດຖໍ້ານອນ) ບ້ານຫ້ວຍສະເຫງົ້າ ເມືອງວັງວຽງ ແຂວງວຽງຈັນ

ໃນວັນທີ 6 ກັນຍາ 2018 ທີ່ຜ່ານມານີ້, ຢູ່ທີ່ຫ້ອງປະຊຸມຫ້ອງການແຜນການ ແລະ ການລົງທຶນ ເມືອງວັງວຽງແຂວງວຽງຈັນ. ໄດ້ມີພິທີເຊັນສັນຍາໂຄງການລົງທຶນກໍ່ສ້າງພື້ນຖານໂຄງລ່າງກໍ່ສ້າງຂົ້ວອູຂ້າມນ້ຳຊອງ ແລະ ລານຈອດລົດ (ຈຸດຖໍ້ານອນ) ບ້ານຫ້ວຍສະເຫງົ້າ ເມືອງວັງວຽງ ແຂວງວຽງຈັນ ລະຫວ່າງ ອົງການປົກຄອງເມືອງວັງວຽງ, ຕາງໜ້າໂດຍ ຫ້ອງການແຜນການ ແລະ ການລົງທຶນເມືອງວັງວຽງ ກັບ ບໍລິສັດ ທ່ອງທ່ຽວວັນເດີຟູນລາວ ຈຳກັດຜູ້ດຽວ.

ໂດຍການເປັນກຽດເຂົ້າຮ່ວມຂອງ ທ່ານ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ມີບັນດາທ່ານຄະນະປະຈຳ, ກຳມະການພັກເມືອງ, ບໍລິສັດ ທ່ອງທ່ຽວວັນເດີຟູນລາວ ຈຳກັດຜູ້ດຽວ, ຫົວໜ້າຫ້ອງການ, ຄະນະຫ້ອງການ, ນາຍບ້ານແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ເພື່ອປະຕິບັດຕາມກົດໜາຍວ່າດ້ວຍການສົ່ງເສີມ ການລົງທຶນສະບັບປັບປຸງ ເລກທີ 14/ສພຊ, ລົງວັນທີ່ 17 ພະຈິກ 2016 ແລະ ຂໍ້ຕົກລົງຂອງ ທ່ານ ລັດຖະມົນຕີ ກະຊວງແຜນການ ແລະ ການລົງທຶນ ສະບັບ ເລກທີ 382/ກຜທ, ລົງວັນທີ່ 20 ກຸມພາ 2018 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຫ້ອງການ ແຜນການ ແລະ ການລົງທຶນເມືອງ.

ໃນພິທີ ທ່ານ ບຸນພັນ ວົງສຳພັນ ປະທານ ບໍລິສັດ ທ່ອງທ່ຽວວັນເດີຟູນລາວ ຈຳກັດຜູ້ດຽວ ໄດ້ຂື້ນຜ່ານຄວາມເປັນມາຂອງ ຖ້ຳນອນເຊິ່ງ ແມ່ນສະຖານທີ່ທ່ອງທ່ຽວທຳມະຊາດແຫ່ງໜຶ່ງ ທີ່ມີຊື່ສຽງ ຂອງເມືອງວັງວຽງ ແຕ່ເນື່ອງຈາກວ່າ ໃນໄລຍະຜ່ານມາ ການພັດທະນາ, ການປັບປຸງ ບໍ່ທັນເປັນລະບົບ, ບໍ່ທັນຕໍ່ເນື່ອງພາຍຫຼັງທີ່ ບໍລິສັດຂ້າພະເຈົ້າ ໄດ້ມາຟື້ນຟູ ແລະ ຈັດກິດຈະການການບໍລິການ ທ່ອງທ່ຽວຢູ່ສະຖານແຫ່ງນີ້ 2-3 ປີມານີ້ ກໍ່ໄດ້ເປັນສ່ວນປະກອບທີ່ສຳຄັນ ໃຫ້ແກ່ການສົ່ງເສີມການທ່ອງທ່ຽວ, ການດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ.

ພ້ອມທັງໄດ້ຮັບການສະໜັບສະໜູນ, ຄຳແນະນຳ, ຄຳປຶກສາຫາລື ທີ່ເປັນປະໂຫຍດ ຈາກພາກສ່ວນຕ່າງໆ ອັນໄດ້ເປັນເງື່ອນໄຂຄົ້ນຄວ້າ ແລະ ສະເໜີແຜນແນວຄິດ ທີ່ຈະພັດທະນາສິ່ງອຳນວຍຄວາມສະດວກ ດັ່ງກ່າວນີ້ໃຫ້ແກ່ການ ຍົກລະດັບ ໃນການພັດທະນາເປັນຕົ້ນ:

ຈະດຳເນີນ ການສຶກສາສຳຫຼວດ ພື້ນທີ່ ທີ່ດິນຂອງຕົນເອງ ເປັນທ່າແຮງບົມຊ້ອນ ເພື່ອຈັດຕັ້ງກິດຈະການ ໃຫ້ຫຼາກຫຼາຍ ແລະ ອຸດົມສົມບູນ ເພື່ອບໍລິການ ການທ່ອງທ່ຽວ ຢູ່ເຂດຖ້ຳນອນ ໃຫ້ກ່າຍເປັນສະຖານທີ່ທ່ອງທ່ຽວ ມີລັກສະນະຄົບວົງຈອນ ທີ່ສວຍງາມ, ສີຂຽວ ແລະ ຢືນຍົງ. ໄລຍະການສຳປະທານ 15 ປີ ລວມມູນຄ່າທຶນທັງໝົດ 3 ຕື້ກວ່າກີບ.

ຕອນທ້າຍ, ຍັງໄດ້ມີພິທີເຊັນສັນຍາໂຄງການລົງທຶນກໍ່ສ້າງພື້ນຖານໂຄງລ່າງກໍ່ສ້າງຂົ້ວອູຂ້າມນ້ຳຊອງ ແລະ ລານຈອດລົດ (ຈຸດຖໍ້ານອນ) ບ້ານຫ້ວຍສະເຫງົ້າ ເມືອງວັງວຽງ ແຂວງວຽງຈັນ ລະຫວ່າງ ອົງການປົກຄອງເມືອງວັງວຽງ, ຕາງໜ້າໂດຍ ຫ້ອງການແຜນການ ແລະ ການລົງທຶນເມືອງວັງວຽງ ກັບ ບໍລິສັດ ທ່ອງທ່ຽວວັນເດີຟູນລາວ ຈຳກັດຜູ້ດຽວ.

ຂ່າວ: ທັນວາ

Leave a Reply