ຕຳຫຼວດຈະລະຈອນແຂວງວຽງຈັນ ຈັດກອງປະຊຸມແນະນໍາຊຸກຍູ້ວຽກງານຈະລະຈອນ ໃນມື້ສົ່ງທ້າຍປີເກົ່າ – ຕ້ອນຮັບປີໃຫມ່ 2019

ວັນທີ 31 ທັນວາ 2018 ຜ່ານມານີ້ ຢູ່ທີ່ຫ້ອງປະຊຸມພະແນກຈະລາຈອນ ຫ້ອງຕຳຫຼວດ ປກສ ແຂວງວຽງຈັນ ໄດ້ຈັດກອງປະຊຸມແນະນໍາຊຸກຍູ້ວຽກງານຈະລະຈອນ ປ້ອງກັນງານສະເຫຼີມສະຫຼອງສົ່ງທ້າຍປີເກົ່າ ແລະ ຕ້ອນຮັບປີໃໝ່ສາກົນ ຄສ 2019

ເປັນກຽດເຂົ້າຮ່ວມຂອງທ່ານ ພັທ ແກ້ວມາລາ ແສງທອງ ຮອງຫົວໜ້າກົມຕໍາຫຼວດຈະລະຈອນ ພ້ອມຄະນະ, ທ່ານ ພັທ ກໍ່າດວງ ປັນຍາ ຮອງຫົວໜ້າຫ້ອງຕໍາຫຼວດ ປກສ ແຂວງ, ທ່ານ ພັທ ຈັນທະໜອມ ສີທໍາມະວັນ ຫົວໜ້າພະແນກຕໍາຫຼວດຈະລາຈອນ ປກສ ແຂວງ ມີພະນັກງານ-ນັກຮົບ ພາຍໃນພະແນກຈະລະຈອນເຂົ້າຮ່ວມ.

ທ່ານ ພັທ ຈັນທະໜອມ ສີທໍາມະວັນ ຫົວໜ້າພະແນກຕໍາຫຼວດຈະລາຈອນ ປກສ ແຂວງ ໄດ້ຂື້້ນຜ່ານແຜນການປ້ອງກັນປີໃໝ່ສາກົນ ຄສ 2019 ທ່ານໄດ້ກ່າວວ່າ: ສະພາບອຸປະຕິເຫດຈະລະຈອນທາງບົກທີ່ເກີດຂື້ນໃນປີ 2018 ຜ່ານມາເຫັນວ່າມີຄວາມຮຸນແຮງພໍສົມຄວນ, ສ້າງຜົນເສຍຫາຍເຖິງຊີວິດ, ສຸຂະພາບ ແລະ ຊັບສິນຂອງປະຊາຊົນບັນດາເຜົ່າ ຢ່າງຫຼວງຫຼາຍ, ສະແດງອອກມີອຸປະຕິເຫດເກີດນື້ນທົ່ວແຂວງວຽງຈັນ ທັງໝົດ 663 ຄົນ, ຍິງ 171 ຄົນ, ເສຍຊີວິດ 51 ຄົນ, ຍິງ 9 ຄົນ, ປະເມີນມູນຄ່າຜົນເສຍຫາຍ 4.712.900.000 ກີບ,

ພົ້ນເດັ່ນກວ່າໜູ່ແມ່ນເກີດອຸປະຕິເຫດແລ້ວຜູ້ຂັບຂີ່ເອົາຕົວຫຼົບໜີ ມີຈໍານວນ 5 ເລື່ອງ ສາມາດກັກຕົວຜູ້ຂັບຂີ່ມາດຳເນີນຄະດີຕາມລະບຽບກົດໝາຍໄດ້ 3 ຄົນ, ສະເພາະຊ່ວງສະເຫຼີມສະຫຼອງສົ່ງປີເກົ່າ ແລະ ຕ້ອນຮັບປີໃໝ່ 2018, 5 ວັນ ມີອຸປະຕິເຫດເກີດຂື້ນ 18 ເລື່ອງ, ພາຫະນະເປເພທັງໝົດ 35 ຄັນ, ມີຜູ້ບາດເຈັບ 37 ຄົນ, ເສຍຊີວິດ 4 ຄົນ, ປະເມີນມູນຄ່າຜົນເສຍຫາຍ 168.500.000 ກີບ,

ສາເຫດການເກີດອຸບັດຕິເຫດ ສ່ວນຫຼາຍແມ່ນດື່ມສິ່ງມືນເມົ່າແລ້ວຂັບຂີ່ ກວມ 22.00%, ຂັບຂີ່ລົດໄວ ກວມ 55% ເພື່ອເຮັດໃຫ້ງານສະເຫຼີມສະຫຼອງຕອນຮັບປີໃໝ່ສາກົນ ຄສ 2019 ນີ້ ຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ປອດໄພໃນການສັນຈອນ, ມີຄວາມເບິກບານມວນຊື່ນ ແລະລີກລ້ຽງການເກີດອຸບັດຕິເຫດທີ່ສ້າງຜົນເສຍຫາຍຕາມມາ ພະແນກຕໍາຫຼວດຈະລະຈອນຈິ່ງສ້າງແຜນການລົງປ້ອງກັນສະກັດກັ້ນການເກີດອຸປະຕິເຫດ ແລະ ຈັດສັນອໍານວຍຄວາມສະດວກດ້ານການສັນຈອນດັ່ງນີ້.

ໄດ້ແບ່ງກໍາລັງຕຳຫຼວດຈະລະຈອນອອກເປັນ 4 ໜ່ວຍຄື: ໜ່ວຍປະຈໍາປ້ອມ ບ້ານດົງ ເສັ້ນທາງເລກ 10, ໜ່ວຍປະຈໍາປ້ອມ ໂພນໄຊ ເສັ້ນທາງເລກທີ 13 ເໜືອ, ໜ່ວຍປະຈໍາປ້ອມ ນໍ້າຮີ້ ເສັ້ນທາງເລກທີ 11 ແລະ ໜ່ວຍປະຈໍາການໃຫຍ່ ຢູ່ກອງບັນຊາການ ປກສ ແຂວງ ແຕ່ລະຈຸດແມ່ນປະຈໍາການຕະຫຼວດ 24 ຊົ່ວໂມງ,

ຜ່ານການຈັດຕັ້ງປະຕິບັດ 2 ວັນ ແຕ່ວັນທີ 29 ຫາ 30 ທັນວາ 2018 ມີອຸປະຕິເຫດເກີດຂື້ນ 2 ເລື່ອງ, ພາຫະນະເປເພທັງໝົດ 7 ຄັນ, ຄົນໄດ້ຮັບບາດເຈັບ 3 ຄົນ, ເສຍຊີວິດ 1 ຄົນດ ມູນຄ່າຜົນເສຍຫາຍ 45.000.000 ກີບ, ສາເຫດແມ່ນດື່ມສິ່ງມືນເມົາແລ້ວຂັບຂີ່.

ພາບ-ຂ່າວ: ປກສ ແຂວງວຽງຈັນ